Jongmense vra . . .

Seksuele teistering—Hoe kan ek my beskerm?

ANITA is ’n lewenslustige 16-jarige met ’n vriendelike glimlag. Sy frons egter wanneer sy onlangse voorvalle by haar skool beskryf. “’n Baie gewilde seun het my in die gang vasgekeer en het op ’n onbehoorlike manier aan my begin vat”, vertel sy. “Hy het dit met ’n klomp ander meisies reggekry—hulle is deur sy attensies gevlei, ek is egter nie! Ek het hom op ’n mooi manier gevra om sy hande tuis te hou, maar dit het nie gewerk nie. Hy het nie gedink dat ek dit regtig bedoel nie.”

Anita se probleem is glad nie ongewoon nie. Seksuele teistering was blykbaar algemeen in Bybeltye. (Vergelyk Rut 2:8, 9, 15, NW.) En dit is ontstellend algemeen vandag. “Party van die mans by die werk het vulgêre opmerkings oor my liggaam gemaak”, sê een tienermeisie. Maar dikwels bly die teistering nie net by woorde nie. “Party het aan my probeer vat of gryp”, sê sy verder. ’n Tienermeisie met die naam René het vir Ontwaak! gesê: “Die teistering by die werk het so erg geraak dat ek moes bedank.”

Een onlangse opname het bekend gemaak dat 81 persent van die leerlinge in standerd 6 tot 9 gesê het dat hulle al ten minste een keer op ’n seksuele manier lastig geval is. “Van hulle”, berig U.S.News & World Report, “het 65 persent van die meisies en 42 persent van die seuns gesê dat hulle op ’n seksuele manier aangeraak, gegryp of geknyp is.” Ja, seuns sowel as meisies word daaraan blootgestel. Soos die ouer van een tienerseun sê: “Ek is geskok deur hoe voor op die wa die meisies by my seun se skool is. Vandat hy omtrent 12 jaar oud was, kry ons aanhoudend telefoonoproepe, uitnodigings om uit te gaan, onkuise voorstelle—noem maar op.”

Dit is maklik om hierdie lastige gedrag ligtelik op te neem. Een jongmens het opgemerk: “Soms word dit as ’n grap gedoen.” Maar vir Christene is dit nie ’n grap nie! Hulle besef dat seksuele teistering dikwels ’n poging is om ’n mens tot geslagsonsedelikheid te verlok, iets wat Jehovah God veroordeel (1 Korintiërs 6:9, 10). God se Woord beveel daarbenewens dat jong vroue “met alle kuisheid” behandel word (1 Timoteus 5:2). Dit verbied ook “onwelvoeglike skertsery” (Efesiërs 5:3, 4). Christenjongmense moet dus nie seksuele teistering duld nie! Die vraag is: Hoe kan jy jou daarteen beskerm? Kom ons bespreek maniere om dit te voorkom.

Maniere om teistering te voorkom

Bou ’n reputasie vir Christelike gedrag op. ‘Laat julle lig voor die mense skyn’, het Jesus aangespoor (Matteus 5:16). Een manier om dit te doen, is om jou skool- en werksmaats van jou oortuiging te vertel. Wanneer jy bekend staan as iemand met ’n vaste oortuiging en hoë morele standaarde is die kanse skraler dat jy die skyf van teistering sal wees.

Let op jou kleredrag en persoonsversorging. In Bybeltye het sekere kleredrag ’n vrou as onsedelik geïdentifiseer. (Vergelyk Spreuke 7:10.) Net so kan gewaagde style jou vandag gewild onder jou portuurs maak, maar dit kan die verkeerde boodskap oordra. Jy vind dalk dat jy die verkeerde soort aandag van die ander geslag trek. ’n Soortgelyke probleem kan ontstaan as ’n meisie haar grimering so aanwend dat sy ouer lyk as wat sy regtig is. Die Bybel se raad is dat jy jou “met goed versorgde kleredrag moet versier, met beskeidenheid en gesonde verstand”.—1 Timoteus 2:9.

Kies jou vriende versigtig (Spreuke 13:20). Mense sal jou immers aan jou vriende beoordeel. En as jou vriende daarvoor bekend is dat hulle baie tyd daaraan bestee om oor die ander geslag te praat, kan mense die verkeerde indruk van jou kry.—Vergelyk Genesis 34:1, 2.

Vermy flirtasie. Daar is weliswaar niks daarmee verkeerd om vriendelik te wees nie, maar as jy iemand van die ander geslag aanstaar en aan hom of haar vat, kan jy maklik verkeerd opgeneem word. Dit is nie nodig om aan iemand te vat om ’n gesprek te voer nie. Pas die Gulde Reël toe en behandel die ander geslag soos jy behandel wil word—met kuisheid en respek (Matteus 7:12). Vermy dit om net vir die pret daarvan die aandag van die ander geslag te probeer trek. As jy dit doen, kan dit nie net onbedagsaam en misleidend wees nie, maar ook gevaarlik. “Kan iemand vuur in sy skoot dra sonder dat sy klere verbrand?” vra die Bybel in Spreuke 6:27.

As jy ’n slagoffer is

Selfs al is sekere veranderinge in jou kleredrag, persoonsversorging of gedrag gepas, het ander natuurlik nie die reg om aan jou te vat of om onkuise voorstelle te maak nie. En selfs party jongmense wie se voorkoms en gedrag voorbeeldig is, was al slagoffers. Wat moet jy doen as dit met jou gebeur? Hier is ’n paar wenke.

