Ek het met my eie oë gesien wat die Bybel sê!

DIE eerste keer toe ek van die Getuies gehoor het, was ek ’n universiteitstudent in die stad Koetaisi. ’n Buurvrou het vir my gesê dat die Getuies nie beelde in hulle aanbidding gebruik of glo dat Jesus God die Almagtige is nie. Dit het gebots met wat ek as ’n Ortodokse Christen geleer is.

Toe ek in die somer van 1992 na my tuisdorp, Tsageri, teruggekeer het, het ek uitgevind dat daar ook Getuies is. My ma het baie goeie dinge oor die Getuies gehoor. Maar omdat ek ’n negatiewe beskouing van hulle gehad het, het sy vir my gesê: “Gaan vind self uit wat hulle leer.”

Twee pioniers, Pawle en Paata, het gereeld ’n gesin in ons buurt besoek. Baie bure het hierdie geleenthede gebruik om na hulle te luister en vrae te vra. Ek het ook besluit om hierdie besprekings by te woon. Elke keer wanneer ek ’n vraag gevra het, het die broers hulle Bybel oopgemaak en my gevra om die antwoord daarin te lees. Dit het my baie beïndruk, want ek het met my eie oë gesien wat die Bybel sê!

Ek was kort voor lank deel van ’n groep mense met wie die broers die Bybel gestudeer het. Die volgende somer is tien van ons gedoop. Later het my ma ook een van Jehovah se Getuies geword.

As ek nou terugkyk, is ek dankbaar dat die broers al my vrae beantwoord het deur my die antwoorde in die Bybel te laat lees. Dit het my gehelp om die stryd binne-in my op te los toe alles waarin ek geglo het, bevraagteken is. Omdat dit my so gehelp het om die antwoorde in die Bybel te sien, doen ek presies dieselfde wanneer ek ander mense help om die waarheid te leer!!