Die belangrikste eienskap van ’n goeie onderrigter
1. Wat is die belangrikste eienskap van ’n goeie onderrigter?
1 Wat maak van iemand ’n goeie Bybelonderrigter? Sekulêre opvoeding? Ondervinding? Natuurlike vermoë? In werklikheid is dit dieselfde eienskap waardeur die Wet vervul word, waaraan Jesus se dissipels geïdentifiseer word en wat die vernaamste en aantreklikste van Jehovah se hoofeienskappe is (Joh. 13:35; Gal. 5:14; 1 Joh. 4:8). Dit is liefde. Goeie onderrigters betoon liefde.
2. Waarom is dit noodsaaklik om lief te wees vir mense?
2 Wees lief vir mense: Die Groot Leermeester, Jesus, het liefde aan mense betoon, en dit het hulle beweeg om na hom te luister (Luk. 5:12, 13; Joh. 13:1; 15:13). As ons vir mense omgee, sal ons by elke geleentheid getuig. Struikelblokke soos vervolging en onverskilligheid sal ons nie terughou nie. Ons sal opregte persoonlike belangstelling toon in diegene vir wie ons preek, en ons sal ons benadering aanpas by wat vir hulle van belang is. Ons sal nie net bereid wees om tyd opsy te sit om met elke Bybelstudent te studeer nie, maar ook om vir elke studie voor te berei.
3. Hoe sal liefde vir Bybelwaarhede ons in die bediening help?
3 Wees lief vir Bybelwaarhede: Jesus was ook lief vir Bybelwaarhede en het dit as skatte beskou (Matt. 13:52). As ons lief is vir die waarheid, sal ons met entoesiasme daaroor praat, en dit kan dié wat na ons luister, ook opgewonde maak. Sulke liefde sal ons help om eerder te fokus op die kosbare inligting wat ons meedeel as op ons persoonlike beperkings, en dan sal ons dalk minder senuweeagtig in die bediening wees.
4. Hoe kan ons liefde aankweek?
4 Kweek liefde aan: Hoe kan ons liefde vir mense aankweek? Deur na te dink oor die liefde wat Jehovah en sy Seun getoon het en die droewige geestelike toestand van mense in ons gebied (Mark. 6:34; 1 Joh. 4:10, 11). Ons liefde vir Bybelwaarhede sal toeneem deur gereelde persoonlike studie en bepeinsing. Liefde is ’n aspek van die vrug van die gees (Gal. 5:22). Ons kan Jehovah dus smeek vir heilige gees en hom vra om ons te help om groter liefde aan te kweek (Luk. 11:13; 1 Joh. 5:14). Ongeag ons sekulêre opvoeding, ondervinding in die waarheid of natuurlike vermoëns, ons kan doeltreffende Bybelonderrigters wees deur liefde te betoon.