Neem die profete as ’n voorbeeld—Sefanja
1. Onder watter omstandighede het Sefanja as ’n profeet gedien, en hoe is hy vandag vir ons ’n goeie voorbeeld?
1 Dit was die middel van die sewende eeu VHJ, en Baälaanbidding is openlik in Juda beoefen. Die slegte koning Amon is kort tevore vermoor, en die jong koning Josia het nou regeer (2 Kron. 33:21–34:1). Dit was gedurende hierdie tyd dat Jehovah Sefanja aangestel het om Sy oordeelsboodskap bekend te maak. Hoewel Sefanja moontlik ’n lid van Juda se koninklike huis was, het hy nie Jehovah se oordeelsboodskap aan Juda se leiers afgewater nie (Sef. 1:1; 3:1-4). Ons probeer om Sefanja se moed na te volg deur nie toe te laat dat familiebande ’n negatiewe uitwerking op ons aanbidding van Jehovah het nie (Matt. 10:34-37). Watter boodskap het Sefanja bekend gemaak, en met watter gevolge?
2. Wat moet ons doen om in die dag van Jehovah se toorn verberg te word?
2 Soek Jehovah: Net Jehovah kan mense in die dag van sy toorn red. Sefanja het die volk van Juda dus aangespoor om Jehovah te soek, regverdigheid te soek en sagmoedigheid te soek terwyl daar nog tyd oor was (Sef. 2:2, 3). Dit geld ook vir ons dag. Soos Sefanja, spoor ons ander aan om Jehovah te soek, maar ons moet ook optree en vasbeslote wees om nooit “daarvan [terug te trek] om Jehovah te volg” nie (Sef. 1:6). Ons soek Jehovah eerder deur sy Woord noukeurig te bestudeer en vir sy leiding te bid. Ons soek regverdigheid deur ’n sedelik rein lewe te lei. Ons soek sagmoedigheid deur ’n onderdanige gesindheid aan te kweek en deur die riglyne wat Jehovah se organisasie voorsien, gewilliglik te volg.
3. Waarom moet ons ’n positiewe gesindheid in die bediening behou?
3 Positiewe resultate: Ten minste ’n paar in Juda het positief op Sefanja se oordeelsboodskap gereageer, maar die jong Josia, wat Jehovah begin soek het toe hy ’n seun was, is waarskynlik die vernaamste voorbeeld hiervan. Josia het later ’n intensiewe veldtog teen afgodediens in die land gevoer (2 Kron. 34:2-5). Hoewel van die Koninkryksaad vandag langs die pad, op rotsagtige plekke of tussen die dorings val, val ’n deel daarvan ook op die goeie grond en dra dit vrug (Matt. 13:18-23). Ons is vol vertroue dat Jehovah sal voortgaan om ons pogings te seën terwyl ons aanhou om Koninkryksaad te versprei.—Ps. 126:6.
4. Waarom moet ons aanhou om Jehovah te verwag?
4 Party in Juda het gedink dat Jehovah nooit sou optree nie. Maar Jehovah het almal verseker dat sy groot dag naby was (Sef. 1:12, 14). Net diegene wat by hom toevlug soek, sou gered word (Sef. 3:12, 17). Mag ons, terwyl ons ‘aanhou om Jehovah te verwag’, vreugde daaruit put om ons groot God in eenheid saam met mede-aanbidders te dien!—Sef. 3:8, 9.