Liefde en waardering vir Jehovah lei tot doop

1-2. Wat het die Etiopiese eunug volgens Handelinge 8:27-31, 35-38 gemotiveer om gedoop te word?

WIL jy as ’n dissipel van Christus gedoop word? Liefde en waardering het baie mense al gemotiveer om daardie besluit te maak. Dink aan die voorbeeld van ’n hofbeampte wat die koningin van Etiopië gedien het.

² Die Etiopiër het dadelik gereageer op wat hy uit die Skrif geleer het. (Lees Handelinge 8:27-31, 35-38.) Wat het hom gemotiveer? Dit is duidelik dat hy God se Woord waardeer het, want hy was besig om uit die boek Jesaja te lees toe hy in ’n strydwa gery het. En toe Filippus met hom gepraat het, het die man baie dankbaar geword vir wat Jesus vir hom gedoen het. Maar hoekom het die hofbeampte na Jerusalem toe gegaan? Omdat hy alreeds ’n liefde vir Jehovah ontwikkel het. Hoe weet ons dit? Hy was besig om Jehovah te aanbid in Jerusalem. Hierdie man het blykbaar sy godsdiens verlaat en het deel geword van die enigste nasie wat aan die ware God toegewy was. Dit was hierdie liefde vir Jehovah wat hom gemotiveer het om nog ’n belangrike stap te neem – om gedoop te word en ’n dissipel van Christus te word. – Matt. 28:19.

3. Wat kan ’n persoon dalk keer om gedoop te word? (Sien die venster “Wat is in jou hart?”)

³ Liefde vir Jehovah kan jou motiveer om gedoop te word. Maar liefde kan jou ook keer om dit te doen. Hoe? Kyk na net ’n paar voorbeelde. Jy is dalk baie lief vir jou ongelowige familie en vriende en jy is dalk bang dat hulle jou sal haat as jy gedoop word (Matt. 10:37). Of jy is dalk lief om dinge te doen wat jy weet God haat en jy vind dit dalk moeilik om daarmee op te hou (Ps. 97:10). Of jy het dalk in ’n huis grootgeword waar julle vakansiedae gevier het wat deel is van valse godsdiens. Jy is dalk lief vir die goeie herinneringe van daardie tye. En daarom vind jy dit dalk moeilik om op te hou met hierdie gebruike wat Jehovah ongelukkig maak (1 Kor. 10:20, 21). So jy moet besluit: “Wie of wat het ek die meeste lief?”

DIE BELANGRIKSTE LIEFDE

4. Wat is die belangrikste rede om gedoop te word?

⁴ Daar is baie goeie dinge wat jy kan liefhê en waardeer. Byvoorbeeld, nog voordat jy met Jehovah se Getuies gestudeer het, het jy dalk alreeds diep waardering vir die Bybel gehad. En jy het dalk ’n liefde vir Jesus ontwikkel. En noudat jy Jehovah se Getuies leer ken het, is jy lief daarvoor om tyd met hulle te spandeer. Maar net omdat jy hierdie goeie dinge liefhet, beteken nie dat jy jouself aan Jehovah wil toewy en gedoop wil word nie. Die hoofrede wat jou sal motiveer om gedoop te word, is liefde vir Jehovah God. Wanneer jy Jehovah meer as enigiets anders liefhet, sal jy nie toelaat dat enigiets of enigiemand jou keer om hom te dien nie. Liefde vir Jehovah sal jou help om gedoop te word en dit sal jou ook help om getrou te bly nadat jy gedoop is.

5. Watter vrae sal ons bespreek?

⁵ Jesus het gesê dat ons Jehovah met ons hele hart, siel, verstand en al ons krag moet liefhê (Mark. 12:30). Hoe kan jy leer om Jehovah op hierdie manier lief te hê en te respekteer? As ons dink aan hoe baie Jehovah ons liefhet, sal dit ons help om hom lief te hê (1 Joh. 4:19). Watter ander dinge sal volg wanneer jy hierdie belangrike liefde ontwikkel?b

6. Wat is volgens Romeine 1:20 een manier hoe jy Jehovah kan leer ken?

⁶ Leer ken Jehovah deur middel van sy skepping. (Lees Romeine 1:20; Op. 4:11.) Dink aan die plante en diere wat Jehovah gemaak het en hoe jy sy wysheid daarin kan sien. Leer ’n bietjie meer oor die wonderlike manier waarop jou liggaam gemaak is (Ps. 139:14). En dink aan al die energie wat in ons son is wat Jehovah gemaak het en dat dit net een van miljarde sterre isc (Jes. 40:26). Wanneer jy dit doen, sal jy Jehovah al hoe meer respekteer. Dit is belangrik om te weet dat Jehovah kragtig en wys is. Maar om jou liefde vir Jehovah te versterk en om sy vriend te word, moet jy meer omtrent hom weet.

