GLANSPUNTE VAN DIE AFGELOPE JAAR

Verslag oor regsaangeleenthede

Die apostel Paulus het Christene aangespoor: “Dink aan dié in gevangenisboeie asof julle saam met hulle geboei is” (Heb. 13:3). As Jehovah se knegte hou ons ons getroue broers en susters voortdurend in gedagte en bid ons aangaande “almal wat ’n hoë posisie beklee, sodat ons kan voortgaan om ’n kalm en stil lewe met volkome godvrugtige toegewydheid en erns te lei”.—1 Tim. 2:1, 2, vtn. in NW; Ef. 6:18.

Hier volg ’n paar van die regsgeskille waarvoor Jehovah se Getuies oor die afgelope jaar te staan gekom het:

Ons broers in Rusland gaan ‘sonder ophou voort om te leer en die goeie nuus bekend te maak’ ten spyte van ’n volgehoue kampanje deur die Russies-Ortodokse Kerk en party regeringsamptenare om ons bedrywighede stop te sit (Hand. 5:42). Die Russiese owerheid hou aan om ’n vae wet in verband met ekstremisme, wat oorspronklik bedoel was om terrorisme teë te werk, verkeerdelik toe te pas—op ons publikasies en ons broers as individue. Volgens Russiese howe bevat ongeveer 70 van ons publikasies dus “ekstremistiese” stellings, en regeringsamptenare het hierdie publikasies gevoeg by ’n nasionale lys van verbode ekstremistiese lektuur. Op grond van hierdie sogenaamde gevaar doen party plaaslike owerhede klopjagte op Koninkryksale en die huise van ons broers om die publikasies te vind. Baie Getuies word deur die polisie aangehou, en hulle foto’s en vingerafdrukke word geneem omdat hulle aan die bediening deelneem. En die polisie probeer dikwels ons broers intimideer terwyl hulle by die polisiestasie aangehou word.

Vanaf Mei 2013 het 16 broers en susters in die stad Taganrog voor die hof verskyn omdat hulle Christelike vergaderinge organiseer, bywoon en daaraan deelneem en die predikingswerk doen. Dit is die eerste keer sedert die val van die Sowjetunie dat kriminele aanklagte teen Getuies ingebring is omdat hulle hulle geloof beoefen. Owerhede op ander plekke in Rusland probeer die howe oorreed om ons lektuur as “ekstremisties” te verklaar en probeer ons broers aankla as misdadigers wat skuldig is aan godsdienshaat.

Die toestande wat ons broers en susters in Eritrea moet verduur, het nie verbeter nie. In Julie 2013 was daar 52 in die gevangenis, insluitende agt broers wat ouer as 70 is sowel as ses susters. Drie broers, Paulos Eyassu, Isaac Mogos en Negede Teklemariam, is al sedert 24 September 1994 in die gevangenis vir hulle neutrale standpunt ten opsigte van militêre diens.

Meer as die helfte van die gevangenes is in die Meiter-gevangeniskamp, wat in die woestyngebied noord van die hoofstad, Asmara, geleë is. Van Oktober 2011 tot Augustus 2012 het die owerheid 25 van ons broers gestraf deur hulle in ’n sinkgebou op te sluit wat gedeeltelik onder die grond is. In die somer laat die wagte die gevangenes gedurende die dag uit, aangesien die gebou bloedig warm raak. Maar die broers kry nie genoeg kos en water nie, en hulle gesondheid ly baie daaronder. Dit is tragies dat Yohannes Haile, ’n 68-jarige broer, in Augustus 2012 weens hierdie mishandeling gesterf het, soos die geval was met broer Misghina Gebretinsae in 2011.

Gewetensbeswaar teen nieneutrale diens

Gebaseer op Jesaja 2:4 en Johannes 18:36.

