Sal die lewe ooit weer normaal wees? Hoe die Bybel ons kan help in ’n wêreld ná die pandemie

“Ons almal wil hê dat ons lewe weer normaal moet wees.” – Angela Merkel, Duitse kanselier.

Jy stem dalk saam met haar woorde omdat die COVID-19-pandemie aanhou om ’n uitwerking op mense regoor die wêreld te hê. Maar wat beteken “normaal”? Waarvoor hoop mense?

• Om weer soos voorheen te lewe. Party mense wens dat hulle meer tyd met ander kan spandeer en vir hulle ’n drukkie kan gee en hulle hand kan skud. Hulle wil ook graag weer reis. Dr. Anthony Faucia het gesê dat hulle voel dat ’n normale lewe insluit om na restaurante en teaters te gaan.

• Om hulle lewe te verbeter. Party sien dit as ’n geleentheid vir ’n “nuwe normaal”, ’n lewe wat beter is as die lewe wat hulle voorheen gehad het. Hulle voel dat daar dinge is wat moet verander. Dit sluit dinge in soos werke wat te veel tyd en energie vereis, die onregverdige behandeling van mense as gevolg van hulle ras of sosiale status en die feit dat meer en meer mense emosionele probleme het. Die stigter van die Wêreld- Ekonomiese Forum, Klaus Schwab, sê: “Die pandemie gee ons ’n unieke geleentheid om na te dink oor ons lewe en hoe ons wil hê ons wêreld moet wees en om dan die veranderinge in die wêreld te maak. En hierdie geleentheid sal nie vir ewig daar wees nie.”

Vir party mense het die pandemie soveel probleme veroorsaak dat hulle dink dat die lewe nooit weer normaal sal wees nie. Byvoorbeeld, baie het hulle werk, hulle huis of hulle goeie gesondheid verloor, of nog erger, hulle het dalk selfs ’n geliefde aan die dood verloor.

Niemand kan natuurlik voorspel presies hoe die lewe sal wees wanneer die pandemie tot ’n einde kom nie (Prediker 9:11). Maar die Bybel kan ons help om realisties te wees oor die toekoms en om dinge te hanteer, maak nie saak wat gebeur nie. En die Bybel praat ook van ’n toekoms waarvan ons seker kan wees – ’n toekoms wat jy dalk nie verwag nie.

Ons moet die regte beskouing van die COVID-19-pandemie hê

Die Bybel het lank gelede voorspel dat wydverspreide siektes of “vreeslike siektes” gedurende “die einde van die wêreldstelsel” sou gebeur (Lukas 21:11; Matteus 24:3). As ons dit in gedagte hou wanneer ons aan die COVID-19-pandemie dink, sal ons die pandemie beskou as een van die baie gebeure wat belangrik is. Hierdie gebeure sluit oorloë, groot aardbewings en voedseltekorte in, dinge wat die Bybel voorspel het.

Hoe hierdie kennis ons help: Hoewel toestande tydens die pandemie dalk beter word, waarsku die Bybel dat daar in ons tyd “swaar tye sal wees wat moeilik is om deur te kom” (2 Timoteus 3:1). As ons dit weet, kan dit ons help om realisties te wees oor hoe die lewe in hierdie moeilike tye sal wees.

Die Bybel gee ons die regte beskouing: Ons wêreld, wat al hoe meer uitdagings het, sal binnekort deur ’n tyd van groot verandering gaan. Hoe sal die wêreld verander?

’n Toekoms ná die pandemie wat jy dalk nie verwag nie

Die Bybel voorspel nie net die ernstige probleme wat ons nou het nie, maar ook dat ons binnekort beter tye kan verwag. Dit beskryf ’n toekoms wat baie beter is as wat menseregerings ooit kan bereik – ’n toekoms wat net God kan voorsien. “God sal elke traan van hulle oë afvee, en die dood sal nie meer daar wees nie. Daar sal geen getreur, geen gehuil en geen pyn meer wees nie.” – Openbaring 21:4.

Jehovahb God belowe: “Kyk! Ek maak alles nuut” (Openbaring 21:5). Hy sal hierdie wêreld se probleme oplos, insluitende die probleme wat deur die pandemie vererger is. Hy sal die volgende voorsien:

• Volmaakte fisiese en emosionele gesondheid, sonder siekte en die dood. – Jesaja 25:8; 33:24.

• Bevredigende werk wat mense regtig sal geniet, nie die tipe werk wat frustrasie of uitbranding veroorsaak nie. – Jesaja 65:22, 23.

• ’n Goeie lewe vir almal, ’n lewe sonder armoede en wanneer almal genoeg sal hê om te eet. – Psalm 72:12, 13; 145:16.

