Jehovah is baie lofwaardig
Die Here se Aandmaal sal op 16 April gevier word
1 Die afwagting neem toe namate ons 16 April 2003 nader. Op daardie aand sal ons saam met miljoene medeaanbidders regoor die aarde Jesus se dood herdenk en Jehovah se naam verheerlik. Jehovah verdien al ons lof vir die wonderlike voorsiening van die losprys. Deur middel van die losprys sal hy ongelooflike seëninge op die hele gehoorsame mensdom uitstort. Ons stem heelhartig saam met die psalmis se woorde: “Jehovah is groot en baie lofwaardig.”—Ps. 145:3.
2 Dit is ’n tyd om na te dink oor God se goedheid en die dank wat ons aan Jehovah verskuldig is omdat hy “sy enigverwekte Seun in die wêreld uitgestuur [het] sodat ons deur hom die lewe kan verkry” (1 Joh. 4:9, 10). As ons gehoorsaam die Here se Aandmaal herdenk, sal dit ons vertroue versterk dat ‘Jehovah genadig en barmhartig en groot in liefderyke goedhartigheid is’ (Ps. 145:8). Ja, die losprys is Jehovah se grootste blyk van liefde teenoor die hele mensdom (Joh. 3:16). Wanneer ons oor God se liefde nadink en oor Jesus se getroue weg van onkreukbaarheid peins, beweeg dit ons om Jehovah te loof. Ons sal hom tot in alle ewigheid loof vir sy eindelose liefde wat hy getoon het deur die ewige lewe vir ons moontlik te maak.—Ps. 145:1, 2.
3 Help ander om Jehovah te loof: Waardering vir God se voortreflike gawe van die losprys beweeg ons om ander te nooi om Jehovah saam met ons te loof. Die psalmis is geïnspireer om te skryf: “Hulle sal die vermelding van u oorvloedige goedheid laat uitborrel, en weens u regverdigheid sal hulle met vreugde uitroep” (Ps. 145:7). Verlede jaar alleen het Jehovah se Getuies regoor die wêreld meer as ’n miljard uur aan die predikingswerk gewy. Watter vrugte het hulle pogings afgewerp? Elke week is gemiddeld meer as 5 100 mense gedoop as ’n simbool van hulle toewyding aan Jehovah. Die Gedenkmaal is deur altesaam 15 597 746 bygewoon, wat meer as 9 miljoen insluit wat Jehovah nog nie as verkondigers van die goeie nuus begin loof het nie, en dit toon groot potensiaal vir verdere groei! As Koninkryksverkondigers waardeer ons ons voorreg om die goeie nuus bekend te maak en ander se harte na Jehovah, sy Seun en die Koninkryk te rig.
4 ’n Goeie manier waarop ons ander kan aanspoor om Jehovah te eer, is deur hulle te nooi om die Here se Aandmaal saam met ons te herdenk. Het jy ’n lys gemaak van almal wat jy wil nooi sowel as van ander wat moontlik aan die dag en tyd herinner moet word? Het jy ’n uitnodiging vir almal op jou lys gegee? Indien nie, kan jy die oorblywende tyd ywerig gebruik om dit te doen. Help hulle om die doel van die viering te verstaan. Wees gereed om besoekers by die herdenking te verwelkom. Laat hulle tuis voel, stel hulle aan ander voor en prys hulle vir hulle teenwoordigheid.
5 As nuwelinge die Gedenkmaal bywoon, kan dit hulle aanspoor om geestelike vooruitgang te maak. ’n Bybelstudent wat aan posttraumatiese stres ly, wat dit vir hom baie moeilik maak om tussen mense te wees, het na die Gedenkmaal toe gekom. Toe hy gevra is wat hy van die vergadering gedink het, het hy gesê: “Dit was ’n baie heilige aand, en ek was daar.” Hy het sedertdien die vergaderinge begin bywoon.
6 Ná die Gedenkmaal: Wat kan gedoen word om hierdie belangstellendes te help om lowers van Jehovah te word? Die ouer manne sal let op die nuwelinge wat die Gedenkmaal bywoon en reëlings tref sodat bekwame verkondigers hulle kort daarna kan besoek om die verkwikkende dinge te hersien wat hulle geleer en gesien het. Party sal dalk ’n tuisbybelstudie wil hê. Hulle moet ook genooi word om al die weeklikse gemeentelike vergaderinge by te woon, aangesien gereelde bywoning hulle Bybelkennis kan vermeerder.
7 Reëlings word getref om alle ongereelde en onbedrywige verkondigers aan te moedig om vergaderinge gereeld by te woon. As die ouer manne jou vra om iemand wat onbedrywig geraak het, te help om weer velddiens te doen, moet jy gewillig wees om hulp te verleen. Sulke liefdevolle besorgdheid teenoor ons broers is in ooreenstemming met Paulus se vermaning: “Solank ons die geleentheid het, laat ons dan aan almal goed doen, maar veral aan dié wat in die geloof aan ons verwant is.”—Gal. 6:10.
8 Mag ons almal ’n spesiale poging aanwend om die Gedenkmaal op 16 April by te woon. Ons sal nie wil wegbly van hierdie uiters belangrike geleentheid om Jehovah te loof nie. Ja, laat ons Jehovah nou en tot in alle ewigheid loof vir sy groot werke!—Ps. 145:21.