Ons werk saam om in veeltalige gebied te preek

Wanneer mense die Koninkryksboodskap in hulle moedertaal hoor, luister hulle dikwels makliker daarna. Dit is dalk hoekom Jehovah op Pinkster 33 HJ gereël het dat ‘godvresende Jode uit elke nasie van dié onder die hemel’ die goeie nuus in hulle “eie taal” hoor, al het hulle waarskynlik ’n taal gepraat wat die meeste mense verstaan het, soos Hebreeus of Grieks (Han 2:5, 8). Vandag is daar baie veeltalige gebiede. Gemeentes in hierdie gebiede wat vergaderinge in verskillende tale hou, moet dalk in dieselfde buurt velddiens doen. Hoe kan verkondigers in hierdie gemeentes met mekaar saamwerk sodat hulle vir almal kan getuig sonder om te veel in dieselfde gebied te werk en die huisbewoners kwaad te maak?

• 

  Sit koppe bymekaar (Spr 15:22): Diensopsieners moet met mekaar praat en ’n stelsel kry wat vir almal werk om die goeie nuus te versprei. Waar anderstalige gemeentes se gebied klein is, sal hulle waarskynlik vra dat julle die huise in hulle gebied oorslaan waar die mense daardie gemeente se taal praat. Maar as hulle gebied baie groot en verspreid is en hulle dit nie gereeld kan dek nie, verkies hulle dalk dat julle nie enige huise oorslaan nie, maar dat julle vir hulle die name moet gee van enige belangstellendes in hulle gebied (od 92-93 ¶37). Of hulle vra julle gemeente dalk vir hulp om mense te vind wat die taal van hulle gemeente praat wie se adresse na hulle gebied oorgedra kan word (km 7/12 5, venster). Hou in gedagte dat daar partykeer meer as een taal in ’n huis gepraat word. Wanneer die gebied gedek word, moet ons sorg dat ons nie die wette oortree wat mense se inligting beskerm nie.

• 

  Werk saam (Ef 4:16): Bly getrou by enige riglyne wat julle diensopsiener vir julle gee. Verkies jou Bybelstudent ’n taal wat nie julle gemeente se taal is nie? Die student sal dalk vinniger vorder as jy die studie oorgee aan ’n nabygeleë gemeente of groep wat sy taal praat.

• 

  Berei voor (Spr 15:28; 16:1): As die huisbewoner in julle gebied ’n ander taal praat, moet jy jou bes doen om die goeie nuus aan hom te verkondig. Wanneer jy voorberei, kan jy dink aan die tale wat daar in julle gebied gepraat word en dan voor die tyd Bybels en video’s in daardie tale op jou elektroniese toestel aflaai. Jy kan ook die JW Language-app gebruik om te leer hoe om iemand in daardie tale te groet.