7. Waarvan moet jy oortuig wees om ’n sterk liefde vir Jehovah te hê?

⁷ Jy moet oortuig wees dat Jehovah vir jou persoonlik omgee. Is dit vir jou moeilik om te glo dat die Skepper van die hemel en die aarde jou raaksien en vir jou omgee? As jy so voel, onthou dat Jehovah “nie ver van elkeen van ons af [is] nie” (Hand. 17:26-28). Hy “deursoek alle harte” en hy belowe jou dat “as jy hom soek, sal hy sorg dat jy hom vind” (1 Kron. 28:9). Om die waarheid te sê, die rede hoekom jy nou die Bybel studeer, is soos Jehovah gesê het: ‘Ek het jou na my toe getrek’ (Jer. 31:3). Hoe meer jy die dinge waardeer wat Jehovah vir jou gedoen het, hoe sterker sal jou liefde vir hom word.

8. Hoe kan jy wys dat jy dankbaar is vir Jehovah se liefde?

⁸ Een manier hoe jy kan wys dat jy dankbaar is vir Jehovah se liefde, is deur met hom in gebed te praat. Jou liefde vir God sal sterker word as jy vir hom vertel wat jou bekommer en vir hom dankie sê vir alles wat hy vir jou doen. En die verhouding tussen jou en Jehovah sal sterker word wanneer jy sien hoe hy jou gebede beantwoord (Ps. 116:1). Jy sal daarvan oortuig wees dat hy jou verstaan. Maar om nader aan Jehovah te kom, moet jy verstaan hoe hy dink. En jy moet weet wat hy van jou verwag. Die enigste manier hoe jy hierdie dinge sal leer, is deur sy Woord, die Bybel, te studeer.

9. Hoe kan jy wys dat jy die Bybel waardeer?

⁹ Leer om God se Woord, die Bybel, te waardeer. Die waarheid omtrent Jehovah en wat hy vir jou wil hê, kan net in die Bybel gevind word. Jy wys dat jy waardering het vir die Bybel deur dit elke dag te lees, voor te berei vir jou Bybelstudie en toe te pas wat jy leer (Ps. 119:97, 99; Joh. 17:17). Het jy ’n skedule vir persoonlike Bybellees? Maak jy seker dat jy daardie skedule volg en elke dag jou Bybel lees?

10. Wat is een van die dinge wat die Bybel baie spesiaal maak?

¹⁰ Een van die dinge wat die Bybel baie spesiaal maak, is dat dit verslae bevat van mense wat self vir Jesus gesien en gehoor het. Dit is die enigste akkurate boek wat verduidelik wat Jesus vir jou gedoen het. Wanneer jy leer wat Jesus gesê en gedoen het, sal jy ’n vriendskap met hom wil hê.

11. Hoe kan jy leer om Jehovah lief te hê?

¹¹ Leer om Jesus lief te hê en dan sal jou liefde vir Jehovah sterker word. Hoekom? Omdat Jesus sy Vader se eienskappe perfek navolg (Joh. 14:9). So hoe meer jy oor Jesus leer, hoe beter sal jy Jehovah verstaan en hoe meer sal jy Hom waardeer. Dink aan die meegevoel wat Jesus teenoor persone gewys het, persone waarop ander neergesien het omdat hulle arm, siek en swak was. Dink ook aan die praktiese raad wat hy vir jou gee en hoe dit jou lewe verbeter wanneer jy na hom luister. – Matt. 5:1-11; 7:24-27.

12. Wat sal jy wil doen wanneer jy Jesus leer ken?

¹² Jou liefde vir Jesus sal waarskynlik sterker word wanneer jy nadink oor die opoffering wat hy gemaak het sodat ons sondes vergewe kan word (Matt. 20:28). Wanneer jy besef dat Jesus bereid was om vir jou te sterf, sal jy dalk jammer voel oor die verkeerde dinge wat jy gedoen het en Jehovah wil vra om jou te vergewe (Hand. 3:19, 20; 1 Joh. 1:9). En wanneer jou liefde vir Jesus en Jehovah sterker word, sal jy vriende wil wees met mense wat dieselfde voel.

13. Wat het Jehovah vir jou gegee?

¹³ Leer om Jehovah se familie lief te hê. Jou ongelowige familie en ou vriende sal dalk nie verstaan hoekom jy jouself aan Jehovah wil toewy nie. Hulle sal jou dalk selfs probeer keer. Jehovah sal jou help deur vir jou broers en susters in die gemeente te gee wat soos jou familie sal word. As jy na aan hierdie geestelike familie bly, sal jy die liefde en ondersteuning vind wat jy nodig het (Mark. 10:29, 30; Heb. 10:24, 25). En later sal jou familielede dalk saam met jou Jehovah dien en hom gehoorsaam. – 1 Pet. 2:12.

