Geestelike voedsel op die regte tyd
1. Hoe word Esegiël 36:29 vandag vervul?
1 “Ek sal . . . na die graan roep en dit oorvloedig maak, en ek sal geen hongersnood oor julle bring nie”, sê die Soewereine Heer Jehovah (Eseg. 36:29). Hierdie profetiese woorde is vandag op God se volk van toepassing. Jehovah het in figuurlike sin lewensonderhoudende graan in oorvloed vir sy volk laat opkom. Die tydige geestelike voedsel wat deur middel van ons streekbyeenkomste voorsien word, lig hierdie feit goed toe.
2. Hoe het Jehovah streekbyeenkomste gebruik om geestelike voedsel op die regte tyd te voorsien?
2 By die byeenkoms wat in 1931 in Columbus, Ohio, gehou is, het Jehovah sy aanbidders gerig om ’n nuwe naam—Jehovah se Getuies—aan te neem (Jes. 43:10-12). In 1935 is die groot menigte van Openbaring 7:9-17 reg geïdentifiseer. In 1942 het broer Knorr die toespraak “Vrede—Kan dit voortduur?” gehou. Daardie toespraak het die wêreldwye predikingswerk ’n stoot gegee en tot die stigting van die Wagtoring-Bybelskool Gilead gelei. Hoewel party byeenkomste onvergeetlik is, is elkeen ’n tafel vol voedsame geestelike voedsel wat op die regte tyd bedien word.—Ps. 23:5; Matt. 24:45.
3. Wat moet ons doen om by die geestelike feesmaal tydens ons streekbyeenkoms baat te vind?
3 Hoe goed eet jy? Dit is moontlik om deur voedsel omring te wees en tog ondervoed te wees as ons nie die moeite doen om te eet nie (Spr. 26:15). Dit is ook die geval in geestelike sin. By ’n paar byeenkomste is daar opgemerk dat baie gedurende die program onnodig rondloop of met ander gesels. Hoewel opbouende omgang ’n belangrike aspek van die byeenkoms is, is die tyd hiervoor voor en ná elke sessie (Pred. 3:1, 7). As ons nie in ons sitplekke is en aandagtig luister nie, mis ons dalk ’n lewensbelangrike gedagte. Dit is soms vir opsieners van byeenkomsafdelings en broers met toewysings nodig om gedurende die sessies sake in verband met die byeenkoms te bespreek. Anders moet hulle ’n voorbeeld stel deur aandagtig na die program te luister. Nie een van ons kan bekostig om enige van die geestelike voedsel wat voorsien word, te mis nie.—1 Kor. 10:12; Fil. 2:12.
4. Hoe kan ons toon dat ons dankbaar is vir die oorvloed wat Jehovah voorsien?
4 Hoe verheug ons ons tog in die oorvloed geestelike waarhede wat Jehovah voorsien, in teenstelling met die uitgedroogde valse leerstellings van die Christendom! (Jes. 65:13, 14). Een manier waarop ons kan ‘toon dat ons dankbaar is’, is deur die byeenkoms te beskou as ’n geleentheid om deur Jehovah geleer te word (Kol. 3:15). Kyk verder as die broer wat die toespraak hou en beskou dit as ’n boodskap wat van ons “Grootse Onderrigter” af kom (Jes. 30:20, 21; 54:13). Luister aandagtig. Maak kort aantekeninge van sleutelgedagtes. Hersien elke aand die byeenkomshoogtepunte. Pas toe wat jy leer.
5. Watter redes tot vreugde gee streekbyeenkomste ons?
5 Elke byeenkoms hierdie kant van Armageddon, of dit nou in ’n vlugtelingkamp, in ’n oorloggeteisterde land of op ’n groter, vreedsamer plek gehou word, is ’n oorwinning oor Satan! As ’n verenigde broederskap waardeer ons ons geleenthede om tydens streekbyeenkomste saam te kom (Eseg. 36:38). Ons is vol vertroue dat Jehovah ons weer eens liefdevol van ‘voedsel op die regte tyd’ sal voorsien.—Luk. 12:42.
[Venster op bladsy 4]
Toon waardering vir Jehovah se tafel
◼ Luister aandagtig
◼ Skryf sleutelgedagtes neer
◼ Hersien elke aand die byeenkomshoogtepunte
◼ Pas toe wat jy leer