Vind baat by ’n studie van Kom nader aan Jehovah
1 By die “Ywerige Koninkryksverkondigers”-streekbyeenkoms was ons verheug om die boek Kom nader aan Jehovah te ontvang. Baie het die boek dadelik gelees. Nog baie ander is ongetwyfeld aangespoor om dit te doen deur die jaarteks vir 2003: “Kom nader aan God, en hy sal nader aan julle kom.”—Jak. 4:8.
2 In Maart sal ons met ons bespreking van Kom nader aan Jehovah by die Gemeentelike Boekstudie begin. Hoe kan ons die grootste voordeel uit ons studie trek? Voorbereiding is noodsaaklik. Elke hoofstuk sal oor twee weke gestudeer word, en betreklik min paragrawe sal vir elke week se studie toegewys word. Dit sal genoeg tyd laat vir jou opregte kommentare wat op jou studie van die materiaal en bepeinsing daaroor gebaseer is. Daarbenewens sal minder paragrawe bespreek word in die weke waarin die slotgedeelte van ’n hoofstuk hersien word, sodat daar tyd is om ’n spesiale kenmerk van die boek te gebruik.
3 Van hoofstuk 2 af verskyn ’n venster “Vrae om oor te peins” naby die einde van elke hoofstuk. Nadat die laaste paragraaf van die hoofstuk bespreek is, sal die boekstudieopsiener die groep nooi om die venster te bespreek. Hy sal die lede in die groep aanmoedig om hulle gedagtes uit te spreek en die goeie vrug van hulle bepeinsing oor die Skrif uit te bring (Spr. 20:5). Benewens die vrae wat in die venster gegee word, kan hy soms vrae vra soos: “Wat vertel hierdie inligting jou oor Jehovah? Hoe raak dit jou lewe? Hoe kan jy dit gebruik om ander te help?” Sy doelwit sal wees om opregte kommentare uit te lok, nie om die groep te toets oor minder belangrike besonderhede nie.
4 Kom nader aan Jehovah is uniek. Hoewel al die publikasies van “die getroue en verstandige slaaf” Jehovah verheerlik, is die hele doel van hierdie boek om Jehovah se eienskappe te bespreek (Matt. 24:45-47). Wat ’n opwindende geleentheid wag op ons! Ons sal grootliks baat vind by ’n diep studie van Jehovah se persoonlikheid. Mag die studie ons help om nader aan ons hemelse Vader te kom, en mag ons bekwamer daarin word om ander te help om dit ook te doen.