ARMENIË

Op 27 November 2012 het die Europese Hof van Menseregte (EHMR) ’n gunstige uitspraak gelewer in die saak Khachatryan en ander v. Armenië. Die regering het onwettige strafsake teen 17 Getuies aanhangig gemaak omdat hulle geweier het om alternatiewe burgerlike diens onder die beheer van die weermag te verrig. Armenië het vergoeding aan die slagoffers van hierdie onwettige optrede betaal, sowel as hulle regskoste.

Ondanks die gunstige uitspraak in Khachatryan en ander v. Armenië en die vroeëre mylpaalbeslissing in Bayatyan v. Armenië, sowel as latere beslissings deur die EHMR, het die Armeense regering aangehou om jong Getuie-gewetensbeswaardes geregtelik te vervolg en skuldig te bevind. Maar op 8 Junie 2013 het die regering die Wet op Alternatiewe Diens gewysig, wat blykbaar tot gevolg sal hê dat die weermag nie meer beheer en toesig oor alternatiewe diens sal hê nie. Alle Getuie-gewetensbeswaardes wat in die tronk was, is op 12 November 2013 vrygelaat, en jong Getuiemans se aansoeke om alternatiewe diens te doen, word goedgekeur.

SUID-KOREA

Op 31 Oktober 2013 was daar 602 broers in die tronk. Sedert 1950 het die owerheid in Suid-Korea 17 605 Getuies van Jehovah tot altesaam 34 184 jaar gevangenisstraf gevonnis omdat hulle gewetensgetrou geweier het om militêre diens te verrig.

Tot onlangs toe is baie Getuiegevangenes saam met misdadigers, selfs ernstige oortreders, in dieselfde tronkselle aangehou. Maar ’n afvaardiging van broers het die hoof van die Koreaanse Korrektiewe Diens besoek om die gevangenisbestuur te vra om ons broers van die ander gevangenes te skei. Die gevangenisowerheid het gou opgetree en het die meeste van ons broers van misdadigers geskei, en teen April 2013 was ten minste 75 persent van die broers in die tronk saam met drie of vier ander broers in ’n sel. Watter uitwerking het hierdie verandering op ons broers gehad?

“Ons word nie meer aan negatiewe invloede soos onsedelikheid en skeltaal blootgestel nie”, sê een broer. ’n Ander het gesê: “Nou geniet ons wedersydse aanmoediging en kan ons elke week al vyf vergaderinge hou.”

Intussen word 56 mans wat uit die weermag ontslaan is en by die reserwemag aangesluit het en wat later Getuies geword het, herhaaldelik aangekla, beboet en aangehou omdat hulle beswaar aanteken wanneer hulle vir militêre opleiding opgeroep word. Hulle word elke jaar dikwels opgeroep, en dit gebeur tot agt jaar lank. Dit is baie moeilik om hierdie onregverdige behandeling te verduur waaraan hulle aanhoudend onderwerp word.

SINGAPOER

Ondanks herhaaldelike versoeke om alternatiewe burgerlike diens te verrig, dien 12 broers elkeen tronkstraf van 39 maande in ’n militêre detensiekaserne uit. ’n Ander broer dien tronkstraf van ’n jaar uit omdat hy geweier het om militêre diens vir die reserwemag te doen.

TURKMENISTAN

Nege Getuiemans wat as gewetensbeswaardes in die tronk is, dien tronkstraf van 18 maande tot twee jaar uit en word dikwels wreed deur tronkbewaarders en soldate geslaan. Wanneer hierdie Getuies vrygelaat word, word hulle dikwels weer geregtelik vervolg deur die owerheid. Dan word hulle as “gewoontemisdadigers” geklassifiseer en ontvang hulle strenger behandeling in die tronk. Die advokate van tien Getuies wat geweier het om militêre diens te doen, het klagte by die Verenigde Nasies se Menseregtekomitee ingedien.

Gewetensbeswaar teen patriotiese seremonies

Gebaseer op Daniël 3:16-18.

