Wat het Austin en Laurie in gemeen? Of hulle dit nou besef of nie, hulle albei is beïnvloed deur ’n sterk mag—die mag van die gewoonte.

Wat van jou? Is daar goeie gewoontes wat jy graag wil aanleer? Dalk wil jy gereeld oefen, meer slaap kry of jou geliefdes meer kontak.

Aan die ander kant wil jy dalk graag ’n slegte gewoonte afleer, soos om sigarette te rook, te veel gemorskos te eet of om te veel tyd op die Internet deur te bring.

Dit kan moeilik wees om ’n slegte gewoonte af te leer. Trouens, daar is al gesê dat ’n slegte gewoonte soos ’n warm bed op ’n koue dag is: dit is makliker om daarin te kom as om daaruit te kom!

Hoe kan jy jou gewoontes vir jou laat werk eerder as teen jou? Kyk na die volgende drie voorstelle wat op beginsels in die Bybel gebaseer is.

Dit kan ’n versoeking wees om alles in jou lewe onmiddellik te probeer verander. Jy sê vir jouself: ‘Hierdie week gaan ek ophou rook, ophou vloek, vroeër bed toe begin gaan, begin oefen, gesonder begin eet en my ouma en oupa begin bel.’ Maar as jy al jou doelwitte op een slag probeer bereik, sal jy beslis nie een van hulle bereik nie!

’n Beskeie persoon is realisties. Hy erken dat sy tyd, energie en middele beperk is. Hy probeer nie alles op een slag verander nie, hy bring eerder geleidelik verbeteringe aan.

WAT JY KAN DOEN

Konsentreer op een of twee gewoontes op ’n slag. Die volgende stappe kan jou help:

1. Maak ’n lys van die goeie gewoontes wat jy wil aanleer en ’n lys van enige slegte gewoontes wat jy moet afleer. Moenie jouself beperk nie; skryf op elke lys soveel gewoontes neer as waaraan jy kan dink.

2. Nommer die dinge op jou lys in die volgorde van wat vir jou die belangrikste is.

3. Kies op elke lys ’n paar gewoontes—selfs net een of twee—en konsentreer daarop. Beweeg dan aan na die volgende een of twee gewoontes op elke lys.

Bespoedig die proses deur ’n slegte gewoonte met ’n goeie gewoonte te vervang. Byvoorbeeld, as jy op jou lys van slegte gewoontes geskryf het dat jy te veel TV kyk en op jou lys van goeie gewoontes geskryf het dat jy in kontak wil bly met jou geliefdes, kan jy jou die volgende voorneem: ‘Van nou af gaan ek nie die TV onmiddellik aanskakel wanneer ek elke dag by die huis kom nie, ek gaan eerder ’n vriend of ’n familielid kontak om ’n bietjie te gesels.’

• Jy het besluit om gesonder te eet, maar daardie bak roomys roep heeltyd jou naam.

• Jy het besluit om op te hou rook, maar jou vriend—wat weet dat jy probeer ophou—bied weer vir jou ’n sigaret aan.

• Jy wou vandag gaan oefen, maar net die gedagte dat jy in jou kas na jou hardloopskoene moet soek, klink na te veel werk!

Kan jy sien wat hierdie scenario’s in gemeen het? Ondervinding het keer op keer getoon dat ons omgewing—die situasies waarin ons onsself plaas en die mense met wie ons tyd deurbring—’n uitwerking het op hoe suksesvol ons daarin is om goeie gewoontes aan te leer en slegte gewoontes af te leer.

Die Bybel spoor ons aan om vooruit te dink. As ons dit doen, kan ons situasies vermy wat dit moeilik kan maak om ons doelwitte te bereik en kan ons dus onsself in beter situasies plaas (2 Timoteus 2:22). Kortom, dit is verstandig om in beheer van ons omgewing te wees.

WAT JY KAN DOEN

• Maak dit moeiliker om die verkeerde ding te doen. As jy byvoorbeeld wil ophou om gemorskos te eet, moet jy probeer om nie kos in jou kombuis te hou wat jy weet nie goed is vir jou nie. Dan, wanneer jy in die versoeking kom, sal dit makliker wees om dit te weerstaan as om daarvoor te swig.

• Maak dit makliker om die regte ding te doen. As jy byvoorbeeld beplan om vroeg in die oggend te oefen, moet jy jou oefenklere al die vorige aand regsit. Hoe makliker dit is om aan die gang te kom, hoe waarskynliker is dit dat jy sal doen wat jy beplan het.

• Kies jou vriende versigtig. Ons is geneig om soos die mense te word met wie ons tyd deurbring (1 Korintiërs 15:33). Beperk dus jou kontak met mense wat gewoontes bevorder wat jy probeer afleer, en kies vriende wat jou aanspoor om goeie gewoontes aan te leer.

Daar is ’n bekende opvatting dat dit 21 dae neem om ’n nuwe gewoonte aan te leer. Maar navorsing toon dat sommige mense in werklikheid minder tyd en ander baie meer tyd nodig het om groot veranderinge aan te bring. Moet dit jou ontmoedig?

Dink aan die volgende scenario: Sê nou jy wil in die gewoonte kom om drie keer per week te oefen.

• Die eerste week bereik jy jou doelwit.

• Die tweede week slaan jy ’n dag oor.

• Die derde week bereik jy weer jou doelwit.

• Die vierde week oefen jy net een keer.

• Die vyfde week bereik jy weer jou doelwit en daarna bereik jy dit elke week.

Dit het vyf weke geneem om in hierdie nuwe gewoonte te kom. Dit klink dalk lank, maar wanneer jy jou doelwit bereik, sal jy bly wees dat jy ’n nuwe goeie gewoonte aangeleer het.

Die Bybel spoor ons aan om te dink aan die langtermyngevolge. Wat op die ou end saak maak, is nie hoeveel keer ons val nie, maar eerder hoeveel keer ons weer opstaan.

WAT JY KAN DOEN

• Moenie dink dat jy vir altyd misluk het as jy ’n terugslag gehad het nie. Jy kan verwag om ’n paar terugslae te hê terwyl jy jou doelwit probeer bereik.

• Konsentreer op die tye toe jy dinge reg gedoen het. Byvoorbeeld, as jy probeer om beter met jou kinders te kommunikeer, vra jou af: ‘Wanneer laas wou ek op my kinders skree, maar het ek dit toe nie gedoen nie? Wat het ek eerder gedoen? Hoe kan ek dit weer doen?’ Vrae soos hierdie kan jou help om weer sukses te behaal eerder as om aan te hou dink aan jou terugslae.

Wil jy graag weet hoe Bybelbeginsels jou in ander aspekte van jou lewe kan help, soos hoe om angstigheid te hanteer, hoe om ’n gelukkige gesinslewe te bou en hoe om ware geluk te vind? Praat met enige van Jehovah se Getuies of besoek ons webwerf, jw.org/af.