Berei studente voor om aan die bediening deel te neem
1 Gedurende die afgelope diensjaar is gemiddeld 37 641 tuisbybelstudies elke maand in Suid-Afrika gehou. Baie nuwelinge maak geestelik vordering deur kennis van Jehovah in te neem en met die organisasie te assosieer. Hulle bring die nodige veranderings in hulle lewens aan, en ons wil uiteindelik hê dat hulle hul geloof in die openbaar bely deur saam met ons aan die predikings- en dissipelmaakwerk deel te neem.—Rom. 10:10.
2 Wanneer jy ’n Bybelstudie begin, kan jy die student al begin aanmoedig om met ander te praat oor wat hy leer. Stel voor dat hy met familie, bure, medewerkers en ander op ’n informele grondslag praat. Namate jy die waarheid in sy hart en verstand inskerp, moet hy beweeg word om dit te doen. Vestig die aandag op die belangrikheid van die predikings- en dissipelmaakwerk wat deur Jesus en sy dissipels beklemtoon is (Matt. 24:14; 28:19). Vertel positiewe velddiensondervindinge wat jy en ander gehad het, asook die wat in die Yearbook en ander publikasies van die Genootskap opgeteken is.
BEPAAL OF STUDENT AAN VEREISTES VOLDOEN
3 Nooi die student, op die gepaste tyd en in ooreenstemming met sy vooruitgang, om aan die georganiseerde velddiens van die gemeente deel te neem. Onthou dat jy as studiehouer die verantwoordelikheid het om te bepaal of die student aan die vereistes voldoen voordat jy hom uitnooi om jou in die velddiens te vergesel. Hy moet alreeds sy lewe in ooreenstemming met Jehovah se regverdige standaarde gebring het. Faktore wat oorweeg moet word, word op bladsye 98, 99 van die Ons bediening-boek uiteengesit.
4 Dit is nie nodig om jou neus in die student se persoonlike lewe te steek deur vrae te stel wat hom in die verleentheid stel nie. Maar soos jy die student geleidelik leer ken, kan jy sien of hy lewe volgens die informasie wat hy geleer het. As daar vrae oor sekere aspekte van sy lewe is, kan jy die student eenvoudig uitnooi om gepaste Bybeltekste te lees en te sê hoe hy die toepassing of betekenis verstaan. Dit sal jou dikwels help om te sien of hy genoeg kennis van die waarheid het en verstaan wat vereis word van iemand wat aan die bediening deelneem. Wanneer jy oortuig is dat hy opreg begeer om homself met die organisasie van Jehovah se Getuies te identifiseer, en dat hy aan die vereistes voldoen, kan jy hom uitnooi om jou in die veldbediening te vergesel. Berei saam voor vir die veldbediening, en help die student progressief om ’n aandeel daarin te hê.
HULP VAN OUERE MANNE
5 Wanneer ’n nuweling sy eerste velddiensrapport ingee, moet bykomende stappe gedoen word om seker te maak dat die individu aan die vereistes voldoen om as ’n verkondiger gereken en sodoende as ’n goedgekeurde metgesel erken te word. Na aanleiding van die Student se eerste velddiensrapport sal die sekretaris of ’n ander lid van die Gemeentelike Dienskomitee die student se vooruitgang bespreek met die verkondiger wat met hom studeer. Daarna sal dit goed wees as die verkondiger teenwoordig is wanneer die ouere man met die individu praat wat sy eerste velddiensrapport ingegee het. Nadat die ouere manne die nuweling geprys het vir die vooruitgang wat hy maak, sal hulle vriendelik verduidelik wat alles daarby betrokke is om as ’n verkondiger getel te word. As die student aan die vereistes vir ’n goedgekeurde metgesel voldoen, sal hy ingelig word dat ’n gemeentelike verkondigerverslagkaart in sy naam uitgemaak en in die gemeente se lêer geplaas sal word.—Kyk omAF bl. 105, 106.
6 Wanneer ons leerstellige waarhede met Bybelstudente bestudeer en hulle na die organisasie rig, moet ons hulle ook aanmoedig en voorberei om die goeie nuus aan ander te verkondig. Mettertyd sal hulle, met Jehovah se seën, aan die vereistes voldoen om gereelde verkondigers van die goeie nuus te word.