Glanspunte van die afgelope jaar

TERWYL die een rampspoed ná die ander Satan se wêreld tref, het Jehovah se ware aanbidders “altyd baie . . . om in die werk van die Here te doen” (1 Kor. 15:58). Die volgende verslae wys hoe Jehovah se Getuies regoor die wêreld daarna streef om te ‘vertrou op Jehovah en te doen wat goed is; en om te handel met getrouheid’.—Ps. 37:3.

Verskuiwing van die wêreldhoofkwartier en takkantoor

Die uitbreiding van die fasiliteite by Wallkill, New York, is op 1 Februarie 2016 voltooi. Die Verenigde State se Takkomitee, Diensafdeling en ander afdelings van die takkantoor het toe daarheen getrek. En omdat die werk aan die nuwe wêreldhoofkwartier by Warwick amper klaar was, het die Brooklynse Bethelgesin begin met die groot taak om uit die stad New York na die platteland te trek.

Toere by die wêreldhoofkwartier by Warwick sal op Maandag 3 April 2017 begin. Daar sal drie onbegeleide uitstallings en ’n begeleide toer wees.

1. “Die Bybel en die goddelike naam.” Hierdie uitstalling bevat Bybels wat skaars is en wat wys dat God se naam in die Skrif hoort.

2. “’n Volk vir Jehovah se naam.” Hierdie uitstalling voorsien ’n visuele geskiedenis van Jehovah se Getuies se geestelike erfenis, wat toon hoe Jehovah sy volk progressief gerig, geleer en georganiseer het om sy wil te doen.

3. “Wêreldhoofkwartier—Geloof in aksie.” Hierdie interaktiewe uitstalling verduidelik wat die Bestuursliggaam se komitees doen. Dit wys hoe hulle Jehovah se volk help om saam te vergader, om dissipels te maak, om geestelike voedsel in te neem en om liefde aan mekaar te betoon.

Hierdie onbegeleide toere is beskikbaar van Maandag tot Vrydag vanaf 8:00 vm. tot 4:00 nm. Besoekers kan ook ’n begeleide toer van 20 minute geniet wat die aandag vestig op dele van die Kantore/Dienstegebou en die Bethel-terrein. Hierdie kort begeleide toere is beskikbaar van Maandag tot Vrydag vanaf 8:00 vm. tot 11:00 vm. en vanaf 1:00 nm. tot 4:00 nm.

Voordat jy jou besoek beplan, gaan na jw.org en kyk onder OMTRENT ONS > KANTORE & TOERE > Verenigde State.