Lewe met Jehovah se dag in gedagte
1 “Die groot dag van Jehovah is naby. Dit is naby en kom baie vinnig nader” (Sef. 1:14). Sefanja en die 11 ander sogenaamde Klein Profete het met Jehovah se dag in gedagte gelewe. Wanneer ons hulle geïnspireerde geskrifte by ons Gemeentelike Boekstudie bespreek met behulp van die boek Lewe met Jehovah se dag in gedagte, sal dit ons help om vir daardie vreesinboesemende dag voor te berei.—Sef. 2:2, 3.
2 Unieke kenmerke: Die boek Jehovah se dag verduidelik nie simboliese betekenisse nie en is nie ’n vers-vir-vers-bespreking van hierdie 12 profetiese boeke nie, maar dit verduidelik eerder hoe hierdie geïnspireerde geskrifte van toepassing is op werklike situasies waarvoor ons elke dag te staan kom. Dit beklemtoon waarom ’n gevoel van dringendheid al ons besluite en dade moet beïnvloed. Ons aandag word gevestig op die gesinslewe, ons verhoudings met medegelowiges, ons keuses van vermaak, ons bediening en ons loopbaankeuses.
3 Deel 1 van die boek stel ons bekend aan die 12 profete en hulle geskrifte. Wie was hulle? Wat het ons met hulle in gemeen? Deel 2 vestig die aandag op Jehovah en sy eienskappe. Watter insig bied hierdie profete in Jehovah en sy persoonlikheid? Deel 3 konsentreer op ons gedrag en handelinge. Hoe kan ons God daagliks op praktiese maniere behaag? Deel 4 verduidelik hoe ons met vreugde kan lewe terwyl ons in afwagting van Jehovah se dag bly.
4 Beplan nou om daarby baat te vind: Neem jou nou reeds voor om ten volle baat te vind by die studie van die boek Jehovah se dag, wat die week van 4 Augustus 2008 sal begin! Stel dit jou ten doel om die Gemeentelike Boekstudie elke week by te woon. Berei elke les noukeurig voor, en slaan die tekste na om te sien hoe dit verband hou met die materiaal onder bespreking. Peins oor die inligting deur jou af te vra: ‘Hoe kan ek hierdie inligting by die huis, by die skool, by die werk, in my bediening en in my handelinge met my Christenbroers en -susters toepas?’ Wees voorbereid om kommentaar te lewer wanneer jy die boekstudie bywoon, sodat jy ’n deel kan hê aan die wedersydse aanmoediging.—Rom. 1:12.
5 Mag ons bespreking van die boek Jehovah se dag ons nou voorberei om die dag van Jehovah, wat “groot en baie vreesinboesemend” is, te “deurstaan”. Daardie dag is inderdaad baie naby!—Joël 2:11.