Beoefen geloof—Neem wyse besluite!

1. Wat het veroorsaak dat Kain ’n verkeerde besluit geneem het, en wat was die gevolg?

KAIN moes ’n belangrike besluit neem: Sou hy sy sondige emosies beheers of sou hy toelaat dat sy emosies sy dade beheers? Wat hy ook al sou besluit, hy sou vir die res van sy lewe die gevolge daarvan dra. Jy weet wat Kain besluit het; hy het nie ’n goeie keuse gemaak nie. Sy besluit en sy optrede het sy getroue broer Abel se lewe gekos. En Kain se besluit het sy verhouding met sy Skepper benadeel.—Gen. 4:3-16.

2. Waarom is dit belangrik om wyse besluite te neem?

² Ons moet ook besluite neem. Nie elke besluit is ’n saak van lewe of dood nie. Maar baie van ons besluite kan ’n groot invloed op ons lewe hê. Die vermoë om goeie besluite te neem, kan ons help om minder probleme te hê en ’n relatief vreedsame lewe te lei. Slegte besluite kan lei tot chaos, geskille en teleurstellings.—Spr. 14:8.

3. (a) Waarin moet ons geloof hê as ons wyse besluite wil neem? (b) Watter vrae sal ons bespreek?

³ Wat sal ons help om wyse besluite te neem? Ons het beslis geloof in God nodig en moet vertrou dat hy die begeerte en die vermoë het om ons te help om wys te wees. Ons het ook geloof nodig in Jehovah se Woord en die manier waarop hy dinge doen. Ons moet God se geïnspireerde raad vertrou. (Lees Jakobus 1:5-8.) Terwyl ons nader aan hom kom en lief word vir sy Woord, begin ons sy oordeel vertrou. Ons kweek dan ook die gewoonte aan om God se Woord te raadpleeg voordat ons besluite neem. Maar hoe kan ons ons vermoë verbeter om goeie besluite te neem? En beteken die bereidwilligheid om ’n besluit te neem dat ons by daardie besluit moet bly, kom wat wil?

ONS MOET BESLUITE NEEM

4. Watter keuse moes Adam maak, en met watter gevolge?

⁴ Van die begin van die mens se bestaan moes mans en vroue belangrike besluite neem. Adam moes besluit of hy na sy Skepper of na Eva sal luister. Hy was bereid om ’n besluit te neem, maar wat dink jy van sy besluit? Sy vrou is mislei en het hom beïnvloed om ’n baie slegte keuse te maak, wat veroorsaak het dat hy sy paradystuiste verloor het en uiteindelik ook sy lewe. Dit was maar net die begin. Ons dra nog steeds die gevolge van Adam se slegte besluit.

5. Hoe moet ons die verantwoordelikheid om besluite te neem, beskou?

⁵ Party dink dalk dat die lewe aangenamer sal wees as ons nie besluite hoef te neem nie. Voel jy so? Onthou, Jehovah het mense nie geskep om robotte te wees wat nie kan dink of keuses kan maak nie. En die Bybel leer ons om wyse besluite te neem. Hoewel Jehovah wil hê dat ons besluite moet neem, is dit nie tot ons nadeel nie. Kom ons kyk na ’n paar bewyse hiervan.

6, 7. Watter keuse het die eertydse Israeliete gehad, en waarom was dit vir hulle moeilik om ’n wyse besluit te neem? (Sien prent aan begin van artikel.)

⁶ Toe die Israeliete in die Beloofde Land was, moes hulle ’n eenvoudige maar lewensbelangrike besluit neem: Aanbid Jehovah of dien ander gode. (Lees Josua 24:15.) Dit het dalk na ’n eenvoudige besluit gelyk. Maar hulle besluit kon hulle lewe of dood beteken. Gedurende die tyd van die rigters het die Israeliete keer op keer slegte besluite geneem. Hulle het hulle rug op Jehovah gekeer en valse gode aanbid (Rigt. 2:3, 11-23). In die tyd van die profeet Elia was God se volk verplig om ’n besluit te neem. Hulle keuse was: Dien Jehovah of dien die valse god Baäl (1 Kon. 18:21). Elia het die volk bestraf omdat hulle besluiteloos was. Jy dink dalk dat dit ’n eenvoudige keuse was, want dit is altyd wys en voordelig om Jehovah te dien. Trouens, geen verstandige persoon sal Baäl wil dien nie. Tog kon die Israeliete nie besluit nie; hulle het “op twee verskillende gedagtes [gehink]”. Elia het hulle wyslik aangespoor om die ware God, Jehovah, te aanbid.

⁷ Waarom was dit so moeilik vir daardie Israeliete om ’n wyse besluit te neem? Eerstens, hulle het nie meer geloof in Jehovah gehad nie en het geweier om na sy stem te luister. Hulle het nie juiste kennis of goddelike wysheid gehad nie. Hulle het ook nie op Jehovah vertrou nie. As hulle volgens juiste kennis opgetree het, sou dit hulle gehelp het om wyse besluite te neem (Ps. 25:12). Tweedens, hulle het toegelaat dat ander hulle beïnvloed of selfs hulle besluite vir hulle neem. Die mense in die land, wat nie aanbidders van Jehovah was nie, het die Israeliete se denke beïnvloed en hulle sover gekry om valse gode te aanbid. Jehovah het hulle jare vroeër gewaarsku dat dit kan gebeur.—Eks. 23:2.

