Begin en eindig vergaderinge betyds
1 Alle gemeentelike vergaderinge, velddiensvergaderinge inkluis, moet betyds begin en eindig. Waarom? As ons betyds is, is dit ’n teken van ordelikheid en toon dit bedagsaamheid teenoor almal wat vergaderinge bywoon en daaraan deelneem (Pred. 3:17b; 1 Kor. 14:33). Ons kan ons besorgdheid toon deur by die volgende riglyne te bly om te verseker dat vergaderinge betyds begin en eindig.
2 Ons moet altyd daarna streef om vroeg genoeg by vergaderinge te wees sodat ons met ander kan gesels, na verantwoordelikhede kan omsien en aan die openingslied en -gebed deel kan hê. Daar word gewoonlik vyf minute vir sang en gebed toegelaat. Diegene wat die gemeente in gebed verteenwoordig, moet die doel van die vergadering in gedagte hou en dit in hulle woorde in die openings- en slotgebed laat blyk. Sulke gebede hoef nie lank te wees nie.
3 Openbare vergadering: Openbare toesprake word tot 45 minute beperk. As die tydgrens oorskry word, sal dit die daaropvolgende Wagtoring-studie beïnvloed. Die twee vergaderinge, met inbegrip van die liedere en gebede, moet binne twee uur afgehandel word. Openbare sprekers moet by die tydreëling hou soos op die Genootskap se skets aangedui, en hulle moenie ander sake, soos groete, by die toespraak insluit nie. As ’n spreker nie weet waar die Koninkryksaal is nie, moet hy die gasgemeente vra hoe om daar te kom en hoe lank dit ongeveer neem om daarheen te reis.
4 “Wagtoring”-studie: Een uur word toegelaat vir die Wagtoring-studie, waartydens al die paragrawe gelees word en die hersieningsvrae bespreek word. Die studiehouer se kort, toepaslike inleidingskommentare moet belangstelling wek en die les inlei. Hy moenie baie kommentare en opmerkings tydens die studie maak nie. As die studiehouer die materiaal tydgewys indeel, sal dit hom help om nie te veel tyd aan die eerste helfte van die les te bestee en dan deur die laaste helfte te jaag nie.
5 Teokratiese Bedieningskool: Hierdie vergadering duur 45 minute. Hoewel die instruksietoespraak en glanspunte uit die Skrifgedeelte nie onderbreek word wanneer die tyd om is nie, moet die broers wat hierdie dele behartig binne hulle tydgrens bly. As hulle dit nie doen nie, moet hulle privaat raad gegee word. Die skoolopsiener se raad en opmerkings moet ook nie die bepaalde tyd oorskry nie. Tyd kan bespaar word as al die studente naby die verhoog sit en as elkeen sy toespraak onmiddellik afsluit wanneer die tyd om is.—Sien Rooster vir Teokratiese Bedieningskool vir 1991.
6 Diensvergadering: Hierdie vergadering duur ook 45 minute. Die hele program, met inbegrip van die Teokratiese Bedieningskool en die liedere en gebede, moenie langer as een uur en vyf-en-veertig minute duur nie. Broers met dele op die Diensvergadering moet by die bepaalde tyd hou. Dele wat met vrae en antwoorde gedek moet word, moet net kortliks ingelei word. Dit is nie nodig om uitgebreide inligting ter inleiding by te voeg nie. Demonstrasies moet goed geoefen word, en die deelnemers moet gereed en op hul plek wees sodat die tyd wat vir die deel toegelaat word goed benut word.
7 Gemeentelike Boekstudie: Hierdie vergadering duur saam met die openings- en slotgebed een uur. Al die paragrawe moet gelees word. Om seker te maak dat die vergadering betyds eindig, moet die studiehouer die materiaal só verdeel dat hy nie deur die laaste deel van die les moet jaag of te vroeg klaarkry nie. Die studiehouer moet let op hoeveel tyd aan elke paragraaf bestee word. Die hoofgedagtes moet duidelik verstaan word. Die studiehouer se onderrigkuns sal hom in staat stel om enige uitdaging in hierdie verband die hoof te bied.—Tit. 1:9.
8 Velddiensvergaderinge: Saam met die gebiedstoewysings en slotgebed moet dit nie langer as 15 minute duur nie. Diegene wat in die diens uitgaan, wil so gou moontlik met hulle velddiensbedrywigheid begin. Die broer wat die velddiensreëling behartig, moet die vergadering op die vasgestelde tyd begin en nie wag totdat daar meer mense is nie. En wanneer die gebiedstoewysings eers gemaak is en die vergadering met gebed afgesluit is, kan die groep onmiddellik na die veld vertrek. Dit is veral belangrik vir pioniers wat daar teenwoordig is.
9 Ons kan almal baat vind by vergaderinge wat betyds begin en eindig. Dit word veral waardeer deur diegene met ongelowige huweliksmaats wat van hulle verwag dat hulle ’n sekere tyd by die huis moet wees. Wanneer diegene in verdeelde gesinne reëlings tref vir vervoer na en van die vergaderinge of wanneer hulle sê hoe laat hulle tuis sal wees, moet hulle die tyd in ag neem wat hulle voor en na vergaderinge vir assosiasie, die koop van lektuur, ensovoorts nodig het. As vergaderinge betyds begin en eindig, sal dit ongetwyfeld daartoe bydra dat “alles welvoeglik en ordelik toegaan”.—1 Kor. 14:40.