“Dien Jehovah met blydskap”
1. Wat kan ’n bron van groot vreugde vir Jehovah se knegte wees?
1 “Verbly julle altyd in die Here”, het die apostel Paulus geskryf. “Weer eens sal ek sê: Verbly julle!” (Fil. 4:4). Die voorreg om die goeie nuus te verkondig en skaapgeaardes te help om Jehovah te aanbid, is ’n bron van groot vreugde (Luk. 10:17; Hand. 15:3; 1 Tess. 2:19). Maar wat kan ons doen as ons vind dat ons soms nie vreugde uit ons bediening put nie?
2. Hoe kan dit tot ons vreugde bydra as ons in gedagte hou van wie ons opdrag kom?
2 ’n Godgegewe werk: Ons moet onthou dat ons predikingsopdrag van Jehovah kom. Ja, wat ’n groot voorreg is dit tog om “God se medewerkers” te wees in die verkondiging van die Koninkryksboodskap en die dissipelmaakwerk! (1 Kor. 3:9). Christus Jesus is met ons in hierdie werk wat nooit weer gedoen sal word nie (Matt. 28:18-20). Die engele is ook intens hierby betrokke en werk saam met ons in die groot geestelike oesinsameling wat nou aan die gang is (Hand. 8:26; Op. 14:6). Die Skrif, sowel as die ondervindinge van God se volk, voorsien onomstootlike bewyse dat Jehovah hierdie werk steun. Wanneer ons dus die predikingswerk doen, gaan ons uit “as van God gestuur, ten aanskoue van God, in gemeenskap met Christus” (2 Kor. 2:17). Wat ’n kragtige rede tot vreugde is dit tog!
3. Watter rol speel gebed in ons vreugde in God se diens?
3 Gebed is noodsaaklik as ons ons vreugde in God se diens wil behou (Gal. 5:22). Aangesien ons God se werk alleenlik in sy krag kan doen, moet ons hom om sy gees smeek, wat hy mildelik gee aan dié wat hom vra (Luk. 11:13; 2 Kor. 4:1, 7; Ef. 6:18-20). As ons oor ons bediening bid, sal dit ons help om die regte gesindheid te behou wanneer mense negatief daarop reageer. Dit sal ons in staat stel om voort te gaan om met vrymoedigheid en blydskap te getuig.—Hand. 4:29-31; 5:40-42; 13:50-52.
4. Hoe help goeie voorbereiding ons om ons vreugde in die predikingswerk te vergroot, en op watter praktiese maniere kan ons voorberei?
4 Berei goed voor: ’n Praktiese manier om ons vreugde in die bediening te vergroot, is om goed voor te berei (1 Pet. 3:15). Hierdie voorbereiding hoef nie baie tyd in beslag te neem nie. Dit neem net ’n paar minute om die voorgestelde aanbiedings vir die jongste tydskrifte te hersien of om ’n gepaste aanbieding te vind vir die lektuur wat jy wil aanbied. Vir ’n gepaste inleiding kan jy die Redenering-boek of vorige nommers van Ons Koninkryksbediening raadpleeg. Party Koninkryksverkondigers vind dit nuttig om ’n kort aanbieding op ’n stukkie papier neer te skryf. Hulle kyk nou en dan daarna om hulle geheue te verfris. Dit help hulle om senuweeagtigheid te oorkom en gee hulle die selfvertroue om met vrymoedigheid te getuig.
5. Watter voordele bring vreugde vir ons en ander mee?
5 Vreugde bring baie voordele mee. ’n Vreugdevolle gesindheid laat ons boodskap groter byval vind. Vreugde versterk ons om te volhard (Neh. 8:10; Heb. 12:2). Bowenal verheerlik ons vreugdevolle diens Jehovah. Laat ons dus ‘Jehovah met blydskap dien’.—Ps. 100:2.