Vraebus
● Waarom is dit verkieslik dat verkondigers met die gemeente assosieer in wie se gebied hulle woon?
Die Vraebus in Ons Koninkryksbediening vir November 1990 het hierdie vraag uitvoerig bespreek.
Ons wil ons waardering uitspreek vir die broers se positiewe reaksie op hierdie artikel. Verslae wat van ’n aantal kringopsieners ontvang is, toon dat heelparty ouere manne en bedieningsknegte die leiding geneem het om met die gemeente te assosieer in wie se gebied hulle woon. Die meeste verkondigers het hulle goeie voorbeeld gevolg. Die doel van hierdie artikel is dus net om al die broers te herinner aan die riglyne wat die Genootskap in hierdie verband gegee het.
Dit is belangrik om dinge op ’n ordelike en teokratiese wyse te doen. Die apostel Paulus het geskryf: “Want God is nie ’n God van wanorde nie, maar van vrede. . . . Laat alles welvoeglik en ordelik toegaan.”—1 Kor. 14:33, 40.
Hoewel daar uitsonderings kan wees vanweë vervoerprobleme, roosters vir sekulêre werk of die behoefte aan die hulp van opsieners is dit gewoonlik die beste om na die gemeente te gaan in wie se gebied ons woon. Dit maak die velddiens geriefliker, en ons hoef nie so ver te reis om saam met ’n groep buite ons gebied te werk nie. Dit stel ons in ’n beter posisie om saam met ander in ons gemeente te werk en om belangstellendes na die vergaderinge te neem wat vir hulle die gerieflikste is. En ons is in noue verbinding met ander broers en susters in ons gebied wat ons kan help in geval van nood.
As ons die reëlings wat gemaak is, gehoorsaam, toon ons dat ons Koninkryksbelange eerste stel (Luk. 16:10). Wanneer ’n nuwe gemeente gestig word of Gemeentelike Boekstudies heringedeel word, sal ons dit moontlik verkies om by sekere vriende te bly. Maar as ons die nuwe reëling aanvaar, kan ons nuwe vriende maak en ons teokratiese omgang uitbrei. Dit is ook vir die ouere manne makliker om as herders na die kudde om te sien en die geestelike toestand van die gemeente te verbeter wanneer verkondigers in die gebied woon van die gemeente met wie hulle assosieer.