Wat sê die Bybel oor kernoorlog?

Ons wêreld word die heeltyd bedreig deur kernoorlog omdat wêreldmagte kernwapens besit en nog bykry. Mense is natuurlik bekommerd dat hoe meer kernwapens daar bestaan, hoe groter is die gevaar dat ’n kernoorlog sal begin. Mense is ook bekommerd dat die gebruik van net een klein kernbom tot ’n kernoorlog sal lei wat ons wêreld sal vernietig. Volgens die Bulletin of the Atomic Scientists lewe ons “altyd met die gevaar van kernoorlog”.

Is dit moontlik dat ’n kernoorlog kan gebeur? Indien wel, kan ons planeet dit oorleef? En hoe kan ons ons angstigheid oor ’n moontlike kernoorlog hanteer? Wat sê die Bybel?

In hierdie artikel

Voorspel die Bybel kernoorlog?

Die Bybel verwys nie spesifiek na kernoorlog nie. Maar die gevaar van kernoorlog is as gevolg van gesindhede en gebeure wat die Bybel voorspel het.

Vergelyk wat in die volgende Bybelverse beskryf word met wat vandag in die wêreld gebeur:

Bybelverse: Jesus se dissipels het gevra: “Wat sal die teken wees van u teenwoordigheid en dat die einde van die wêreldstelsel naby is?” Jesus het geantwoord: “Nasie sal teen nasie opstaan en koninkryk teen koninkryk.” – Matteus 24:3, 7.

Wêreldgebeure: Lande, insluitende dié wat kernwapens het, raak al hoe meer betrokke by gewapende konflik.

“In onlangse jare het die wêreld baie meer gewelddadig geword: al hoe meer konflikte gebeur.” – The Armed Conflict Location & Event Data Project.

Bybelvers: “In die tyd van die einde sal die koning van die suide in ’n stotery met [die koning van die noorde] betrokke raak.” – Daniël 11:40.

Wêreldgebeure: Mededingende nasies en dié wat hulle ondersteun, is in ’n stotery betrokke, of kompeteer om die magtigste nasie te word, soos die Bybel voorspel het. Al val vandag se grootste kernmoondhede mekaar nie direk aan nie, hou hulle aan om hulle kernwapens kragtiger en effektiewer te maak.

Oor die afgelope tien jaar was daar meer konflikte tussen lande, insluitende konflikte waar groot moondhede teenoorgestelde kante kies. – The Uppsala Conflict Data Program.

Bybelverse: “Daar [sal] in die laaste dae swaar tye . . . wees wat moeilik is om deur te kom. Want mense sal . . . nie bereid wees om tot enigiets in te stem nie. Hulle sal slegte dinge van mense sê en geen selfbeheersing hê nie. Hulle sal wreed wees.” – 2 Timoteus 3:1-3.

Wêreldgebeure: Soos baie mense vandag, is wêreldleiers ook nie geneig om saam te stem nie. En in plaas daarvan om hulle verskille op ’n vreedsame manier op te los, probeer hulle om hulle konflikte op te los deur dreigemente of geweld te gebruik. Sulke optrede vergroot die gevaar van kernoorlog.

“Sonder ’n praktiese benadering om samewerking aan te moedig, sal konflikte dodeliker word.” – S. Saran en J. Harman, Wêreld- Ekonomiese Forum.

Sal God toelaat dat ’n kernoorlog gebeur?

Die Bybel sê nie. Dit sê wel dat “skrikwekkende dinge” in ons dag sou gebeur (Lukas 21:11). ’n Voorbeeld van sulke dinge sluit in dat atoombomme gedurende die Tweede Wêreldoorlog gebruik is. Die Bybel verduidelik hoekom God oorloë toegelaat het. Om meer uit te vind, kyk na die video Hoekom laat God toe dat mense swaarkry?

Sal die planeet Aarde ’n kernoorlog oorleef?

Ja. Selfs al gebruik die mens weer kernwapens, sou God nie toelaat dat die situasie so erg word dat die hele wêreld vernietig sou word nie. Die Bybel sê nie net dat ons planeet alle gevare sal oorleef nie, maar ook dat mense vir ewig daarop sal lewe.

“Die aarde bestaan vir ewig.” – Prediker 1:4.

“God, die Een wat die aarde gevorm het, [het] dit nie verniet geskep . . . nie, maar [het] dit gemaak . . . om bewoon te word.” – Jesaja 45:18.

Party mense dink dat daar in die toekoms net ’n handjie vol mense op aarde sal oorbly wat sukkel om te oorleef omdat die planeet vergiftig sal wees as gevolg van kernoorlog. Maar die Bybel wys dat enige skade wat as gevolg van oorlog aan die aarde veroorsaak is, heeltemal weggeneem sal word.

“Die wildernis en die dorre land sal juig, en die woestyn sal vreugdevol en vol blomme wees.” – Jesaja 35:1.

Mense werk saam en geniet hulleself op ’n paradysaarde. — God wil hê dat ons gelukkig op ’n pragtige aarde moet lewe

Ons Skepper het die aarde ontwerp met die ongelooflike vermoë om homself te herstel. Maar ons weet ook dat God sy krag sal gebruik om die aarde te herstel. Dit sal vir ewig ’n wonderlike tuiste vir die mens wees. – Psalm 37:11, 29; Openbaring 21:5.

Hoe kan jy dit hanteer as jy ’n vrees vir kernoorlog het?

