3 | Hoe Bybelvoorbeelde jou kan help

DIE BYBEL BESKRYF . . . Getroue mans en vrouens wat “gevoelens soos ons s’n” ondervind het. – JAKOBUS 5:17.

Wat dit beteken

Die Bybel se bladsye is vol ware verhale van mans en vrouens wat baie verskillende emosies ondervind het. Wanneer ons hulle ondervindinge lees, vind ons dalk ’n Bybelkarakter wie se gevoelens ons kan verstaan.

Hoe dit kan help

Ons almal wil voel dat ander ons verstaan. Maar dit is veral die geval wanneer ons met ons verstandelike gesondheid sukkel. Wanneer ons die Bybel lees, leer ons van ander wat dieselfde gedagtes en gevoelens as ons gehad het. Dan besef ons dat ons nie alleen is wanneer ons deur moeilike tye gaan nie, en ons voel minder alleen wanneer ons angstig is en pynlike emosies ondervind.

Daar is baie voorbeelde in die Bybel van dié wat hulpeloos en desperaat gevoel het. Het jy al ooit gevoel: ‘Ek kan dit nie meer vat nie’? Moses het so gevoel, sowel as Elia en Dawid. – Numeri 11:14; 1 Konings 19:4; Psalm 55:4.
Die Bybel praat van ’n vrou met die naam Hanna wat “bitter hartseer” was omdat sy nie kinders kon hê nie en omdat haar man se ander vrou haar erg uitgetart het. – 1 Samuel 1:6, 10.
Die Bybel praat van ’n man met die naam Job wie se gevoelens ons kan verstaan. Al was hy ’n man van geloof, het hy verskriklike emosionele pyn ondervind, en hy het eenkeer gesê: “Ek haat my lewe; ek wil nie meer lewe nie.” – Job 7:16.

Wanneer ons leer hoe hierdie Bybelkarakters hulle negatiewe denkpatrone suksesvol hanteer het, kan ons ook die krag vind wat ons nodig het om ons angstige emosies te hanteer.

Hoe die Bybel help – Kevin

Hoe bipolêre versteuring my affekteer

“Ek was in my laat veertigs toe ek met bipolêre versteuring gediagnoseer is. Soms voel ek dat ek enige iets kan hanteer wat op my pad kom. Maar ander kere voel ek dat dit nie die moeite werd is om te lewe nie.”

Hoe die Bybel my help

“Een Bybelkarakter wie se gevoelens ek kan verstaan, is die apostel Petrus s’n. Hy het foute gemaak wat veroorsaak het dat hy waardeloos voel. Maar eerder as om so te bly dink, het Petrus homself omring met vriende wat vir hom omgegee het. Wanneer ek ’n slegte dag het as gevolg van my bipolêre versteuring, kan my eie onvolmaakthede my oorweldig en my waardeloos laat voel. Soos Petrus het ek geleer om na aan my vriende te probeer bly wat my wil help om nie op te gee nie.

“Nog ’n Bybelkarakter wat my baie vertroos, is koning Dawid. Hy het baie keer depressief gevoel oor sy situasie en spyt gevoel oor sy vorige foute. Ek kan sy gevoelens verstaan omdat ek soms dinge doen of sê waaroor ek spyt is. Dawid se woorde in Psalm 51 vertroos my. In vers 3 sê Dawid: ‘Ek is deeglik bewus van my oortredings, en ek dink heeltyd aan my sonde.’ Dit beskryf regtig hoe ek in my donkerste oomblikke voel omdat dit moeilik kan wees om ’n positiewe beskouing van myself te hê. Maar ek verstaan ook Dawid se woorde in vers 10: ‘Skep ’n suiwer hart in my, o God, en plaas ’n nuwe, standvastige gees in my.’ Ek gebruik soortgelyke woorde om God te smeek om my te help om myself anders te beskou. Laastens, vers 17 vertroos my. Dit sê: ‘God . . . sal nie ’n gebroke en verpletterde hart verwerp nie.’ Hierdie vers verseker my dat God my liefhet.

“Deur te fokus op Bybelvoorbeelde en op wat God my nou gegee het, versterk ek my hoop vir die toekoms. Die Bybel se beloftes word ’n werklikheid vir my, en dit help my om aan die gang te bly.”