HULP VIR DIE GESIN
Praat met jou kinders oor alkohol
“Ons dogter was ses jaar oud toe ons die eerste keer met haar oor alkohol gepraat het. Ons was verbaas toe sy baie meer weet as wat ons verwag het.” – Alexander.
Wat jy moet weet
Dit is noodsaaklik om met jou kinders oor alkohol te praat. Moenie wag totdat jou kind ’n tiener is nie. “Ek wens ons het met ons seun oor alkohol gepraat toe hy nog klein was,” sê Chamit, in Rusland. “Ek het op die harde manier geleer hoe belangrik dit is. Ek het ontdek dat my seun op 13 gereeld gedrink het.”
Hoekom moet jy bekommerd wees?
Klasmaats, advertensies en die televisie kan jou kind se beskouing van alkohol beïnvloed.
Volgens die Amerikaanse Sentrums vir Siektebeheer en -voorkoming word 11 persent van alle alkohol in die Verenigde State deur minderjariges gebruik.
Daarom beveel gesondheidsdeskundiges aan dat ouers hulle kinders van jongs af oor die gevare van alkohol inlig. Hoe kan jy dit doen?
Wat jy kan doen
Wees voorbereid op jou kind se vrae. Jong kinders is nuuskierig, en ouer kinders is selfs nuuskieriger. Daarom sal dit goed wees as jy jou antwoorde voorberei. Byvoorbeeld:
As jou kind wil weet hoe alkohol proe, kan jy sê dat wyn ’n bietjie soos suur vrugtesap proe en dat bier bitter is.
As jou kind alkohol wil proe, kan jy sê dat dit te sterk is vir die liggame van kinders. Sê watter uitwerking dit het: Alkohol laat ’n persoon ontspanne voel, maar te veel daarvan kan ’n persoon duiselig maak, dom dinge laat doen en dinge laat sê waaroor hy of sy later spyt sal wees. – Spreuke 23:29-35.
Lig jouself in. Die Bybel sê: “’n Verstandige persoon tree met kennis op” (Spreuke 13:16). Wees ingelig oor die gebruik van alkohol, en sorg dat jy weet wat die wette en limiet in verband met alkohol in jou land is. Dan sal jy goed voorbereid wees om jou kind te help.
Neem die inisiatief om die onderwerp te bespreek. “Die gebruik van alkohol kan verwarrend wees vir jongmense,” sê Mark, ’n pa in Brittanje. “Ek het my agtjarige seun gevra of hy dink dat dit reg of verkeerd is om alkohol te drink. Ek het die atmosfeer ontspanne en informeel gehou, en dit het hom gehelp om openlik te sê wat hy dink.”
Jy sal ’n groter indruk maak as jy ’n hele paar keer oor die gebruik van alkohol praat. Afhangende van jou kind se ouderdom kan jy oor alkohol sowel as oor ander belangrike onderwerpe praat, soos padveiligheid en seks.
Stel die voorbeeld. Kinders is soos sponse – hulle absorbeer hulle omgewing – en navorsing toon dat ouers hulle kinders die meeste beïnvloed. As jy dus alkohol drink om te kalmeer en jou stres te verlig, sal jou kind dalk dink dat alkohol die antwoord op die lewe se probleme is. Wees dus ’n goeie rolmodel. Maak seker dat jy alkohol op ’n verantwoordelike manier gebruik.
Jou kind sal jou voorbeeld volg wanneer dit kom by die gebruik van alkohol