’n Bybelonderrigter se gereedskap
1. Hoe is Christenevangeliedienaars soos vakmanne?
1 Vakmanne gebruik verskillende soorte gereedskap. Party stukke gereedskap word slegs nou en dan vir gespesialiseerde werk gebruik, terwyl ander stukke gereedskap dikwels gebruik word. Goeie vakmanne het altyd hierdie basiese stukke gereedskap in hulle gereedskapstas, en hulle is baie behendig met hierdie gereedskap. Die Bybel spoor elke Christen aan om hom toe te lê op sy bediening en om “’n werker [te wees] wat hom oor niks hoef te skaam nie” (2 Tim. 2:15). Wat is ’n Bybelonderrigter se belangrikste stuk gereedskap? Dit is God se Woord—die vernaamste stuk gereedskap wat ons gebruik om ‘dissipels te maak’ (Matt. 28:19, 20). Daarom moet ons ons daarop toelê om “die woord van die waarheid reg [te] hanteer”. Maar daar is ander stukke gereedskap wat ons dikwels gebruik, en alle Christene moet leer om dit op ’n vaardige wyse te gebruik om mense die waarheid te leer.—Spr. 22:29.
2. Wat is ons basiese onderrigmiddels?
2 Ons basiese onderrigmiddels: Watter onderrigmiddels, buiten die Bybel, moet ons gebruik? Die vernaamste onderrigmiddel wat ons het om mense Bybelwaarhede te leer, is die boek Wat leer die Bybel werklik? Nadat ons hierdie boek met ’n student gestudeer het, gebruik ons die boek ‘Hou julle in God se liefde’ om hom te leer om Bybelbeginsels in sy daaglikse lewe toe te pas. Daarom moet ons leer om hierdie twee publikasies op ’n vaardige wyse te gebruik. Daar is ook ’n paar brosjures wat deel is van ons gereedskap. Die brosjure Goeie nuus wat van God kom! is een van die vernaamste onderrigmiddels waarmee ons Bybelstudies begin. Ons kan ook die brosjure Luister na God en lewe vir ewig gebruik as daar mense in ons gebied is wat nie goed kan lees nie of as daar geen of min publikasies in een van die plaaslike tale is. Een van ons basiese onderrigmiddels om studente na die organisasie te rig, is die brosjure Wie doen vandag Jehovah se wil? ’n Paar ander onderrigmiddels wat ons kan help om dissipels te maak en waarvan ons goed gebruik moet maak, is die video’s Waarom moet jy die Bybel studeer?, Wat gebeur by ’n Koninkryksaal? en Het God ’n naam?
3. Wat sal Ons Koninkryksbediening ons in die toekoms help om te doen?
3 In die toekoms sal artikels in Ons Koninkryksbediening verskyn wat ons sal help om ons basiese onderrigmiddels op ’n vaardige wyse te gebruik. As ons ons daarop toelê om hierdie onderrigmiddels op ’n vaardige wyse te gebruik, pas ons die geïnspireerde raad toe: “Let voortdurend op jouself en op jou onderrigting. Bly by hierdie dinge, want deur dit te doen, sal jy jouself red sowel as dié wat na jou luister.”—1 Tim. 4:16.