Toon persoonlike belangstelling—Deur ander te prys
1 Opregte lof beur mense op, spoor hulle tot dade aan en verskaf hulle vreugde. Baie verkondigers het gevind dat net ’n woordjie van opregte lof dikwels help om ’n horende oor in die bediening te kry. Hoe kan ons mense prys wanneer ons die goeie nuus aan hulle probeer verkondig?
2 Wees oplettend: Die verheerlikte Jesus Christus het die goeie dade van die sewe gemeentes in Klein-Asië opgemerk (Op. 2:2, 3, 13, 19; 3:8). Net so sal opregte belangstelling in die mense wat ons in ons bediening ontmoet, ons beweeg om geleenthede te soek om hulle te prys. ’n Netjiese werf, ’n ouer wat tere geneentheid aan sy kinders betoon of ’n huisbewoner se vriendelike glimlag en groet bied ons byvoorbeeld die geleentheid om ander te prys. Is jy op die uitkyk na sulke geleenthede en benut jy dit?
3 Wees ’n goeie luisteraar: Wanneer jy vir ander getuig, kan jy hulle nooi om hulle mening uit te spreek deur hulle gepaste vrae te vra. Betoon eer aan hulle deur aandagtig te luister na wat hulle sê (Rom. 12:10). Jy sal waarskynlik iets kry waarvoor jy hulle opreg kan prys en sal dan kan voortbou op die gemeenskaplike grondslag wat jy gelê het.
4 Lê onderskeidingsvermoë aan die dag: Wat moet ons doen as ’n huisbewoner iets sê wat nie in ooreenstemming met Bybelwaarheid is nie? Moenie met die huisbewoner daaroor stry nie, maar gee erkenning aan sy woorde en sê dan iets soos: “Ek kan sien dat jy al baie hieroor gedink het” (Kol. 4:6). Al is iemand stryerig, kan ons hom dikwels vir sy opregte belangstelling in die onderwerp prys. So ’n vriendelike benadering kan iemand se gesindheid versag wat blykbaar hewig gekant is teen die goeie nuus.—Spr. 25:15.
5 Wanneer ons ander prys, moet ons opreg wees, anders is dit van geen waarde nie. Sulke opbouende woorde eer Jehovah en kan die Koninkryksboodskap vir ander aantreklik maak.