Die predikingswerk vereis volharding
1 Die apostel Paulus het meer as 30 jaar lank ’n bevredigende loopbaan as ’n evangeliedienaar geniet. Soos die geval is met enige strewe wat die moeite werd is, was sy predikingswerk nie sonder uitdagings nie (2 Kor. 11:23-29). Tog het Paulus nie moed opgegee nie (2 Kor. 4:1). Hy het besef dat die krag om te volhard terwyl hy sy bediening uitvoer, van Jehovah af sou kom (Fil. 4:13). In die lig van sy voorbeeld van getroue volharding kon Paulus sê: “Word navolgers van my, net soos ek dit van Christus is.”—1 Kor. 11:1.
2 Hoe ons vandag beproewinge kan verduur: Baie van ons broers het elke dag te kampe met bespotting, teenstand of onverskilligheid van gesinslede, werksmaats of skoolmaats (Matt. 10:35; Joh. 15:20). Miskien is dit ook met jou die geval. Aan die ander kant worstel jy dalk met ’n gesondheidsprobleem of voer jy miskien ’n daaglikse stryd teen afleidings en versoekings wat jou geloof en volharding op die proef stel. Ons kan krag verkry deur te kyk na die voorbeelde van getroue knegte van die ou tyd sowel as dié van mede-Christene van vandag wat voor uitdagings te staan gekom en dit die hoof gebied het.—1 Pet. 5:9.
3 Ons kan die krag verkry om in ons bediening vas te staan deur seker te maak dat ons “die volle wapenrusting van God” aangetrek het (Ef. 6:10-13, 15). Dit is ook noodsaaklik om vir volharding te bid. God gee ons sy heilige gees sodat ons beproewinge kan verduur (2 Kor. 6:4-7). As ons welslae in ons geestelike oorlogvoering wil behaal, moet ons ag gee op God se herinneringe om ons gees te hernieu (Ps. 119:24, 85-88). Soos ’n kind ’n persoonlike brief van ’n liefdevolle vader moontlik oor en oor sal lees, versterk ons daaglikse Bybellees ons verhouding met Jehovah. Ons verkry wysheid om beproewinge te verduur deur gereeld persoonlike studie te doen, en daardeur laat ons toe dat God se beskouing ’n uitwerking op ons besluite het en ons onkreukbaarheid versterk.—Spr. 2:10, 11.
4 Volharding bring seëninge mee: Ons getroue volharding terwyl ons ons bediening uitvoer, maak Jehovah se hart bly en bring seëninge mee vir ons en vir ander, soos met Paulus die geval was (Spr. 27:11). Laat ons vasbeslote wees om in die bediening te volhard en sodoende bewys dat ons geloof sterk en “van baie groter waarde is as goud wat vergaan al word dit deur vuur getoets”.—1 Pet. 1:6, 7.