Gebruik jou tyd goed
1 Elkeen het elke week dieselfde hoeveelheid tyd tot sy beskikking. Die deel wat ons aan die verkondiging van die goeie nuus wy, is veral waardevol, omdat dit tyd is wat aan ’n lewensreddende werk bestee word (Rom. 1:16). Ons toon ons waardering hiervoor deur goed vir die bediening voor te berei, betyds by velddiensvergaderinge op te daag en dadelik na die gebied toe te gaan. Ons wil eerder getuig as om te wag. Aangesien Jehovah ons leer dat ‘alles sy bepaalde uur het’, is dit belangrik dat ons die tyd wat ons vir die bediening opsygesit het goed gebruik.—Pred. 3:1.
2 Reël jou tyd verstandig: Ons kry baie seëninge wanneer ons getrou by ’n rooster bly wat voorsiening maak vir gereelde deelname aan die veldbediening. Die goeie resultate wat ons in die bediening verkry, behoort natuurlik in verhouding te wees met die hoeveelheid tyd wat ons aan die bediening bestee. Kan ons, met ’n effense aanpassing in ons roetine, meer tyd aan die velddiens wy? Kan ons byvoorbeeld ná tydskrifwerk op ’n Saterdag ekstra tyd daaraan bestee om ’n paar herbesoeke te doen? Kan ons, nadat ons op ’n Sondag ’n ruk lank in die veldbediening uit was, ook tyd afstaan om herbesoeke te doen of ’n Bybelstudie te hou? Kan ons ná huis-tot-huis-werk ’n bietjie straatgetuieniswerk gaan doen? Ons kan dalk op hierdie of ander maniere ons velddiens verbeter.
3 Wanneer ons in die bediening uit is, kan ons kosbare tyd verloor as ons nie versigtig is nie. Wanneer die weerstoestande onaangenaam is, sal ’n kort blaaskans ons natuurlik verkwik en ons help om voort te gaan. Wees egter gebalanseerd, aangesien sulke onderbrekings dalk nie altyd nodig is nie.
4 In onlangse jare het dit al hoe moeiliker geword om mense tuis te vind. Baie verkondigers doen hulle deur-tot-deur-getuieniswerk op ’n ander tyd van die dag om hierdie situasie die hoof te bied. Probeer gerus om laat in die middag of vroeg in die aand getuieniswerk te doen.
5 Ons moet liewer nie met mekaar staan en gesels wanneer ons straatwerk doen nie. Staan eerder van mekaar af weg en nader die mense met die doel om gesprekke met hulle te begin. Sodoende sal tyd effektiewer gebruik word, en ons sal groter vreugde uit die werk put.
6 Gryp geleenthede aan om te getuig: Toe ’n huisbewoner gesê het dat sy nie belangstel nie, het ’n Getuie gevra of daar dalk enigiemand anders in die huis is met wie sy kan praat. Dit het gelei tot ’n gesprek met die man van die huis, wat al jare lank siek was en die meeste van die tyd in die bed deurgebring het. Die hoop wat in God se Woord uiteengesit word, het hom nuwe belangstelling in die lewe gegee. Kort daarna was hy weer op die been, het hy vergaderinge by die Koninkryksaal bygewoon en het hy vir ander van sy nuutgevonde hoop vertel!
7 ’n Tienderjarige suster het die wenk toegepas om ’n uur voor die Gemeentelike Boekstudie velddiens te doen. By haar eerste deur het sy ’n 13-jarige meisie ontmoet wat met belangstelling geluister en lektuur geneem het. Die volgende dag het die jong suster hierdie selfde meisie by die skool gesien. Kort daarna het sy aangebied om die Bybel met haar te studeer, en die meisie het ingestem.
8 Maak dit kwaliteitstyd: ’n Gereelde deelname aan velddiens help ons om bekwamer te raak wanneer ons die goeie nuus aanbied. Kan jy jou vermoë verbeter om ’n gesprek by die deur te begin deur ’n doeltreffender inleiding te gebruik? Kan jy ’n bekwamer onderrigter word wanneer jy ’n tuisbybelstudie hou? Jy kan sodoende waarlik jou tyd in die velddiens goed gebruik en jou bediening produktiewer maak.—1 Tim. 4:16.
9 Aangesien ‘die oorblywende tyd kort is’, moet ons lewe met Christelike werke gevul wees (1 Kor. 7:29). Om tyd vir die predikingswerk opsy te sit, behoort hoog op ons lys van prioriteite te wees. Laat ons ’n heilsame, ywerige deelname aan die bediening hê. Tyd is ’n wonderlike bate wat Jehovah ons gegee het. Gebruik dit altyd verstandig en maak goed gebruik daarvan.
[Venster op bladsy 4]
Oorweeg hierdie wenke:
◼ Daag betyds vir velddiensvergaderinge op.
◼ Hou velddiensgroepe so ver moontlik klein.
◼ Kom so gou moontlik in die gebied.
◼ Werk in ’n gebied wanneer die meeste mense tuis is.
◼ Werk soms alleen, as dit veilig is.
◼ Doen die herbesoeke wat die naaste aan die deur-tot-deur-gebied is.
◼ Bly besig in die diens wanneer ander in die groep by ’n deur opgehou word.
◼ Probeer, wanneer omstandighede dit toelaat, om langer as ’n uur te werk.