’n Ruiteraanval waarby jy betrokke is
1, 2. Hoe is God se knegte vandag betrokke by die vervulling van die profetiese visioen wat in Openbaring 9:13-19 opgeteken is?
1 “Die sesde engel het op sy trompet geblaas.” Daarna storm “leërs van ruiters” vorentoe waarvan die getal “twee tienduisende van tienduisende” is. Dit is nie ’n gewone krygsmag nie. “Die koppe van die perde [is] soos leeukoppe.” Vuur, rook en swael kom by hulle bekke uit, en hulle “sterte is soos slange”. Hierdie simboliese ruiteraanval saai verwoesting sover as wat hulle gaan (Op. 9:13-19). Weet jy hoe jy by die vervulling van hierdie opwindende profetiese visioen betrokke is?
2 Die gesalfde oorblyfsel en hulle metgeselle, die ander skape, maak eendragtig God se oordele bekend. Dit lei daartoe dat die Christendom se geestelik dooie toestand aan die lig gebring word. Kom ons ondersoek twee aspekte van die profetiese visioen wat toon waarom die bediening van God se knegte so doeltreffend is.
3. Watter opleiding het jy ontvang om God se boodskap doeltreffend te verkondig?
3 Opgelei en toegerus om God se boodskap bekend te maak: Deur middel van die Teokratiese Bedieningskool en ander gemeentelike vergaderinge word God se bedienaars opgelei om God se boodskap met gesag te verkondig. In navolging van Jesus en sy dissipels gaan hulle uit om na verdienstelikes te soek en getuig hulle waar hulle ook al mense vind (Matt. 10:11; Mark. 1:16; Luk. 4:15; Hand. 20:18-20). Hoe doeltreffend was hierdie Bybelse metode tog om die predikingswerk te doen!
4. Watter instrumente kan baie verkondigers gebruik om hulle werk uit te voer?
4 Miljarde Bybels, boeke, brosjures en tydskrifte is al deur Christenbedienaars versprei in die uitvoering van die godgegewe predikingsopdrag. Hierdie publikasies is al in byna 400 tale uitgegee, dek ’n wye verskeidenheid onderwerpe en gebruik benaderings wat by verskillende soorte mense byval vind. Maak jy op doeltreffende wyse gebruik van hierdie instrumente?
5, 6. Wat toon dat Jehovah se knegte hemelse ondersteuning geniet?
5 Hemelse leiding en ondersteuning: Die profetiese visioen maak dit ook duidelik dat die bedrywigheid wat deur die simboliese ruiteraanval afgebeeld word, God se steun geniet (Op. 9:13-15). Die wêreldwye predikingswerk word nie deur menslike wysheid of krag uitgevoer nie, maar deur middel van God se gees (Sag. 4:6). Jehovah gebruik die engele om hierdie werk te rig (Op. 14:6). Tesame met die pogings van sy menslike Getuies voorsien Jehovah dus ook hemelse ondersteuning om sagmoediges na hom toe te trek.—Joh. 6:45, 65.
6 Omdat Jehovah se knegte opgelei en goed toegerus is om God se boodskap bekend te maak en onder die leiding van die engele werk, is hulle ’n onstuitbare mag. Laat ons voortgaan om ons rol te speel in die vervulling van hierdie opwindende profetiese visioen.