Het jy ’n selfopofferende gees?
1 Waardering vir wat Jesus Christus op ’n onselfsugtige wyse vir die mensdom gedoen het, moet ons almal beweeg om ons vermoëns, energie en sterk punte op ’n selfopofferende wyse te gebruik. Die Skrif spoor ons aan: “[Bied] julle liggame aan . . . as ’n offerande wat lewend, heilig en vir God aanneemlik is, ’n heilige diens” (Rom. 12:1). As jy jouself van tyd tot tyd ondersoek, sal dit jou help om te sien of jy daardie soort gees openbaar in die mate wat jou persoonlike omstandighede jou toelaat.
2 In jou strewe na Bybelkennis: Het jy tyd opsy gesit vir gereelde persoonlike Bybellees en -studie? Bly jy by daardie rooster? Is dit jou gewoonte om vir gemeentelike vergaderinge goed voor te berei? Het jy, indien jy ’n gesinshoof is, ’n gereelde Bybelstudie met jou huisgesin? Dit sal dalk vereis dat jy tyd opoffer wat jy andersins voor die televisie of die rekenaar sou deurgebring het of vir ander dinge sou gebruik het. Maar wat ’n klein opoffering is dit tog as jy in gedagte hou dat tyd wat aan God se Woord bestee word jou kan help om die ewige lewe te kry!—Joh. 17:3.
3 In die opleiding van jou kinders: ’n Mens se kinderjare is die beste tyd om ’n weg van selfopoffering te begin leer. Leer jou kinders dat daar ’n tyd is om te speel, maar dat daar ook ’n tyd vir werk en vir teokratiese bedrywighede moet wees (Ef. 6:4). Gee hulle nuttige werkies om in en om die huis te doen. Maak ’n gewoonte daarvan om gereeld saam met hulle aan die bediening deel te neem. Vul jou onderrigting aan met jou eie goeie voorbeeld.
4 In gemeentelike bedrywighede: ’n Gemeente word versterk wanneer almal gewillig opofferings maak om dinge te bereik wat almal tot voordeel strek (Heb. 13:16). Is dit moontlik dat jy meer tyd in die Koninkrykspredikings- en dissipelmaakwerk kan deurbring? Kan jy aanbied om die siekes of die bejaardes by te staan, moontlik deur hulle met vervoer na die vergaderinge te help?
5 Voordat Jesus sy menselewe opgeoffer het, het hy sy dissipels beveel om hulle oë op Koninkryksbelange gevestig te hou en alle ander dinge in die lewe ondergeskik daaraan te stel (Matt. 6:33). As ons so ’n selfopofferende gees nastreef, sal dit ons groter geluk verskaf terwyl ons voortgaan om Jehovah met vreugde te dien.