Leer sagmoediges om in God se weg te wandel
1. Wat behels dit om dissipels te maak?
1 Daar is van die eerste-eeuse dissipels van Christus gesê dat hulle tot “Die Weg” behoort (Hand. 9:2). Die ware Christelike godsdiens raak elke aspek van ’n mens se lewe (Spr. 3:5, 6). Wanneer ons Bybelstudies hou, moet ons dus meer doen as om juiste kennis van Bybelleerstellings oor te dra. Ons moet Bybelstudente ook help om in Jehovah se weg te wandel.—Ps. 25:8, 9.
2. Wat kan ’n Bybelstudent beweeg om God se gebooie na te kom?
2 Liefde vir Jehovah en vir Jesus: Wat ’n uitdaging is dit tog vir onvolmaakte mense om hulle denke, gesindhede, spraak en gedrag in ooreenstemming met God se wil te bring! (Rom. 7:21-23; Ef. 4:22-24). Maar liefde vir God en sy Seun beweeg sagmoediges om hierdie uitdaging te aanvaar (Joh. 14:15; 1 Joh. 5:3). Hoe kan ons ons Bybelstudente help om hierdie liefde aan te kweek?
3. Hoe kan ons ons studente help om liefde vir Jehovah en vir Jesus aan te kweek?
3 Help jou student om uit te vind watter soort persoon Jehovah is. Een broer het verduidelik: “Mense kan nie iemand liefhê wat hulle nie ken nie, en daarom leer ek hulle van die eerste studie af God se naam uit die Bybel, en ek soek na geleenthede om Jehovah se eienskappe te beklemtoon.” ’n Uitstekende manier om dit te doen, is om die aandag op Jesus se voorbeeld te vestig (Joh. 1:14; 14:9). Maak ook gebruik van die hersieningsvenster aan die einde van elke hoofstuk van die Leer Bybel-boek om die student te help om oor die wonderlike eienskappe van God en sy Seun na te dink.
4. (a) Waarom is die predikingswerk vir baie studente ’n uitdaging? (b) Hoe kan ons ons studente help om hulle eerste treë in die Christelike bediening te gee?
4 Leer deur jou voorbeeld: As onderrigters en gidse wys ons vir ander deur ons optrede wat dit beteken om in God se weg te wandel (1 Kor. 11:1). Die meeste Bybelstudente is byvoorbeeld nie daaraan gewoond om vreemdelinge te nader en met hulle oor hulle oortuigings te praat nie. Daarom sal dit moontlik geduld en vaardigheid verg om hulle te help om die liefde, geloof en moed aan te kweek wat nodig is om aan die predikings- en dissipelmaakwerk deel te neem (2 Kor. 4:13; 1 Tess. 2:2). Ons begeerte om leiding aan ons studente te gee, sal ons beweeg om aan hulle sy te wees wanneer hulle hulle eerste treë in die Christelike bediening gee.
5. Hoe help ’n goeie voorbeeld studente om te sien wat dit behels om God se gebooie na te kom?
5 Jou voorbeeld kan studente ander belangrike aspekte van die Christelike lewenswyse leer. Wanneer jy die siekes besoek of ander hartlik by gemeentelike vergaderinge groet, sien hulle liefde in aksie (Joh. 15:12). Wanneer jy die Koninkryksaal help skoonmaak of behulpsaam is teenoor ander, leer jy hulle hoe om te dien (Joh. 13:12-15). Wanneer hulle sien dat jy ’n eenvoudige lewenswyse handhaaf, besef hulle wat dit beteken om ‘aan te hou om eers die koninkryk te soek’.—Matt. 6:33.
6. Waartoe lei dit as ’n mens sagmoediges help om Jehovah te dien?
6 Die werk om ander uit God se Woord te onderrig en om dissipels te maak, verg groot inspanning. Maar wat ’n vreugde is dit tog om te sien hoe sagmoediges “voortgaan om in die waarheid te wandel”!—3 Joh. 4.