“Die werk is groot”

DIT is tyd vir ’n baie belangrike vergadering in Jerusalem. Koning Dawid het al sy prinse, hofbeamptes en sterk manne bymekaargeroep. Hulle is baie verheug om ’n spesiale aankondiging te hoor. Jehovah het Dawid se seun Salomo die opdrag gegee om ’n gebou op te rig wat gewy sal word aan die aanbidding van die ware God. Israel se bejaarde koning het die bouplanne deur inspirasie ontvang en het dit vir Salomo gegee. “Die werk is groot”, sê Dawid, “want die [tempel] is nie vir ’n mens nie, maar vir Jehovah God.”—1 Kron. 28:1, 2, 6, 11, 12; 29:1.

Dan vra Dawid hierdie vraag: “Wie bied hom vrywillig aan om vandag sy hand met ’n geskenk vir Jehovah te vul?” (1 Kron. 29:5). Hoe sou jy gereageer het as jy daar was? Sou jy gevoel het dat jy hierdie groot werk wil ondersteun? Die Israeliete het tot aksie oorgegaan. Hulle “was bly omdat hulle vrywillige gawes gegee het, want hulle het met ’n volkome hart vrywillige gawes aan Jehovah gegee”.—1 Kron. 29:9.

Eeue later het Jehovah iets opgerig wat selfs wonderliker as die tempel is. Hy het die groot geestelike tempel opgerig, die reëling wat dit vir mense moontlik maak om hom in aanbidding te nader op grond van Jesus se offerande (Heb. 9:11, 12). Hoe help Jehovah mense vandag om met hom versoen te word? Deur middel van ons dissipelmaakwerk (Matt. 28:19, 20). As gevolg van hierdie werk word daar elke jaar miljoene Bybelstudies gehou, duisende dissipels gedoop en honderde nuwe gemeentes gestig.

Hierdie vermeerdering lei daartoe dat meer Bybellektuur gedruk moet word, meer Koninkryksale gebou en onderhou moet word en dat plekke verkry moet word waar byeenkomste gehou kan word. Stem jy nie saam dat dit ’n groot en lonende werk is om die goeie nuus te verkondig nie?—Matt. 24:14.

Liefde vir God en naaste en die dringendheid van die Koninkrykspredikingswerk beweeg God se volk om hulle hand “met ’n geskenk vir Jehovah te vul” deur vrywillige bydraes te maak. Hoe wonderlik is dit tog om ‘Jehovah met ons waardevolle dinge te eer’ en te sien dat sulke bydraes getrou en verstandig gebruik word om die grootste werk in die mensegeskiedenis te doen!—Spr. 3:9.

Hoe party besluit om vir die wêreldwye werk by te dra

Daar is vandag baie wat “iets opsysit”, of ’n bedrag begroot, en dit in die gemeente se bydraebussie gooi wat “Wêreldwye werk” gemerk is (1 Kor. 16:2). Elke maand stuur gemeentes hierdie bydraes na die kantoor van Jehovah se Getuies wat oor hulle land toesig hou. Jy kan ook bydraes regstreeks stuur aan ’n regsentiteit wat deur Jehovah se Getuies in jou land gebruik word. As jy wil uitvind wat die naam is van die regsentiteit wat in jou land gebruik word, moet jy asseblief in verbinding tree met die takkantoor. Die adres van die takkantoor kan gevind word op www.pr2711.com. Bydraes wat jy regstreeks kan stuur, is:

REGSTREEKSE SKENKINGS

Skenkings per elektroniese bankoorplasing, debietkaart, kredietkaart of selfoon. In party lande kan skenkings ook op jw.org of op ’n ander genoemde webwerf gemaak word.
Skenkings van kontant, juweliersware of ander waardevolle persoonlike eiendom. Sluit ’n brief in wat sê dat die kontant of die item ’n regstreekse skenking is.

BEPLANDE SKENKINGS

Benewens die skenking van geld en waardevolle persoonlike eiendom is daar ander maniere waarop ’n mens kan gee om Koninkryksdiens in alle wêrelddele te bevorder. Dit word hieronder uiteengesit. Ongeag hoe jy wil gee, tree asseblief eers in verbinding met die takkantoor wat oor jou land toesig hou om uit te vind hoe jy in jou land ’n skenking kan maak. Aangesien wetlike vereistes en belastingwette nie oral dieselfde is nie, is dit belangrik om gekwalifiseerde belastingkonsultante en regsadviseurs te raadpleeg voordat jy besluit wat die beste manier is om ’n skenking te maak.

Versekering: ’n Regsentiteit wat deur Jehovah se Getuies gebruik word, kan as die begunstigde van ’n lewensversekeringspolis, ’n aftreeannuïteit of pensioenskema benoem word.

Bankrekeninge: Bankrekeninge, depositosertifikate of persoonlike aftreerekeninge kan in trust gehou word of kan by afsterwe betaalbaar gemaak word aan ’n regsentiteit wat deur Jehovah se Getuies gebruik word, in ooreenstemming met plaaslike bankvereistes.

Aandele en obligasies: Aandele en obligasies kan as ’n regstreekse skenking gegee word aan ’n regsentiteit wat deur Jehovah se Getuies gebruik word. Of ’n geskrewe ooreenkoms kan bepaal dat dit by afsterwe oorgedra word.

Vaste eiendom: Tree asseblief eers met die takkantoor in verbinding as jy vaste eiendom wil skenk. Die takkantoor sal vasstel of die vaste eiendom gebruik kan word en of dit beter sal wees om dit te verkoop en die geld vir die wêreldwye werk te gebruik.

Testamente en trusts: Eiendom of geld kan deur middel van ’n wettige testament bemaak word aan ’n regsentiteit wat deur Jehovah se Getuies gebruik word, of hierdie regsentiteit kan as die begunstigde van ’n trustooreenkoms benoem word. Hierdie reëling kan sekere belastingvoordele inhou.

Die regsentiteit wat in jou land deur Jehovah se Getuies gebruik word, kan as die begunstigde in ’n testament of trust benoem word. Dit moenie as die eksekuteur, beredderaar of trustee van jou boedel benoem word nie.

As jy meer inligting wil hê, kan jy klik op die skakel “Maak ’n bydrae vir ons wêreldwye werk” onderaan die tuisblad op jw.org/af of jy kan met die plaaslike takkantoor van Jehovah se Getuies in verbinding tree.