Teokratiese nuus

Hongkong: Hoewel Julie baie warm en bedompig was, het die broers ’n uitstekende aandeel in die velddiens gehad. Hulle het ’n nuwe hoogtepunt van 2305 verkondigers gehad, en 71 is gedoop.

Die Filippyne: Noodleniging word steeds voorsien om slagoffers van die vulkaniese uitbarsting van die berg Pinatubo te help. Swaar reëns en modderstrome, of lahars, het ernstige probleme vir broers veroorsaak wat nie voorheen deur die uitbarsting geraak is nie. Die broers waardeer die noodlenigingspogings, aangesien toestande in sommige gebiede in September erger was as toe die vulkaan uitgebars het.

Suid-Afrika: Nog vier Koninkryksale is gedurende Oktober en November toegewy. Ons verheug ons saam met die broers in Mothutlung naby Brits, Umgababa aan die Natalse Suidkus, Paballelo naby Upington en Knysna wat nou die atmosfeer van hulle eie Koninkryksale kan geniet.

◼ Streekboukomitees het die oprigting van Koninkryksale in Suid-Afrika versnel. Sommige projekte word nou binne ’n maand voltooi. Ons is verheug om te berig dat 25 Koninkryksale in 1991 voltooi is. Ons wil ons opregte dank uitspreek teenoor almal wat hulle tyd en geld vir hierdie goeie werk tot eer van Jehovah opgeoffer het. Kan meer van ons in 1992 ’n aandeel hierin hê?

◼ Dit was vir ons moontlik om 19 ton lektuur, voedsel en klere teen die einde van Augustus per vragmotor na Angola te neem. Hierdie voorrade is tot in Lubango geneem ten spyte van paaie wat in sekere dele in ’n slegte toestand is. Ons is ook bly om te berig dat die veld in Suid-Angola nou ’n gereelde voorraad tydskrifte ontvang.