Toon waardering vir God se huis
1 In Bybeltye het Jehovah sy volk beveel om gereeld by sy huis te vergader (Lev. 23:2). Hierdie vergaderinge het hulle gehelp om hulle aandag op God se woord gevestig te hou en het die geleentheid gebied vir bepeinsing, omgang en ’n bespreking van Jehovah se Wet. Hulle verstand is met God se gedagtes gevul, wat ryk geestelike seëninge meegebring het. Dit was waarlik gelukkige geleenthede. Die reëling het eenheid en rein aanbidding bevorder. Vergaderinge in God se huis is vandag net so belangrik.
2 Hoe kan ons toon dat ons vergaderinge waardeer? Party gemeentes rapporteer ’n swak vergaderingbywoning. Soms verhinder iemand se omstandighede hom om ’n vergadering by te woon. Maar het jy toegelaat dat betreklik klein probleempies inbreuk op jou gereelde vergaderingbywoning maak? Sommige besluit dalk om tuis te bly as hulle ’n ligte hoofpyn het of moeg is ná ’n besige dag. Ander het hulle verplig gevoel om ongelowige familielede te onthaal wat wou kuier. Party het selfs vergaderinge gemis om na ’n geliefkoosde TV-program of die een of ander sportgebeurtenis te kyk. Die mate van waardering wat in hierdie situasies aan die dag gelê word, verskil beslis van die opregte begeerte wat die seuns van Korag uitgespreek het: “My siel verlang, ja, smag na die voorhowe van [Jehovah].”—Ps. 84:3.
3 Hoewel daar ’n oorvloed geestelike voedsel by die vergaderinge voorsien word, sukkel sommige wat dit bywoon om aandag te skenk. Hulle vind miskien dat hulle dagdroom, oor die dag se probleme dink of selfs insluimer. Baie het gevind dat dit hulle help om wakker te bly en te konsentreer op wat gesê word as hulle kort aantekeninge maak. As aantekeninge gemaak word, prent dit ook die inligting op ons verstand in. Daarbenewens help voorbereiding dat ’n mens ten volle by die vergaderinge baat vind. As ons goed voorberei, sal ons “des te meer [kan] ag gee”.—Hebr. 2:1.
4 Kinders sowel as volwassenes moet die onderrigting inneem wat by die vergaderinge voorsien word. Dit wat die kinders leer, sal baie beperk wees as ouers speelgoed en inkleurboeke voorsien om hulle besig en stil te hou. Daar is ’n gebrek aan behoorlike dissipline wanneer kinders toegelaat word om te speel, te praat, te huil of ander dinge te doen wat diegene steur wat naby hulle sit. Gereelde en onnodige besoeke aan die ruskamer of om water te gaan drink tydens die vergadering word gewoonlik minder as die kind weet dat een van sy ouers hom altyd vergesel.
5 Stiptheid is belangrik: Soms sal onvermydelike omstandighede ons verhinder om betyds by die vergadering aan te kom, maar om gereeld laat vir die openingslied en -gebed te wees, toon ’n gebrek aan respek vir die heilige doel van die vergaderinge en ons verantwoordelikheid om nie ’n steurnis vir ander te wees nie. Onthou dat ons sang en gebed saam met ons broers by gemeentelike vergaderinge ’n deel van ons aanbidding is. As ons die gewoonte het om laat te wees, is dit gewoonlik weens swak organisasie of ’n versuim om vooruit te beplan. As ons stiptelik is, toon ons respek en waardering vir ons vergaderinge.
6 Namate die dag nader kom, kan dit net al hoe belangriker word om gereeld saam te vergader (Hebr. 10:24, 25). Laat ons ons waardering toon deur ons gereelde bywoning, voorbereiding, stiptheid, noukeurige aandag en deur dan die dinge wat ons leer toe te pas.