• Mense se emosionele pyn wegneem, en hulle sal die hoop hê om te sien hoe hulle geliefdes wat gesterf het, weer sal lewe. – Jesaja 65:17; Handelinge 24:15.

Hoe hierdie kennis ons help: Die Bybel sê: “Ons het hierdie hoop as ’n anker vir ons lewens” (Hebreërs 6:19, voetnoot). Hierdie hoop van beter dinge kan vir ons innerlike vrede gee. Dit kan ons help om vandag se moeilike situasies te hanteer, om minder angstig te voel en om kalm en gelukkig te bly.

Maar kan jy regtig die Bybel se beloftes glo? Sien die artikel “Die Bybel – ’n Betroubare boek van waarheid”.

Bybelwaarhede wat ons sal help om die lewe ná die pandemie te hanteer

• Waardeer lewe

  Bybelvers: “Wysheid bewaar die lewe van dié wat dit besit.” – Prediker 7:12.

  Wat dit vir jou beteken: Maak wyse besluite sodat daar minder kans is dat jy siek kan word. Vind uit wat die gevare in jou gebied is. Dink aan die regulasies in verband met gesondheid en veiligheid, die jongste syfer van infeksie in jou omgewing en die hoeveelheid mense in jou land wat heeltemal ingeënt is.

• Bly versigtig

  Bybelvers: “Die wyse is versigtig en vermy wat sleg is, maar die dwaas is roekeloos en het te veel selfvertroue.” – Spreuke 14:16.

  Wat dit vir jou beteken: Hou aan om te doen wat nodig is om jou gesondheid te beskerm. Kenners glo dat die koronavirus nog ’n lang tyd ’n probleem vir ons sal wees.

• Volg betroubare inligting

  Bybelvers: “Iemand wat onervare is, glo elke woord, maar die verstandige persoon dink mooi voordat hy iets doen.” – Spreuke 14:15.

  Wat dit vir jou beteken: Wees versigtig wanneer jy kies watter raad om te volg. Wat jy kies, maak saak – jy kan jou gesondheid in gevaar stel as jy besluite maak wat op verkeerde inligting gebaseer is.

• Bly positief

  Bybelvers: “Moenie vra: ‘Hoekom was die vroeëre dae beter as hierdie dae?’ nie, want dit is nie uit wysheid dat jy dit vra nie.” – Prediker 7:10.

  Wat dit vir jou beteken: Wees vasbeslote om die beste van jou huidige situasie te maak. Moenie dink dat die lewe voor die pandemie beter was nie, en moenie aanhou dink aan die dinge wat jy nie as gevolg van die pandemie kon doen nie.

• Wys dat jy respek het vir ander

  Bybelvers: “Eer alle soorte mense.” – 1 Petrus 2:17.

  Wat dit vir jou beteken: Mense reageer op verskillende maniere op die pandemie en die gevolge daarvan. Respekteer ander se opinies, maar bly by die goeie besluite wat jy gemaak het. Wees bedagsaam teenoor mense wat nie ingeënt is nie, die bejaardes en mense met ernstige gesondheidsprobleme.

• Wees geduldig

  Bybelvers: “Liefde is geduldig en goedhartig.” – 1 Korintiërs 13:4.

  Wat dit vir jou beteken: Wees liefdevol teenoor mense wat senuweeagtig is om dinge te doen wat normaal was voor die pandemie. Wees geduldig en moenie te veel van jouself verwag wanneer toestande beter word en jy meer dinge mag doen nie.

Hoe die Bybel mense gedurende die pandemie help

Jehovah se Getuies word vertroos deur die Bybel se beloftes van ’n wonderlike toekoms, en dit help hulle om nie op die pandemie te fokus nie. Hulle ondersteun ook mekaar deur gehoorsaam te wees aan die Bybel se bevel om gereeld bymekaar te kom vir aanbidding (Hebreërs 10:24, 25). Almal is welkom om die vergaderinge van Jehovah se Getuies by te woon, wat gedurende die pandemie deur middel van videoverbinding gehou word.

Ander stem saam dat die vergaderinge van Jehovah se Getuies hulle gehelp het gedurende hierdie moeilike tye. Byvoorbeeld, ’n vrou wat COVID-19 gehad het, het ’n uitnodiging aanvaar om die vergaderinge van Jehovah se Getuies deur middel van videoverbinding by te woon. Al het sy nog steeds gesondheidsprobleme as gevolg van die virus, het hierdie vergaderinge haar emosioneel gehelp. Sy het later gesê: “Ek voel dat ek ook deel is van hierdie familie. Om die Bybel te lees, gee my innerlike vrede en help my om kalm te bly. Dit help my om op my hoop vir die toekoms te fokus eerder as op my probleme. Dankie dat julle my gehelp het om nader aan God te kom. Dit is iets wat ek nog altyd wou gehad het.”