Ondersteun middeweekse diensreëlings

1 In sy profesie oor die tyd van die einde het Jesus gesê: “Die evangelie moet eers aan al die nasies verkondig word” (Mark. 13:10). In gehoorsaamheid aan hierdie opdrag is Jehovah se Getuies wêreldwyd, nie net gedurende naweke nie maar ook die hele week deur, bedrywig in die bediening. Plaaslike ouere manne word aangespoor om gepaste velddiensvergaderinge gedurende die week te reël. Kan jy saam met ander in julle gemeente aan die middeweekse velddiens deelneem?

BEHOORLIKE REËLINGS IS NODIG

2 Die diensopsiener moet die leiding gee deur spesifieke reëlings vir middeweekse diens te tref. Die plek, dae en tye moet vir die meerderheid verkondigers gerieflik wees. Velddiensvergaderinge word deur die gemeente gereël en sal gewoonlik deur ouere manne, bedieningsknegte of ander bekwame gedoopte broers waargeneem word. As sulke bekwame broers nie beskikbaar is nie, kan bekwame, gedoopte susters aangewys word. (Kyk Georganiseer om ons bediening te vervul, bladsy 77, paragraaf 3.) So ’n suster moet ’n hoofbedekking dra en sal gewoonlik sit wanneer die vergadering vir velddiens gehou word.

3 Diegene wat aangewys word om hierdie vergaderinge te hou, moet goed voorberei wees. Die dagteks kan bespreek word, veral as dit gepas vir velddiens is. Gedagtes uit Velddiensvergaderinge moet gebruik word. Gebied en groepe moet behoorlik toegewys word. Ons moet veral moeite doen om nuwe verkondigers te help wat aan die bediening deelneem.

ONDERSTEUN PLAASLIKE REËLINGS

4 Diegene wat middeweekse velddiensreëlings ondersteun, het talle geleenthede om huisbewoners te ontmoet wat nie naweke tuis is nie. Jy kan moontlik saam met ander verkondigers en pioniers werk wat gedurende die week aan die velddiens deelneem. Talle susters met kinders in die skool waardeer hierdie reëlings. Sommige verkondigers met ongelowige maats het reëlings vir velddiens op weeksdae baie nuttig gevind. Jongmense wat skoolvakansie het, kan middeweekse diensreëlings ondersteun. Pioniers en ervare verkondigers is dikwels gedurende die week beskikbaar om nuwe en onervare persone in die verskillende aspekte van die bediening te vergesel.

5 Almal word aangespoor om betyds te wees vir die besprekings en die gebed. Dit sal jou help om ywerig aan die veldbediening deel te neem en na waardige persone in julle toegewese gebied te soek.​—Matt. 10:11.