Volharding word beloon
1 “Deur julle volharding sal julle julle siel verwerf” (Luk. 21:19). Hierdie woorde, wat deel is van Jesus se profesie oor “die voleinding van die stelsel van dinge”, stel dit duidelik dat ons bereid moet wees om baie beproewinge te verduur om ons onkreukbaarheid te handhaaf. Maar deur Jehovah se krag kan elkeen van ons “tot die einde toe volhard” en “gered word”.—Matt. 24:3, 13; Fil. 4:13.
2 Vervolging sowel as gesondheids-, finansiële en emosionele probleme kan van elke dag ’n beproewing maak. Maar ons moet nooit vergeet dat Satan ons probeer kry om ons onkreukbaarheid teenoor Jehovah prys te gee nie. Elke dag dat ons aan ons Vader lojaal bly, is nog ’n dag waarin ons gehelp het om ’n antwoord te gee aan die een wat Jehovah tart. Hoe bemoedigend is dit tog om te weet dat die “trane” wat ons tydens beproewinge stort, nie vergeet word nie! Dit is vir Jehovah kosbaar, en ons onkreukbaarheid maak sy hart bly!—Ps. 56:8; Spr. 27:11.
3 Deur beproewinge gelouter: Beproewinge kan ’n swakheid in ons geloof of ’n persoonlikheidsgebrek, soos trots of ongeduld, openbaar. Ons moenie probeer om beproewinge te ontduik of op ’n onskriftuurlike wyse tot ’n einde te bring nie, maar moet eerder ag slaan op die raad van God se Woord: “Laat die volharding sy werk voltooi.” Waarom? Omdat getroue volharding tydens beproewinge ons help om “volkome en in alle opsigte sonder gebrek” te wees (Jak. 1:2-4). Volharding kan ons help om nuttige eienskappe aan te kweek, soos redelikheid, empatie en barmhartigheid.—Rom. 12:15.
4 Die beproefde hoedanigheid van geloof: Wanneer ons beproewinge verduur, verkry ons geloof ’n beproefde hoedanigheid wat groot waarde het in die oë van God (1 Pet. 1:6, 7). Sulke geloof rus ons toe om ondanks toekomstige beproewinge standvastig te bly. Daarbenewens is ons bewus van God se goedkeuring, en dit versterk ons hoop en laat dit vir ons werkliker word.—Rom. 5:3-5.
5 Die grootste beloning vir volharding word in Jakobus 1:12 beklemtoon, wat sê: “Gelukkig is die mens wat beproewing bly verduur, want wanneer hy goedgekeur is, sal hy die kroon van die lewe ontvang.” Laat ons gevolglik standvastig bly in ons toegewydheid aan Jehovah, vol vertroue dat hy “diegene wat hom altyd liefhet”, ryklik sal beloon.