Biddende bepeinsing—Noodsaaklik vir ywerige bedienaars
1. Wat het Jesus gehelp om nie toe te laat dat sy aandag van sy vernaamste werk afgelei word nie?
1 Jesus het die hele aand lank mense genees en demone uitgedryf. Toe sy dissipels hom die volgende dag vind, het hulle gesê: “Almal soek u”, en hom aangespoor om nog kragtige werke te verrig. Maar Jesus het nie toegelaat dat sy aandag afgelei word van sy vernaamste werk om die goeie nuus te verkondig nie. Hy het geantwoord: “Laat ons êrens anders heen gaan, in die nabygeleë dorpe in, sodat ek ook daar kan preek, want daarvoor het ek uitgegaan.” Wat het Jesus gehelp om doelgerig te bly? Hy het vroeg opgestaan om te bid en te peins (Mark. 1:32-39). Hoe kan biddende bepeinsing óns ook help om ywerige predikers te wees?
2. Waaroor kan ons peins sodat ons ywerig in die bediening kan bly?
2 Waaroor kan ons peins? Jesus het gesien dat die mense “gestroop en rondgegooi [is] soos skape sonder ’n herder” (Matt. 9:36). Net so kan ons peins oor hoe nodig mense die goeie nuus het. Ons kan nadink oor die dringendheid van die tye (1 Kor. 7:29). Ons kan dink aan Jehovah se werke en eienskappe, ons voorreg om Jehovah se Getuies te wees en die kosbare geestelike skatte in God se Woord wat ons geleer het en waarvan mense in ons gebied nog nie weet nie.—Ps. 77:11-13; Jes. 43:10-12; Matt. 13:52.
3. Wanneer kan ons peins?
3 Wanneer kan ons peins? Soos Jesus staan party vroeg op wanneer dit stil is. Vir ander is dit beter om in die aand te peins voordat hulle gaan slaap (Gen. 24:63). Al het ons ’n vol program, kan ons tyd inruim vir bepeinsing. Party doen dit terwyl hulle van openbare vervoer gebruik maak. Ander gebruik ’n deel van hulle etenstyd om ongehinderd te peins. Baie vind dat selfs net ’n paar minute se bepeinsing voordat hulle aan die bediening deelneem, hulle help om met groter ywer en moed te preek.
4. Waarom moet ons peins?
4 Biddende bepeinsing sal ons begeerte vergroot om Jehovah te dien, ons help om aan ons geestelikheid voorkeur te gee en ons meer vasbeslote maak om aan te hou preek. God se Hoofbedienaar, Jesus, het baat gevind by bepeinsing, en ons sal ook.