Onderrig sonder ophou
1 Die Bybel laat ons nie in twyfel oor die soort gebied wat die apostels en vroeë Christendissipels gehad het nie. Kort na Jesus se dood het die owerheid hulle gewaarsku om nie oor Jesus “iets te spreek of te onderrig” nie (Hand. 4:18, NW). Waarom nie? Die verstommende welslae wat hulle behaal het, was een rede. Duisende het gelowiges geword, soos Handelinge 4:4 sê: “Baie van die wat die woord gehoor het, het geglo; en die getal van die manne het omtrent vyfduisend geword.”
2 Omdat ons ook sonder ophou onderrig, word honderdduisende, ja, miljoene in ons dag gelowiges. Gedurende Oktober het ons die voorreg om intekeninge op Ontwaak! en Die Wagtoring aan te bied. Ontwaak! het ongetwyfeld ’n belangrike rol gespeel om mense bewus te maak van hul geestelike behoefte. Dit het talle gelukkig gemaak, aangesien hulle geleer het om Jehovah se wil te doen.—Vergelyk Mattheüs 5:3, NW.
BEREIK ALMAL
3 Al het ons dalk gebied wat dikwels gewerk word, kan dit steeds moontlik wees om met party te praat wat min geleenthede gehad het om die goeie nuus te hoor. Hoe so? In gebied waar mense nie in die huis-tot-huisbediening bereik kan word nie, kan ons gerus die telefoon gebruik om te getuig. Of ons kan ’n spesiale poging aanwend om met die man in die huis te praat wanneer ons in die aand of oor die naweek getuig. As ons goeie huis-tot-huisverslae hou, kan ons ander familielede bereik, soos ’n ouma, ’n neef of niggie wat skoolgaan of ’n skoonsuster wat gedurende die week werk. Die ekstra poging wat ons aanwend om met elke familielid te gesels, werp dalk vrugte af.
4 Daar is talle goeie maniere om intekeninge gedurende die maand te verkry. Een manier is om ons Bybelstudente en ander belangstellendes te vra of hulle wil inteken. Miskien het een van ons Bybelstudente reeds op een van die tydskrifte ingeteken. Stel gerus voor dat hy albei ontvang. Gesinne kan aangemoedig word om vir elke lid op Die Wagtoring in te teken sodat hulle vir die Wagtoring-studie kan voorberei. Nog ’n wenk is om tydskrifroetes te begin en dan intekeninge aan te bied by diegene wat buitengewone belangstelling toon. Ons moet ook aanbied om die Bybel saam met diegene te studeer wat opregte belangstelling toon.
BREI JOU BEDIENING UIT
5 Dit is nog nie te laat om ’n aansoek om hulppionierdiens vir Oktober in te vul nie. Is julle van plan om as gesin gedurende die wêreldse vakansiedae in Desember aan die pionierdiens deel te neem? Dit is nou die tyd om te begin dink aan hoe julle dit kan doen. Kan julle saamwerk sodat een of meer gesinslede hulppionierdiens kan doen as die hele gesin dit nie kan doen nie? Sal dit andersins moontlik wees om ten minste meer tyd aan die bediening te bestee om die Ontwaak! en Die Wagtoring aan te bied?
6 Ons waardeer die geestelike voordele en seëninge wat ons uit Ontwaak! en Die Wagtoring ontvang het. Ons weet dat opregtes van hart in ons gebied ook grootliks voordeel uit die tydskrifte sal trek as hulle dit gereeld lees. Laat ons gedurende Oktober aanhou om met die puik instrumente wat Jehovah aan ons beskikbaar gestel het te onderrig. As ons dit doen, sal ons Jehovah se seën maai en ander tot seën strek.—Gal. 6:9.