Hoe ons as onderrigters mense se hart kan bereik
1. Watter uitwerking het Jesus se leringe gehad op die hart van diegene wat na hom geluister het?
1 Jesus Christus het die hart bereik van diegene wat na hom geluister het. By ten minste een geleentheid het die hart van sy dissipels “gebrand” nadat hy vir hulle die betekenis van die Skrif heeltemal duidelik gemaak het (Luk. 24:32). Gehoorsaamheid aan God moet uit die hart kom. Hoe kan ons dus mense se emosies wek sodat hulle gemotiveerd sal voel om veranderinge in hulle lewe te maak?—Rom. 6:17.
2. Watter rol speel takt en onderskeidingsvermoë daarin om ’n persoon se hart te bereik?
2 Wees taktvol en gebruik onderskeidingsvermoë: Baie mense sal nie tot optrede beweeg word as ons eenvoudig vir hulle sê wat reg en verkeerd is nie. Om die waarheid te sê, as ons hulle godsdiensoortuigings aanval deur hulle te bombardeer met tekste, kan dit hulle selfs belangstelling laat verloor. Om iemand te motiveer, moet ons eers die redes verstaan waarom hy sekere dinge glo en op ’n sekere manier optree. Taktvolle, goed gekose beskouingsvrae sal hom aanmoedig om te sê hoe hy werklik voel (Spr. 20:5). Dan eers kan ons inligting uit God se Woord kies wat moontlik sy hart sal raak. Daarom moet ons persoonlike belangstelling toon en geduldig wees (Spr. 25:15). Onthou dat mense nie ewe vinnig geestelik vorder nie. Gee Jehovah se heilige gees kans om hulle denke en optrede te beïnvloed.—Mark. 4:26-29.
3. Hoe kan ons mense help om positiewe eienskappe aan te kweek?
3 Help hulle om positiewe eienskappe aan te kweek: Skrifgedeeltes wat ons meer oor Jehovah se goedheid en liefde leer, kan mense help om positiewe eienskappe aan te kweek. Ons kan tekste soos Psalm 139:1-4 of Lukas 12:6, 7 gebruik om te toon hoeveel God in elkeen van ons belangstel. Wanneer mense opregte waardering vir Jehovah se onverdiende goedhartigheid aankweek, sal hulle liewer vir God word en meer toegewyd aan hom wees (Rom. 5:6-8; 1 Joh. 4:19). En wanneer hulle leer dat hulle gedrag Jehovah se gevoelens raak, sal hulle dalk beweeg word om op ’n manier op te tree wat hom gelukkig sal maak en sal eer.—Ps. 78:40, 41; Spr. 23:15.
4. Hoe kan ons respek toon vir mense se keusevryheid wanneer ons hulle in die bediening leer?
4 Jehovah dwing niemand om aan hom gehoorsaam te wees nie. Hy probeer hulle eerder tot optrede aanspoor deur vir hulle te toon hoe verstandig dit is om sy raad te volg (Jes. 48:17, 18). Ons volg Jehovah na wanneer ons onderrigtingsmetodes gebruik wat mense help om hulle eie gevolgtrekkings te maak. Wanneer mense hulleself oortuig dat hulle veranderinge in hulle lewe moet aanbring, het dit ’n blywende uitwerking op hulle (Rom. 12:2). Dit bring hulle ook al hoe nader aan “die ondersoeker van harte”, Jehovah.—Spr. 17:3.