MOET ANDER VIR ONS BESLUITE NEEM?

8. Watter belangrike les leer ons uit Israel se geskiedenis?

⁸ Die voorbeelde wat pas genoem is, dra ’n duidelike les aan ons oor. Elkeen van ons het die verantwoordelikheid om besluite te neem. Kennis van die Skrif sal ons help om wyse besluite te neem. Galasiërs 6:5 sê: “Elkeen sal sy eie vrag dra.” Ons moenie vir iemand anders die verantwoordelikheid gee om besluite vir ons te neem nie. Ons moet eerder self leer wat reg in God se oë is en kies om dit te doen.

9. Waarom kan dit gevaarlik wees as ons toelaat dat ander vir ons besluite neem?

⁹ Wat kan veroorsaak dat ons toelaat dat ander vir ons besluite neem? Groepsdruk kan ons beïnvloed om ’n slegte besluit te neem (Spr. 1:10, 15). Maar dit maak nie saak hoe baie druk ander op ons probeer uitoefen nie, dit is ons verantwoordelikheid om ons Bybelopgeleide gewete te volg. As ons toelaat dat ander ons besluite neem, besluit ons in werklikheid om met hulle ‘saam te gaan’. So ’n besluit kan rampspoedige gevolge hê.

10. Waaroor moes Paulus die Galasiërs waarsku?

¹⁰ Die apostel Paulus het die Galasiërs gewaarsku om nie toe te laat dat ander vir hulle persoonlike besluite neem nie. (Lees Galasiërs 4:17.) Sommige in die gemeente wou persoonlike besluite vir ander neem om hulle van die apostels te vervreem. Waarom? Daardie selfsugtige persone het vernaamheid gesoek. Hulle optrede was onvanpas, want hulle het geen respek getoon vir hulle mede-Christene se reg om hulle eie besluite te neem nie.

11. Hoe kan ons ander help om persoonlike besluite te neem?

¹¹ Paulus het ’n goeie voorbeeld gestel deur respek te toon vir sy broers se wilsvryheid en hulle reg om besluite te neem. (Lees 2 Korintiërs 1:24.) Ouer manne moet sy voorbeeld volg wanneer hulle raad gee oor sake waaroor persone self moet besluit. Hulle wys met graagte vir hulle broers en susters wat die Bybel oor die saak sê. Die ouer manne sal egter nie vir hulle besluit nie. Elke broer en suster moet self ’n besluit neem. Dit is logies, aangesien daardie persone die gevolge van hulle besluit sal dra. Hier is ’n belangrike les: Ons kan belangstelling toon in ander en hulle aandag vestig op skriftuurlike beginsels of raad. Maar hulle het die reg en verantwoordelikheid om hulle eie besluite te neem. Wanneer hulle wyse besluite neem, vind hulle daarby baat. Dit is duidelik dat ons nooit moet dink dat ons die reg het om vir ander broers en susters besluite te neem nie.

BESLUITE EN EMOSIES

12, 13. Waarom is dit gevaarlik om besluite te neem wanneer ons kwaad of ontmoedig is?

¹² ’n Gewilde gesegde is: Volg jou hart. Maar dit kan gevaarlik wees. En in sekere sin is dit onskriftuurlik. Die Bybel waarsku ons dat ons nie moet toelaat dat ons onvolmaakte hart of gevoelens ons lei wanneer ons besluite neem nie (Spr. 28:26). En Bybelverslae toon wat die tragiese gevolge is wanneer ’n persoon sy hart volg. Die probleem is dat die hart van onvolmaakte mense bedrieglik en desperaat is (Jer. 3:17; 13:10; 17:9; 1 Kon. 11:9). Wat kan die gevolge wees as ons eenvoudig ons hart volg?

¹³ ’n Christen se hart is belangrik, want ons word beveel om Jehovah lief te hê met ons hele hart en om ons naaste lief te hê soos onsself (Matt. 22:37-39). Maar die tekste wat in die vorige paragraaf aangegee is, beklemtoon hoe gevaarlik dit is as ons denke en dade deur ons emosies beheers word. Wat kan byvoorbeeld gebeur as ons besluite neem wanneer ons kwaad is? Jy weet dalk wat die antwoord is as jy dit al in die verlede gedoen het (Spr. 14:17; 29:22). Of sal ons verstandige besluite kan neem wanneer ons ontmoedig is? (Num. 32:6-12; Spr. 24:10). Hou in gedagte dat God se Woord toon dat dit wys is om “’n slaaf van God se wet” te wees (Rom. 7:25). Dit is duidelik dat ons emosies ons onverstandig kan laat optree as ons ons daardeur laat lei wanneer ons belangrike besluite neem.

