Vertroos die gebrokenes van hart
1 Daar was nog nooit in die mensegeskiedenis so ’n behoefte aan vertroosting nie. In navolging van ons Koning, Christus Jesus, span ons ons in om “die gebrokenes van hart te verbind”.—Jes. 61:1.
2 Benadering: Om mense te vertroos, moet ons bediening gekenmerk word deur goed gebalanseerde, bemoedigende aanbiedings. Wanneer ons in die gesprek so min moontlik oor die wêreld se slegte dade en valse leerstellings sê, word Bybelwaarheid en die helder hoop van God se vertroostende beloftes die meeste beklemtoon. Dit beteken nie dat Armageddon nie bespreek moet word nie. Ons opdrag is om “die jaar van die welwillendheid van Jehovah” sowel as “die dag van die wraak van ons God” uit te roep en om “die goddelose teen sy goddelose weg te waarsku”. Maar die waarskuwing oor Armageddon en ’n beskrywing van die vernietigende gevolge daarvan behoort nie die tema van die goeie nuus van God se Koninkryk te oorskadu nie.—Jes. 61:2; Eseg. 3:18; Matt. 24:14.
3 Van deur tot deur: Dit is nie ongewoon om mense te kry wat mismoedig is weens siekte, die dood van ’n geliefde, onregte of ekonomiese probleme nie. As navolgers van Christus word ons “ontroer deur innige jammerte” en is ons simpatiek teenoor diegene wat ons in die bediening ontmoet (Luk. 7:13; Rom. 12:15). Hoewel ons een of twee tekste kan lees wat met die probleem verband hou, moet ons “gou wees om te hoor” en sodoende die persoon toelaat om te sê hoe hy voel (Jak. 1:19). Nadat ons geluister het, is ons beter in staat om vertroosting te bied.
4 Op ’n gepaste tyd in die gesprek kan ons sê: “Ek wil graag vir jou ’n paar aanmoedigende woorde uit die Bybel lees.” Ons moet goeie oordeel aan die dag lê sodat ons nie elke verkeerde beskouing wat die persoon dalk meld, probeer regstel nie. Ons moet ons eerder daarop toespits om ander te bemoedig en te vertroos deur die Skrif te gebruik om die hart te versterk. In hierdie verband kan jy Redenering uit die Skrif, bladsye 65-8, onder die opskrif “Bemoediging” raadpleeg. Of jy kan vir die huisbewoner die traktaat Vertroosting vir dié wat aan depressie ly gee en die bemoedigende inligting daarin bespreek.
5 Soek na geleenthede om ander te vertroos: Weet jy van ’n buurman, werksmaat, skoolmaat of familielid wat vertroosting nodig het? Jy kan gerus die moeite doen om so iemand by sy huis te gaan besoek met die doel om vertroosting uit die Skrif te bied. Aangesien jy weet waarom hy vertroosting nodig het, kan jy vir daardie spesifieke situasie voorberei. Party het ook al briewe geskryf of telefoonoproepe gemaak om ander te vertroos. Ware liefde vir ons naaste sal ons beweeg om meegevoel te betoon en die nodige vertroosting uit die Skrif te bied.—Luk. 10:25-37.
6 Ja, ons opdrag is om die treurendes te vertroos, om dié wat hartseer is, te bemoedig en om ’n wonderlike toekomshoop by mense in te boesem. Dit is die vertroosting wat mense oral in die wêreld nodig het. As ons vreugdevol praat oor al die goeie dinge wat God belowe het, sal ons aan die opregtes van hart vertroosting en hoop bied. Mag ons altyd onthou hoe belangrik dit is om die gebrokenes van hart te verbind.