Hoe word ons bediening gefinansier?

Elke jaar druk en versprei ons honderdmiljoene Bybels en stukke Bybellektuur. Ons bou en besit takkantore en drukkerye regoor die wêreld. Tienduisende gemeentes ontmoet in beskeie maar aantreklike plekke van aanbidding wat Koninkryksale genoem word. Wie betaal vir dit alles?

Ons werk word geheel en al deur vrywillige bydraes ondersteun (2 Korintiërs 9:7). In 1879 het die tweede nommer van hierdie tydskrif gesê: “Ons glo dat JEHOVAH die ondersteuner is van ‘Zion’s Watch Tower’ [soos hierdie tydskrif destyds genoem is], en solank dit die geval is, sal dit nooit bedel of mense om ondersteuning smeek nie.” Ons volg nog steeds hierdie beleid.

Bydraes word direk aan een van ons takkantore gestuur of in bydraebussies geplaas, wat in elke Koninkryksaal gevind kan word. Maar ons vra nooit tiendes, neem nooit kollektes op en vra nooit geld vir ons dienste of publikasies nie. Ons word nie betaal om te preek, in die gemeente te onderrig of plekke van aanbidding te help bou nie. Jesus het immers gesê: “Julle het verniet ontvang, verniet moet julle gee” (Matteus 10:8). Alle bedienaars by ons takkantore en ons wêreldhoofkwartier, insluitende diegene wat die Bestuursliggaam van Jehovah se Getuies uitmaak, is lede van ’n godsdiensorde en word nie ’n salaris betaal nie.

Bydraes word ook vir noodleniging gebruik. Die vroeë Christene het met graagte ’n bydrae gegee aan slagoffers van teëspoed (Romeine 15:26). Net so help ons diegene wat in nood verkeer deur hulle huise en plekke van aanbidding te herbou en deur kos, klere en mediese behandeling te voorsien.