Deel 2: Hou progressiewe Bybelstudies
Voorbereiding om die studie te hou
1 Doeltreffende onderrigting tydens ’n Bybelstudie verg meer as net om die materiaal te bespreek en die teksverwysings na te slaan. Ons moet die inligting op ’n manier oordra wat die student se hart raak. Dit verg deeglike voorbereiding met die student in gedagte.—Spr. 15:28.
2 Hoe om voor te berei: Begin deur tot Jehovah te bid oor die persoon en sy behoeftes. Vra Jehovah om jou te help om die student se hart te bereik (Kol. 1:9, 10). Kry die tema goed in gedagte deur vir ’n oomblik te dink aan die titel van die hoofstuk of les, die onderhofies en enige visuele hulpmiddele. Vra jou af: ‘Wat is die doel van die materiaal?’ Dit sal jou help om die hoofpunte te beklemtoon wanneer jy die studie hou.
3 Hersien die materiaal sorgvuldig paragraaf vir paragraaf. Vind die antwoorde op die gedrukte vrae en merk net die sleutelwoorde en -frases. Ontleed hoe die teksverwysings met die hoofpunt van die paragraaf verband hou, en besluit watter tekste gedurende die studie gelees moet word. Jy sal dit moontlik nuttig vind om kort aantekeninge in die kantruimte van die publikasie te maak. Die student moet duidelik sien dat wat hy leer, uit God se Woord kom.—1 Tess. 2:13.
4 Pas die les by die student aan: Dink dan aan die les met die spesifieke student in gedagte. Probeer vooruit dink watter vrae hy miskien sal vra en watter punte hy dalk vir hom moeilik sal wees om te verstaan of te aanvaar. Vra jou af: ‘Wat moet hy verstaan of waaraan moet hy aandag gee om geestelike vooruitgang te maak? Hoe kan ek sy hart bereik?’ Pas dan jou onderrigting dienooreenkomstig aan. Soms sal jy dit dalk nodig vind om ’n illustrasie, ’n verduideliking of ’n reeks vrae voor te berei om die student te help om die betekenis van ’n sekere punt of teks te snap (Neh. 8:8). Maar moenie ekstra inligting byvoeg wat nie juis tot die tema bydra nie. ’n Kort hersiening aan die einde van die studie sal hom help om die hoofpunte te onthou.
5 Watter vreugde verskaf dit ons tog wanneer nuwelinge regverdige vrugte voortbring tot lof van Jehovah! (Fil. 1:11). As jy hulle wil help om daardie doel te bereik, moet jy goed voorberei elke keer as jy ’n Bybelstudie hou.