Tanzanië: Nadat hierdie jong Getuies vrygespreek is, kon hulle hulle skoolloopbaan voortsit

TANZANIË

Die Appèlhof in Dar es Salaam, Tanzanië se hoogste hof, het ’n eenstemmige beslissing bereik dat die optrede van ’n skoolraad ontoelaatbaar was toe hulle vyf leerders uit die skool gesit het en 122 leerders geskors het omdat hulle geweier het om die volkslied te sing. In ’n uitspraak wat op 12 Julie 2013 gelewer is, het die hof die opregtheid van die geloof van die Getuieleerders erken, asook hulle grondwetlike reg op gewetensvryheid en godsdiensvryheid. Die vasbeslotenheid van hierdie jongmense om aan God lojaal te bly, het ’n oorwinning tot gevolg gehad wat Jehovah se naam tot eer strek en ons godsdiensvryheid in Tanzanië beskerm.

Vrye meningsuiting

Gebaseer op Handelinge 4:19, 20.

KAZAKSTAN

In ’n “deskundige studie” wat deur die Streekdepartement van Godsdiensaangeleenthede gedoen is, is ’n aantal van ons publikasies as “ekstremisties” verklaar en is daar aangevoer dat dit maatskaplike en godsdiensonenigheid bevorder. Op 6 April 2013 het die polisie in die stad Karabalyk lektuur gekonfiskeer toe hulle ’n ongemagtigde klopjag op ’n huis gedoen het terwyl ’n gemeentelike vergadering daar gehou is. Op 3 Julie 2013 het die Ekonomiese Hof in Astana ’n beslissing gehandhaaf om tien van ons publikasies te verbied, en sodoende sensor en beperk dit steeds die invoer van ons lektuur. Wat meer is, vanaf Desember 2012 het staatsamptenare ’n aantal van ons broers in hegtenis geneem en skuldig bevind aan sogenaamde onwettige sendingbedrywighede. Op 28 Maart 2013 het die Agentskap vir Godsdienssake die Streekgodsdienssentrum van Jehovah se Getuies beveel om alle Getuies van Jehovah in Kazakstan in kennis te stel dat dit onwettig is om buite hulle geregistreerde plekke van aanbidding te preek. Sedert Julie 2013 het die owerheid hofsake teen 21 van ons broers en susters aanhangig gemaak.

Reg van vergadering en vereniging

Gebaseer op Hebreërs 10:24, 25.

AZERBEIDJAN

In Januarie 2010 het die Staatskomitee vir Godsdiensverenigings die Godsdiensgemeenskap van Jehovah se Getuies se aansoek om herregistrasie afgekeur weens sogenaamde tegniese foute. Ondanks herhaalde pogings deur Jehovah se Getuies om die sogenaamde foute reg te stel, weier die owerheid steeds die herregistrasie. Op 31 Julie 2012 het ons broers hierdie saak onder die aandag van die EHMR gebring en aangevoer dat die regering ons godsdiensvryheid geskend het toe hulle, sonder wetlike gronde, geweier het om die Getuies weer as ’n godsdiensvereniging te registreer. Sonder registrasie geniet ons broers nie die voordele van wetlike status nie.

Persoonlike vryheid en veiligheid asook veiligheid van eiendom

Gebaseer op Filippense 1:7.

DIE OEKRAÏNE

Hoewel die Getuies in die Oekraïne godsdiensvryheid geniet, is hulle aangerand, hulle eiendom aan die brand gesteek en is Koninkryksale deur vandale beskadig. Die wetstoepassingsinstansies stel egter nie behoorlik ondersoek in nie, en niemand word doeltreffend vervolg nie. Dit is nie verbasend dat dit teenstanders laat dink dat hulle ongestraf sal bly nie. Gevolglik was daar ’n toename in die aantal misdade wat in 2012 en 2013 teen ons broers gepleeg is. Voorvalle van vandalisme en brandstigting het toegeneem van 5 in 2010 tot 15 in 2011, 50 in 2012 en 23 gedurende die eerste vyf maande van 2013. Die takkantoor gaan hierdie onregte onder die aandag van die Verenigde Nasies se Menseregtekomitee bring.