Party het ’n vrees vir kernoorlog, wat beteken dat hulle bang is dat ’n kernoorlog sal gebeur en vir die gevolge daarvan. Die Bybel se beloftes en raad kan sulke mense help om hierdie vrees te hanteer en om minder bang te wees. Hoe?

Die Bybel beskryf ’n wonderlike toekoms vir die aarde en vir dié wat daarop woon. Om oor hierdie hoop te leer, kan soos “’n anker vir ons lewens” wees, wat ons minder angstig maak (Hebreërs 6:19, voetnoot). Ons kan minder angstig voel deur een dag op ’n slag aan te pak en nie te fokus op die slegte dinge wat dalk in die toekoms kan gebeur nie. Soos Jesus gesê het: “Elke dag het genoeg van sy eie probleme.” – Matteus 6:34.

Om die waarheid te sê, dit sal ons almal goed doen om na ons verstandelike en emosionele gesondheid om te sien. Ons kan dit doen deur onnodige inligting wat ons angstig kan maak, te vermy. Dit sluit dinge in soos besprekings, voorspellings en opinies oor die nuutste verwikkelinge in kernwapens. Dit beteken nie dat ons ignoreer wat om ons gebeur nie. Ons doen eerder wat ons kan om te keer dat ons tob oor dinge waaroor ons geen beheer het nie en wat dalk nooit sal gebeur nie.

“Angstigheid in ’n mens se hart maak hom terneergedruk, maar ’n goeie woord maak sy hart bly.” – Spreuke 12:25.

Probeer om ’n ruk lank slegte nuus te vermy deur op die positiewe dinge in jou lewe te fokus.

“Mag die God wat hoop gee, julle met alle vreugde en vrede vul omdat julle op hom vertrou.” – Romeine 15:13.

Collage: ’n Man kyk vorentoe met vertroue. 1. Agter hom word oorlog uitgebeeld, insluitende ’n militêre vliegtuig, kernmissiele en ’n paddastoelwolk. 2. Voor hom is ’n skoon en vreedsame aarde met berge, groen valleie, ’n vloeiende rivier en voëls. — Die Bybel voorsien ’n vaste hoop van ’n beter toekoms

Dit kan jou hoop, vreugde en innerlike vrede gee wanneer jy meer oor God se beloftes leer.

Het die Bybel ’n kern-Armageddon voorspel?

Party mense dink dat Armageddon ’n wêreldwye kernoorlog sal wees. Hulle dink heel moontlik aan die rampspoedige gevolge as dit sou gebeur.

Maar die Bybel gebruik die woord “Armageddon” om na ’n oorlog te verwys tussen “die konings van die hele aarde”, of menseregerings, en God (Openbaring 16:14, 16).a Soos die geval sou wees met ’n kernslagting, sal mense en die aarde nie blindelings gedurende Armageddon vernietig word nie. God sal eerder net goddelose mense gedurende Armageddon vernietig, wat ware vrede en veiligheid moontlik sal maak. – Psalm 37:9, 10; Jesaja 32:17, 18; Matteus 6:10.

Wat is die Bybel se oplossing vir oorlog?

“Hy maak regoor die aarde ’n einde aan oorloë. Hy breek die boog en vernietig die spies. Hy verbrand die militêre waens met vuur.” – Psalm 46:9.

Jehovahb God sal sy gesag uitoefen oor nasies wat oorlog voer deur ’n einde te maak aan hulle konflikte en hulle wapens te vernietig. Hy sal dit doen deur middel van sy Koninkryk, ’n hemelse regering wat oor die aarde sal regeer. – Daniël 2:44.

God se Koninkryk sal mense leer hoe om in vrede en eenheid te lewe. Omdat net een regering oor die hele aarde sal regeer, sal daar nie meer verdeeldheid tussen verskillende regerings wees nie. Mense sal nie eers meer leer hoe om oorlog te voer nie! (Miga 4:1-3). Wat sal die gevolg wees? “Elkeen sal dan in vrede kan woon met sy eie wingerd en sy eie vyebome sonder dat iemand hulle die skrik op die lyf jaag.” – Miga 4:4, Die Lewende Bybel.

a Sien die artikel “Wat is die oorlog van Armageddon?”

b Jehovah is die persoonlike naam van God (Psalm 83:18). Sien die artikel “Wie is Jehovah?”

Verwys die Bybelboek Openbaring na kernoorlog?

Party mense dink dat die boek Openbaring na vernietiging verwys wat deur ’n kernslagting veroorsaak sal word (Openbaring 6:14; 8:7-12; 16:1-21). Byvoorbeeld, dit beskryf “vuur [wat] uit die hemel na die aarde neerkom” (Openbaring 13:11-13). Jehovah se Getuies besef dat dit nie na ’n volskaalse kernoorlog verwys nie, maar na die gebruik van atoombomme gedurende die Tweede Wêreldoorlog.

Hoewel die boek Openbaring na hierdie gebeure verwys, is die doel nie om al die besonderhede van hierdie skrikwekkende gebeure te beskryf nie. Terwyl jy die boek Openbaring lees, onthou die volgende:

Die boek gebruik baie tekens, of simbole, wat nie letterlik opgeneem moet word nie. – Openbaring 1:1.
Die doel van die boek is nie om mense bang te maak nie. Die boodskap maak dié wat dit verstaan en toepas, eerder gelukkig. – Openbaring 1:3.

Vir meer inligting, sien die artikel “Die boek Openbaring—Wat beteken dit?”