Wees harmonies saamgeheg
1 Hoe dikwels was jy al verwonderd oor die meesterlike ontwerp van die menseliggaam? (Ps. 139:14). Elke ledemaat van die liggaam werk in harmonie saam met die ander. God se Woord vergelyk die Christengemeente met ’n goed gekoördineerde liggaam. Onder die Hoof, Christus, is al die lede van die gemeente ‘harmonies saamgeheg en word hulle tot samewerking gebring deur middel van elke gewrig wat gee wat nodig is’ (Ef. 4:16). Jehovah kan dus sy verenigde volk gebruik om wonderlike dinge te vermag.
2 Lede van die eerste-eeuse gemeente het “eendragtig” in mekaar se geestelike en materiële behoeftes voorsien (Hand. 2:44-47). Met Jehovah se ondersteuning het hulle hewige teenstand eendragtig die hoof gebied (Hand. 4:24-31). Hulle het die Koninkryksboodskap bekend gemaak waar hulle ook al gegaan het sodat die goeie nuus oral in die destyds bekende wêreld verkondig is (Kol. 1:23). In ons tyd het die Christengemeente eendragtig dieselfde dinge op ’n selfs groter skaal verrig. Watter faktore dra by tot hierdie eenheid?
3 Verenig deur Goddelike onderrigting: Regoor die wêreld word ons deur ons aanbidding verenig. Hoe is dit moontlik? Ons erken die sigbare kanaal waardeur Jehovah geestelike “voedsel op die regte tyd” voorsien (Matt. 24:45). Ons waardeer ook die “gawes in die vorm van mense” wat hy as onderrigters in die gemeente gegee het. Namate ons Jehovah se voorsienings nederig aanvaar om ons geestelik te voed, verstaan ons God se Woord beter en word ’n begeerte in ons almal gewek om Jesus as sy dissipels na te volg. Ons moet voortgaan om God se Woord te bestudeer en opreg probeer om ‘tot die eenheid in die geloof te kom’ (Ef. 4:8, 11-13). Dra jy by tot ons geestelike eenheid deur die Bybel daagliks te lees?
4 Verenig deur Christelike omgang: Liefde verenig ons in hegte omgang by Christelike vergaderinge. By hierdie vergaderinge ‘gee ons ag op mekaar’ (Heb. 10:24, 25). Dit behels dat ons nie net die uiterlike sien nie, maar ons broers werklik leer ken en hulle sien soos Jehovah hulle sien, as kosbaar (Hag. 2:7, voetnoot in NW). Wanneer ons hoor hoe hulle uitdrukking gee aan hulle geloof, raak ons liefde vir hulle inniger en word ons eenheid versterk. Staan jy bekend as iemand wat gereeld die gemeentelike vergaderinge bywoon?
5 Medewerkers in die veld: Wanneer ons die goeie nuus saam met medegelowiges verkondig, verenig dit ons in die uitvoering van God se wil. Die apostel Paulus het waardering gehad vir sy “medewerkers vir die koninkryk van God” (Kol. 4:11). As ons saam aan die bediening deelneem en mekaar bystaan, help dit ons om ons Christelike opdrag uit te voer en versterk dit ons band van eenheid.—Kol. 3:14.
6 Verenigende invloed van die heilige gees: Namate ons ons daarop toelê om Jehovah se wil te doen, seën hy ons met sy gees. Dit help ons om geskille uit die weg te ruim en in eenheid saam te woon (Ps. 133:1). Dit beweeg ons “om die eenheid van die gees in die verenigende band van vrede te bewaar” (Ef. 4:3). Elkeen van ons kan bydra tot die harmonie van God se volk deur die vrugte van die gees in ons handelinge met mekaar aan die dag te lê.—Gal. 5:22, 23.
7 As ons verenig onder Christus se hoofskap dien, “bevorder [dit] die groei van die liggaam vir sy eie opbouing in liefde” (Ef. 4:16). Daarbenewens verheerlik dit Jehovah, “die God . . . wat vrede gee”.—Rom. 16:20.