Jehovah lei ons op vir hierdie werk
1. Wanneer Jehovah mense ’n toewysing gee, wat doen hy ook?
1 Wanneer Jehovah mense ’n toewysing gee, gee hy hulle ook die hulp wat hulle nodig het om dit uit te voer. Byvoorbeeld, toe Jehovah vir Noag gesê het om ’n ark te bou, iets wat Noag nog nooit gedoen het nie, het Hy ook vir hom gesê hoe om dit te doen (Gen. 6:14-16). Toe die sagmoedige herder Moses aangesê is om die ouer manne van Israel en Farao te nader, het Jehovah hom verseker: “Ek sal met jou mond wees en ek sal jou leer wat jy moet sê” (Eks. 4:12). Wanneer dit kom by ons toewysing om die goeie nuus te verkondig, het Jehovah ons nie aan onsself oorgelaat nie. Hy lei ons op vir hierdie werk deur middel van die Teokratiese Bedieningskool en die Diensvergadering. Hoe kan ons by hierdie opleiding baat vind?
2. Hoe kan ons by die Teokratiese Bedieningskool baat vind?
2 Die Teokratiese Bedieningskool: Gaan deur die materiaal op die rooster voordat jy elke vergadering bywoon. Wanneer jy dan sien hoe die studente hierdie inligting in hulle toesprake ontwikkel, sal jy ’n beter begrip hê van hoe om ander te leer (Spr. 27:17). Bring jou Bedieningskool-boek saam na die vergadering en gebruik dit as ’n werkboek. Wanneer die skoolopsiener ná elke studentetoespraak daarna verwys, kan jy sleutelpunte onderstreep wat jy wil toepas en aantekeninge in die kantruimte maak. Maar die beste manier om by hierdie skool baat te vind, is om daaraan deel te neem. Het jy al by die skool aangesluit? Wanneer jy ’n toewysing vir ’n toespraak ontvang, moet jy goed voorberei en die raad wat jy ontvang het, toepas. Wanneer jy in die bediening is, moet jy gebruik maak van wat jy geleer het.
3. Wat sal ons help om by die Diensvergadering baat te vind?
3 Die Diensvergadering: Ons sal die wenke wat gedurende hierdie vergadering gegee word, beter onthou as ons die materiaal vooraf deurlees en voorberei om kommentaar te lewer. As ons ons antwoorde kort hou, sal meer kan deelneem. Skenk noukeurig aandag aan die demonstrasies, en gebruik enige wenk wat jy voel jou bediening doeltreffender sal maak. Hou ’n kopie van belangrike artikels uit Ons Koninkryksbediening vir toekomstige gebruik.
4. Waarom moet ons goed gebruik maak van teokratiese opleiding?
4 Soos die toewysings wat aan Noag en Moses gegee is, is ons opdrag om die goeie nuus in die hele bewoonde aarde te verkondig, ’n moeilike taak (Matt. 24:14). Ons kan suksesvol wees as ons op Jehovah, ons Grootse Onderrigter, vertrou en goed gebruik maak van die opleiding wat hy voorsien.—Jes. 30:20.