Sien jy net die uiterlike raak?
1 Wanneer ons in ons openbare bediening besig is, kan ons eerste indrukke van party mense ons huiwerig maak om hulle van die goeie nuus te vertel. Hoe sal jy byvoorbeeld reageer as ’n man met ’n wrede voorkoms jou altyd agterdogtig aankyk wanneer jy sy bure besoek wat belangstelling in die waarheid toon? ’n Pioniersuster wat hierdie ondervinding gehad het, het besluit om die man te nader en met hom te praat. Hy het haar onbeskof gegroet. Maar hy het verbasend genoeg na die Bybel se boodskap geluister en taamlik entoesiasties tot ’n studie ingestem. Omdat die suster hom nie na sy uiterlike geoordeel het nie, het dit die weg gebaan vir hierdie man en sy vrou om die waarheid te leer.
2 Die uiterlike van ’n jong man met lang hare het ’n ander suster aanvanklik skrikkerig laat voel, maar sy het volgehou om vir hom ’n kort getuienis te gee elke keer wanneer hy in die winkel ingekom het waar sy gewerk het. Haar pogings het vrugte afgewerp, en die jong man is nou ’n gedoopte Getuie. Wat sal keer dat ons oorhaastig tot die slotsom kom dat sulke mense ongunstig sal reageer?
3 Volg die voorbeeld van Jesus na: Jesus het geweet dat hy sy lewe vir almal sou gee. Mense se uiterlike het hom gevolglik nie afgeskrik nie. Hy het besef dat selfs diegene met ’n slegte reputasie dalk bereid sal wees om te verander as hulle die regte hulp en aansporing kry (Matt. 9:9-13). Hy het rykes sowel as armes probeer help (Matt. 11:5; Mark. 10:17-22). Ons moenie die mense wat ons in ons bediening teëkom na hulle uiterlike oordeel en ons verblind vir wat dalk ’n goeie hartstoestand kan wees nie (Matt. 7:1; Joh. 7:24). Wat kan ons help om Jesus se voortreflike voorbeeld na te volg?
4 Deur ons studie van die Bybel het ons geleer dat God se Woord die krag het om ons denke, gedrag en persoonlikheid te verander (Ef. 4:22-24; Heb. 4:12). Ons moet dus ’n positiewe gesindheid behou en die res aan Jehovah, die Een wat menseharte lees, oorlaat.—1 Sam. 16:7; Hand. 10:34, 35.
5 Mag die feit dat ons alle soorte mense, ongeag hulle uiterlike, onbevooroordeeld van die goeie nuus vertel tot die groot oeswerk in hierdie laaste dae bydra.—1 Tim. 2:3, 4.