“Moet ek verhuis?”
1 In gehoorsaamheid aan Jesus se opdrag om “dissipels van mense van al die nasies [te maak]” het talle toegewyde knegte van Jehovah verhuis na waar daar hulp nodig is (Matt. 28:19). Hulle volg Paulus na, wat gereageer het op die uitnodiging: “Kom oor na Masedonië en help ons” (Hand. 16:9). Hoe kan dit op ’n praktiese manier gedoen word?
2 Gaan stapsgewys te werk: Het julle gemeente gebied wat selde gewerk word? Indien wel, kan jy jou op hierdie gebiede toespits. Voordat jy besluit om na ’n ander plek toe te gaan, sal dit goed wees om dit met julle ouer manne te bespreek om uit te vind of hulle dink so ’n skuif sal verstandig wees. Jy kan ook julle kringopsiener vra of hy van ’n nabygeleë gemeente weet waar jy jou bediening kan uitbrei. Aan die ander kant wil jy dalk, nadat jy die koste noukeurig bereken het, dit oorweeg om hulp te verleen in ’n ander deel van die land of in ’n buurstaat. Ons Koninkryksbediening vir Junie 2000 bevat ’n lys van plekke waar daar hulp nodig is. As dit jou begeerte is, moet jy saam met julle liggaam van ouer manne aan die takkantoor skryf waar jy belangstel om te dien en jou teokratiese agtergrond uiteensit. Dit sal dalk verstandig wees om die gebied te besoek voordat jy besluit of jy permanent wil verhuis of nie.
3 Immigrasie—Waarom versigtig wees: Al hoe meer van ons broers verhuis na ander lande op soek na ’n beter lewenstandaard of verligting van onderdrukking. In die proses het party die slagoffers geword van gewetenlose individue wat hulp belowe om in die nuwe land gevestig te raak, maar slegs hulle geld neem en hulle dan in die steek laat. So word die immigrante se situasie erger as wat dit in hulle vaderland was. Hulle moet dalk selfs die broers vra om hulle te huisves en hulle op ander maniere by te staan, wat ’n las op ander Christengesinne plaas wat met hulle eie probleme en sorge te kampe het. Lede van sommige huisgesinne is fisies van mekaar geskei, en gesinne het geestelik agteruitgegaan weens sulke onverstandige besluite.—1 Tim. 6:8-11.
4 As jy vir persoonlike voordeel wil verhuis, moet jy onthou dat ’n mens voor probleme te staan kom, ongeag waar jy woon. Dit is makliker om probleme te bowe te kom waar jy reeds die taal en kultuur ken as om van nuuts af in ’n onbekende omgewing te begin.