Weier beslis. Almal weet dat party mense nee sê vir seksuele toenadering wanneer hulle in werklikheid ja bedoel. Iemand wat jou teister, kan derhalwe aanneem dat ’n halfhartige nee in werklikheid ja beteken—of ten minste miskien—tot jy hulle anders oortuig. Jesus se raad om jou nee, nee te laat beteken, is baie prakties wat dit betref (Matteus 5:37). Moenie giggel of skaam wees nie. Jy moet ook nie toelaat dat jou lyftaal, stemtoon of gesigsuitdrukking jou woorde weerspreek nie.

Trek aandag. Seksueel aggressiewe persone maak dikwels staat op die onwilligheid van hulle slagoffers om hulle te verset. In Bybeltye het Israelitiese vroue egter die reg, in werklikheid die verpligting, gehad om hulle teen onsedelike aanranding te verset (Deuteronomium 22:23, 24). Vandag moet ’n Christen ook nie voel dat dit nie so erg is as hy of sy op ’n onvanpaste manier aangeraak of betas word nie. Dit is verkeerd, dit is ’n aanval op jou waardigheid as mens en as Christen. Jy hoef dit nie te duld nie! “Verafsku wat goddeloos is”, spoor die Bybel ons aan!—Romeine 12:9.

Een doeltreffende manier om die wangedrag stop te sit, is om aandag te trek en jou aanvaller in verleentheid te bring; miskien sal hy ophou. Dink terug aan die ondervinding van Anita, wat in die begin genoem is. Dit het nie gewerk toe sy die seun beleef gevra het om op te hou om aan haar te vat nie. Anita sê: “Ek moes hom voor sy vriende in verleentheid bring deur hardop vir hom te sê om NIE op daardie manier aan my te vat nie!” Die gevolg? “Al sy vriende het vir hom gelag. Hy was ’n ruk lank baie kil, maar ’n paar dae later het hy verskoning gevra vir sy gedrag en het my later selfs verdedig toe iemand anders my probeer lastig val het.”

As woorde nie werk nie, moet jy dalk eenvoudig van die aanval wegloop—of selfs weghardloop. En as dit onmoontlik is om weg te kom, het jy die reg om enigiets te doen wat nodig is om molestering af te weer. Een Christenmeisie het gesê: “Toe ’n seun my probeer gryp het, het ek hom so hard geslaan soos wat ek kon en weggehardloop!” Dit beteken natuurlik nie dat hy nie weer sal probeer nie. Jy sal dus waarskynlik hulp moet kry.

Vertel iemand. “Dit is wat ek uiteindelik moes doen”, erken die 16-jarige Adrienne. “Ek het my ouers om raad oor die situasie gevra toe ’n seun wat ek as ’n goeie vriend beskou het my net nie wou uitlos nie. Hoe meer ek my teëgesit het, hoe meer het hy aangehou, amper asof dit ’n speletjie was.” Adrienne se ouers het praktiese raad gehad wat haar gehelp het om die probleem beter te hanteer.

Jou ouers kan jou ook help om enige emosionele nadraai te verwerk wat uit die voorval kan voortspruit, soos verleentheid, vrees of skaamte. Hulle kan jou verseker dat die aanval nie jou skuld was nie. Hulle kan ook stappe doen om jou in die toekoms te help beskerm.

Byvoorbeeld, hulle kan besluit dat dit goed sal wees om jou onderwyser of die skoolbeamptes oor die probleem in te lig. Baie skole in die Verenigde State neem klagtes redelik ernstig op en het duidelike riglyne vir die hantering van seksuele teistering onder leerlinge.

Nie alle skoolbeamptes is weliswaar simpatiek nie. “In my skool”, sê die 14-jarige Earlisha, “vloek en gedra die onderwysers hulle soms erger as die kinders. Jy weet nie tot wie jy jou om hulp kan wend nie.” Dit is dus nie verbasend dat sy, toe sy die teistering aangemeld het, van oorgevoeligheid beskuldig is nie. Earlisha het egter nie tou opgegooi nie. Sy het ses ander meisies bymekaargekry wat deur dieselfde seun geknyp en betas is. “Dit het ses van ons geverg om die skoolhoof te oortuig dat daar ’n werklike probleem is”, sê sy. Sy het uiteindelik daarin geslaag om ’n einde aan die wangedrag te maak.

Wend jou tot God om ondersteuning. As jy soms by die skool voel asof jy in ’n leeukuil vasgekeer is, kan jy onthou dat Jehovah God die profeet Daniël in ’n letterlike leeukuil beskerm het (Daniël 6:17-23). Jehovah kan jou ook help. Hy verstaan die druk waarvoor jy by die skool te staan kom. En as dinge moeilik raak, kan jy jou tot hom wend om hulp—hardop as dit nodig is! Moenie bang of skaam wees om as ’n dienaar van die ware God bekend te staan nie. Die Bybel belowe Jehovah se getroue dienaars: “Hy bewaar die siele van sy gunsgenote, Hy red hulle uit die hand van die goddelose.”—Psalm 97:10.

Dit waarborg nie wonderdadige verlossing nie. Jy moet doen wat jy kan om jou te beskerm. Volg Bybelbeginsels. Wees beskeie in jou spraak en voorkoms. Wees versigtig wanneer jy met die ander geslag te doen het. As jy dit doen, sal jy jou in groot mate teen teistering kan beskerm.

[Prent op bladsy 18]

Moenie halfhartig wees wanneer jy onbehoorlike toenadering weier nie; laat jou nee, nee beteken!