Program vir die spesiale byeenkomsdag vir 2010
1. (a) Watter skriftuurlike temas is in onlangse jare by spesiale byeenkomsdae bespreek? (b) Is daar enige spesifieke glanspunte van vorige spesiale byeenkomsdae wat jou in jou bediening gehelp het?
1 “Maak seker van die belangriker dinge”, “Staan vas as een kudde”, “Hou aan om van die waarheid te getuig” en “Ons is die klei—Jehovah is ons Pottebakker” (Fil. 1:9, 10, 27; Joh. 18:37; Jes. 64:8). Dit is maar net ’n paar van die talle temas wat al by spesiale byeenkomsdae bespreek is. Sien jy daarna uit om die spesiale byeenkomsdag vir die 2010-diensjaar by te woon? Die tema is: “Die oorblywende tyd is kort”, geneem uit 1 Korintiërs 7:29.
2. Hoe kan geesdrif vir hierdie byeenkoms opgewek word?
2 Begin geesdrif vir die spesiale byeenkomsdag opwek sodra die datum in julle gemeente aangekondig word. Party ouers help hulle kinders om na die byeenkoms uit te sien deur die datum op die gesin se kalender te skryf, asook ’n lys items wat hulle moet saamneem, en dan tel hulle die dae af. Gedurende julle aand vir Gesinsaanbidding kan julle julle notas van vorige spesiale byeenkomsdae hersien. Jy kan ook jou hart vir die geleentheid voorberei deur bladsye 13-16 van Vind baat by opleiding in die Teokratiese Bedieningskool deur te gaan, om jou en jou gesinslede te help om “aandag [te skenk] aan hoe julle luister”.—Luk. 8:18.
3. Hoe kan ons ten volle baat vind by wat bespreek gaan word?
3 Pas toe wat jy leer: Ná ’n byeenkoms sê baie gewoonlik: “Wat ’n wonderlike program!” Dit is altyd waar, aangesien dit een van Jehovah se talle ryk voorsienings vir ons is (Spr. 10:22). As jy egter wil hê dat die inligting vrug moet dra, moet jy daaroor peins en dit onthou (Luk. 8:15). Gebruik die tyd op pad huis toe ná die byeenkoms om met jou gesin of met dié in jou motorgroep oor die program te gesels. Julle kan praat oor julle doelwitte en watter punte julle in julle bediening sal help. So ’n bespreking sal julle help om nog lank ná die byeenkoms by die inligting baat te vind.—Jak. 1:25.
4. Waarom sal hierdie byeenkoms vir ons spesiaal wees?
4 Ons voel altyd spesiaal wanneer ons ’n nuttige geskenk ontvang wat presies is wat ons nodig het. Sien ons nie gretig uit na wat Jehovah vir ons by ons volgende spesiale byeenkomsdag gaan aanbied nie? Ons kan daarvan seker wees dat dit in alle opsigte nuttig sal wees. Ons kan verwag dat ons hemelse Vader, Jehovah, ons presies die regte geskenk sal gee in die vorm van aanmoediging en opleiding vir die werk wat hy ons beveel het om te doen.—2 Tim. 4:2; Jak. 1:17.