Help mense om na God te luister
1. Watter brosjure is by die “Laat God se Koninkryk kom!”-streekbyeenkoms vrygestel, en waarom is dit so ’n nuttige hulpmiddel?
1 By die “Laat God se Koninkryk kom!”-streekbyeenkoms is ’n nuwe brosjure, Luister na God en lewe vir ewig, vrygestel. Omdat hierdie brosjure min teks bevat, kan dit vinnig en maklik vertaal word. Trouens, met die vrystelling van Luister na God en lewe vir ewig is goedkeuring gegee om dit in 431 tale te vertaal .
2. Wie sal by hierdie brosjure baat vind?
2 Veral wie sal by hierdie brosjure baat vind? Dink aan die volgende situasies wat dikwels regoor die wêreld voorkom:
• ’n Verkondiger wat tydens die eerste besoek of tydens ’n herbesoek met ’n huisbewoner gesels, kom agter dat die huisbewoner ongeletterd is of swak lees.
• ’n Verkondiger getuig vir mense wat ’n taal praat waarin ons min of geen publikasies vertaal het nie. Of die meeste mense in die gebied kan nie die taal lees wat hulle verkies om te praat nie.
• ’n Verkondiger gebruik gebaretaal om vir die dowes in sy gebied te getuig.
• ’n Ouer wil graag vir sy jong kind wat nog nie kan lees nie, die waarheid leer.
3. Hoe is Luister na God en lewe vir ewig saamgestel?
3 Hoe dit saamgestel is: Luister na God en lewe vir ewig is bedoel om met diegene bestudeer te word wat nie goed kan lees nie of wat nog leer lees. In die boonste linkerkantste hoek van die lesse, wat elk twee bladsye beslaan, is ’n vraag wat op daardie bladsye beantwoord word. Daar is kommentare en teksverwysings by die prente. Na aan die onderkantste hoek van baie bladsye is ’n gekleurde venster met addisionele punte en teksverwysings wat bespreek kan word, na gelang van die student se vermoë.
4. Wanneer en hoe kan ons hierdie brosjure aanbied?
4 Hoe om dit te gebruik: Jy kan hierdie brosjure in die huis-tot-huis-bediening aanbied wanneer jy ook al dink dit nuttig sal wees, selfs wanneer brosjures nie die aanbod vir die maand is nie. (Sien die venster “Hoe dit aangebied kan word”.) Jy kan dit tydens ’n herbesoek gebruik deur eenvoudig vir die belangstellende te sê dat jy iets het om hom te wys en vir hom ’n brosjure te gee. Wanneer julle ’n prent bespreek, kan julle die ooreenstemmende kommentare en tekste saam lees.
5. Hoe kan ons ons Bybelstudent help om vooruitgang te maak?
5 Help die student om vooruitgang te maak: Jou bespreking sal hopelik die begeerte by jou student wek om te studeer en te lees sodat hy op sy eie kennis van Jehovah kan opdoen (Matt. 5:3; Joh. 17:3). Die student sal egter nie gereed wees om gedoop te word wanneer die brosjure voltooi is nie. Jy moet die studie voortsit in die Leer Bybel-boek of in ’n ander gepaste publikasie wat hom ’n meer afgeronde begrip van die Bybel sal gee.
6. Waarom is jy dankbaar vir hierdie nuwe hulpmiddel vir die bediening?
6 Mense moet na die Soewerein van die heelal luister as hulle vir ewig wil lewe (Jes. 55:3). En Jehovah se wil is dat “alle soorte mense”, insluitende dié wat nie kan lees nie, leer hoe om na hom te luister (1 Tim. 2:3, 4). Hoe dankbaar is ons tog vir hierdie nuwe hulpmiddel wat ons kan gebruik om mense te leer hoe om na God te luister!
[Venster op bladsy 7]
Hoe dit aangebied kan word
Wys vir die huisbewoner bladsye 2-3 en sê: “Sal jy daarvan hou om in so ’n wêreld te lewe? [Wag vir ’n antwoord.] Die Skrif belowe [of, hierdie heilige boek belowe] dat God binnekort die aarde in ’n pragtige, vreedsame plek sal verander waar niemand arm of siek is nie. Let op wat ons moet doen om daar te lewe. [Lees Jesaja 55:3, wat boaan bladsy 3 verskyn.] Dit sê dat ons na God toe moet ‘kom’ en na hom moet ‘luister’. Maar hoe luister ons na God?” Blaai dan na bladsye 4-5, en bespreek die antwoord met hom. As hy nie tyd het nie, kan jy die brosjure by hom laat en reël om terug te gaan om die antwoord te bespreek.