WANNEER JY JOU BESLUIT KAN VERANDER

14. Hoe weet ons dat dit gepas is om ons besluite soms te verander?

¹⁴ Ons moet wyse besluite neem. Maar dit beteken nie dat ons nooit van besluit kan verander nie. Soms is dit goed om ’n besluit te heroorweeg en dit miskien te verander. Jehovah het die volmaakte voorbeeld vir ons gestel. Kyk na wat hy in Jona se dag vir die Nineviete gedoen het. “Die ware God het hulle werke gesien, dat hulle hulle van hulle slegte weg afgekeer het; en toe het die ware God spyt gevoel oor die rampspoed wat hy gesê het hy oor hulle sou bring; en hy het dit nie gebring nie” (Jona 3:10). Nadat Jehovah gesien het dat die Nineviete berouvol was, het hy sy besluit verander. Sodoende het hy redelikheid, nederigheid en medelye aan die dag gelê. Wat meer is, God is nie soos mense wat soms in ’n oomblik van woede besluit hoe om op te tree nie.

15. Waarom sal ons dalk van besluit verander?

¹⁵ Daar is dalk tye wanneer dit goed sal wees om ’n keuse of besluit te heroorweeg. Dit is dalk nodig wanneer omstandighede verander. Jehovah het soms sy besluit verander wanneer omstandighede verander het (1 Kon. 21:20, 21, 27-29; 2 Kon. 20:1-5). Of nuwe inligting kan ons dalk ’n geldige rede gee om van besluit te verander. Koning Dawid is verkeerde inligting gegee oor Saul se kleinseun Mefiboset. Toe Dawid later die korrekte inligting ontvang het, het hy sy besluit verander (2 Sam. 16:3, 4; 19:24-29). Soms is dit vir ons ook nodig om dit te doen.

16. (a) Wat kan ons help om wyse besluite te neem? (b) Waarom moet ons besluite heroorweeg, en wat moet ons bereid wees om te doen?

¹⁶ God se Woord sê dat ons nie oorhaastig moet wees wanneer ons belangrike besluite neem nie (Spr. 21:5). Wanneer ons al die feite goed oorweeg, sal ons waarskynlik ’n wyse besluit neem (1 Tess. 5:21). Voordat ’n gesinshoof ’n besluit neem, moet hy die tyd neem om navorsing in die Skrif en Christelike publikasies te doen. Hy moet ook sy gesin vra hoe hulle daaroor voel. Onthou dat God vir Abraham gesê het om na sy vrou te luister (Gen. 21:9-12). Ouer manne moet ook tyd neem om navorsing te doen. En as hulle redelik en beskeie is, sal hulle nie bang wees dat hulle ander se respek sal verloor as hulle ’n besluit moet heroorweeg omdat nuwe inligting onder hulle aandag gekom het nie. Hulle moet bereid wees om hulle denke en besluite aan te pas wanneer dit nodig is, en dit sal goed wees as ons almal hierdie voorbeeld volg. Dit kan vrede en orde in die gemeente bevorder.—Hand. 6:1-4.

VOER JOU BESLUITE DEUR

17. Wat kan ons help om goeie besluite te neem?

¹⁷ Sommige besluite is belangriker as ander. Wanneer ’n mens ’n belangrike besluit moet neem, moet jy goed daaroor nadink en dit biddend oorweeg, en dit kan tyd in beslag neem. Sommige Christene moet besluit of hulle wil trou en met wie hulle wil trou. Nog ’n belangrike besluit, wat baie seëninge kan inhou, is hoe en wanneer om die voltydse diens te betree. Wanneer dit by sulke besluite kom, moet ons die volle vertroue hê dat Jehovah wyse raad kan en sal voorsien (Spr. 1:5). Dit is dus belangrik dat ons die Bybel raadpleeg, waar ons die beste raad sal kry, en dat ons bid vir Jehovah se leiding. En hou in gedagte dat Jehovah ons die eienskappe kan gee om besluite te neem wat in ooreenstemming met sy wil is. Wanneer ons belangrike besluite moet neem, moet ons ons altyd afvra: ‘Sal hierdie besluit wys dat ek lief is vir Jehovah? Sal dit vreugde en vrede vir my familie bring? En sal dit toon dat ek geduldig en liefdevol is?

18. Waarom verwag Jehovah dat ons ons eie besluite moet neem?

¹⁸ Jehovah dwing ons nie om hom lief te hê en te dien nie. Dit is ons keuse. Hy het vir ons wilsvryheid gegee en respekteer ons verantwoordelikheid en reg om te kies of ons hom wil dien (Jos. 24:15; Pred. 5:4). Maar hy verwag dat ons besluite wat in ooreenstemming met sy Woord is, moet deurvoer. As ons vertroue het in die manier waarop Jehovah dinge doen en die beginsels wat hy ons gegee het, kan ons wyse besluite neem en toon dat ons bestendig is in al ons weë.—Jak. 1:5-8; 4:8.