14. Wat het jy volgens 1 Johannes 5:3 oor Jehovah se standaarde geleer?

¹⁴ Leer om Jehovah se standaarde te waardeer en toe te pas. Voordat jy Jehovah leer ken het, het jy dalk vir jouself besluit wat reg en verkeerd is, maar nou sien jy dat Jehovah se standaarde beter is. (Ps. 1:1-3; lees 1 Johannes 5:3.) Dink aan die raad wat die Bybel vir mans, vrouens, ouers en kinders gee (Ef. 5:22–6:4). Is jou gesin gelukkiger omdat jy gehoorsaam is aan hierdie raad? Is jy ’n beter persoon omdat jy gehoorsaam is aan Jehovah se raad oor watter soort vriende jy moet hê? Is jy gelukkiger? (Spr. 13:20; 1 Kor. 15:33). Die antwoorde op hierdie vrae is waarskynlik ja.

15. Wat kan jy doen as jy hulp nodig het om Bybelbeginsels toe te pas?

¹⁵ Soms is dit dalk vir jou moeilik om te weet hoe om die Bybelbeginsels toe te pas wat jy leer. Daarom gebruik Jehovah sy organisasie om vir jou Bybelpublikasies te gee wat jou kan help om te sien wat die verskil tussen reg en verkeerd is (Heb. 5:13, 14). Wanneer jy hierdie publikasies lees en studeer, sal jy sien hoe prakties en spesifiek dit is en jy sal heel moontlik deel van Jehovah se organisasie wil wees.

16. Hoe het Jehovah sy volk georganiseer?

¹⁶ Leer om Jehovah se organisasie lief te hê en te ondersteun. Jehovah het sy volk in gemeentes georganiseer; sy Seun, Jesus, is die hoof van die gemeentes (Ef. 1:22; 5:23). Jesus het ’n klein groepie gesalfde manne aangestel om die leiding te neem om die werk wat hy vandag gedoen wil hê, te organiseer. Jesus het na hierdie groep manne as “die getroue en verstandige slaaf” verwys. Hulle neem hulle verantwoordelikheid ernstig op om jou te help om nader aan God te kom en jou verhouding met hom te beskerm (Matt. 24:45-47). Een manier waarop die getroue slaaf jou help, is deur te sorg dat ouermanne aangestel word wat jou kan lei en beskerm (Jes. 32:1, 2; Heb. 13:17; 1 Pet. 5:2, 3). Die ouermanne is bereid om so veel as moontlik te doen om jou te vertroos en te help om nader aan Jehovah te kom. Maar een van die belangrikste dinge wat hulle vir jou kan doen, is om jou te help om ander van Jehovah te leer. – Ef. 4:11-13.

17. Hoekom praat ons met ander oor Jehovah, volgens Romeine 10:10, 13, 14?

¹⁷ Help ander om te leer om Jehovah lief te hê. Jesus het vir sy volgelinge gesê om ander oor Jehovah te leer (Matt. 28:19, 20). Dit is vir ons moontlik om hierdie opdrag te gehoorsaam omdat ons weet dat ons dit moet doen. Maar wanneer jou liefde vir Jehovah sterker word, sal jy soos die apostels Petrus en Johannes voel, wat gesê het: “Ons kan nie ophou praat oor die dinge wat ons gesien en gehoor het nie” (Hand. 4:20). Daar is min dinge wat ons so gelukkig maak as om iemand te help om lief te word vir Jehovah. Dink net hoe bly dit die evangeliedienaar Filippus gemaak het om die Etiopiër te help om die waarheid in die Skrif te leer en om gedoop te word! Wanneer jy Filippus navolg en gehoorsaam is aan Jesus se opdrag om te preek, wys jy dat jy een van Jehovah se Getuies wil wees. (Lees Romeine 10:10, 13, 14.) En dan sal jy heel moontlik dieselfde vraag vra wat die Etiopiër gevra het: “Wat keer my om gedoop te word?” – Hand. 8:36.

18. Wat sal ons in die volgende artikel bespreek?

¹⁸ Jy sal die belangrikste stap in jou lewe neem wanneer jy besluit om gedoop te word. Omdat dit so ’n belangrike stap is, moet jy mooi dink oor wat dit beteken om gedoop te word. Wat moet jy oor doop weet? Wat moet jy voor en ná jou doop doen? Hierdie vrae sal in die volgende artikel bespreek word.