Hoe kan ons help?
1 Die vraag “Hoe kan ons help?” word dikwels deur Jehovah se Getuies gevra wanneer hulle van ’n ramp in een of ander wêrelddeel hoor. Soos die verslag in Handelinge 11:27-30 toon, het Christene in die eerste eeu noodleniging aan die broers in Judea voorsien weens ’n hongersnood wat geheers het.
2 In hedendaagse tye maak ons organisatoriese handveste daarvoor voorsiening dat geld gebruik kan word vir liefdadigheidswerk en om humanitêre bystand te verleen aan slagoffers van natuurrampe of rampe wat deur die mens veroorsaak is, sowel as in ander tye van nood.
3 Verlede jaar het baie van ons broers byvoorbeeld bydraes gegee om diegene te help wat deur die tsoenami in Suid-Asië geraak is. Hierdie liefdevolle reaksie in die vorm van bydraes tot die organisasie se noodlenigingsfonds is hoog op prys gestel. Maar wanneer bydraes vir ’n spesifieke ramp gegee word, mag hierdie fondse in sommige lande slegs aangewend word vir die doel wat deur die skenker gespesifiseer is en moet dit binne ’n sekere tyd gebruik word, hetsy daar in die behoeftes van ons broers voorsien is of nie.
4 Gevolglik beveel ons aan dat bydraes vir humanitêre en noodlenigingsbystand vir die wêreldwye werk gegee word. Hierdie fonds word gebruik vir noodlenigingspogings sowel as om in die geestelike behoeftes van ons Christenbroederskap te voorsien. As iemand om die een of ander rede ’n bydrae vir noodleniging wil maak, maar nie as ’n bydrae tot die wêreldwye werk nie, sal dit nog steeds aanvaar en gebruik word wanneer daar ook al ’n behoefte aan noodleniging is. Ons sal dit egter waardeer as sulke bydraes gemaak word sonder dat daar beperkings gestel word op waar en hoe die fondse gebruik mag word.
5 As ons ons bydraes hoofsaaklik vir die wêreldwye werk gee, is meer fondse beskikbaar wat gebruik kan word vir alle aspekte van die Koninkrykswerk eerder as dat dit alleenlik vir toekomstige noodlenigingswerk gehou word. Dit is in ooreenstemming met die gees van Efesiërs 4:16, dat ons saam werk om te gee wat nodig is vir “die groei van die liggaam vir sy eie opbouing in liefde”.