Die Oekraïne: Ons broers tref voorbereidings om hierdie Koninkryksaal te herbou nadat dit deur vandale beskadig en aan die brand gesteek is

Selfbeskikkingsreg

Gebaseer op Handelinge 5:29 and Handelinge 15:28, 29.

ARGENTINIË

In die lente van 2012 is Pablo Albarracini, ’n onskuldige toeskouer gedurende ’n rooftog, ’n hele paar keer geskiet, en hy was bewusteloos toe daar met hom na die hospitaal gejaag is. Hy het ’n blywende volmag onderteken waarin hy behandeling weier wat die gebruik van bloedprodukte behels. Hoewel die hospitaal broer Albarracini se besluit gerespekteer het, het ’n familielid wat nie ’n Getuie is nie, ’n hofbevel vir ’n bloedoortapping probeer verkry deur aan te voer dat dit nodig was om sy lewe te red. Maar Argentinië se Hooggeregshof het ten gunste van broer Albarracini uitspraak gelewer en sy reg gerespekteer om oor sy mediese sorg te besluit, selfs terwyl hy bewusteloos is. Hy het nie ’n bloedoortapping ontvang nie en het heeltemal herstel. Hy was dankbaar dat Jehovah hom gehelp het om sy onkreukbaarheid in verband met hierdie belangrike kwessie te handhaaf.

Slagoffers van godsdiensdiskriminasie

Gebaseer op Lukas 21:12-17.

KIRGISTAN

Op 16 April 2013 het ’n hof uitspraak gelewer ten gunste van ons broers in Toktogul, waar ’n Koninkryksaal twee keer deur plaaslike inwoners vernietig is. Die hof het die oortreders skuldig bevind en hulle beveel om vergoeding te betaal. Dié wat hoofsaaklik vir die eerste aanval verantwoordelik is, word geregtelik vervolg, wat die hoop bied dat die probleme in hierdie gebied tot ’n einde sal kom. Intussen sal die gemeentes die Koninkryksaal herbou.

Kirgistan: Hierdie Koninkryksaal is twee keer deur plaaslike inwoners vernietig

Belangrike regsoorwinnings

Die geskil: Moet ’n godsdiensgroep toestemming verkry om byeenkomste en gemeentelike vergaderinge te hou?

Die beslissing: Op 5 Desember 2012 het die Konstitusionele Hof van die Russiese Federasie bevestig dat die Russiese Grondwet godsdiensvryheid waarborg en het dit beslis dat ons broers godsdiensvergaderinge kan hou sonder om die owerheid vooraf in kennis te stel en toestemming te verkry.
Die geskil: Het burgers die reg op privaatheid wat persoonlike mediese rekords betref? Agtergrond: In 2007 het ’n adjunk-stadsaanklaer in St. Petersburg, Rusland, alle mediese instansies in die stad beveel om die stadsaanklaer se kantoor in kennis te stel van elke geval waar een van Jehovah se Getuies ’n bloedoortapping weier—maar sonder om die pasiënt in te lig. Toe Russiese howe nie die pasiënte se reg op privaatheid gehandhaaf het nie, het die broers hulle tot die Europese Hof van Menseregte (EHMR) gewend.

Die beslissing: Op 6 Junie 2013 het die EHMR beslis dat die aanklaer se bevel fundamentele privaatheidsregte geskend het en bevestig dat daar “geen relevante of voldoende redes” was om private inligting aan staatsamptenare te verstrek nie. Op 7 Oktober, toe die Groot Kamer van die EHMR geweier het om Rusland se saak te verhoor, was die beslissing finaal.—Awilkina en ander v. Rusland.