Het jy dit al ooit oorweeg om die Bybel te lees, maar dit dan nie gedoen nie omdat jy soos die persone hierbo gevoel het? Om die Bybel te lees kan vir baie mense oorweldigend wees. Maar sê nou jy vind uit dat dit jou kan help om ’n gelukkiger en bevredigender lewe te lei? En sê nou jy vind uit dat daar maniere is waarop jy die Bybel kan lees wat dit interessanter kan maak? Sou jy bereid wees om uit te vind wat die Bybel jou kan bied?

Party mense het die Bybel begin lees en baie daarby baat gevind. Kyk wat ’n paar van hulle sê.

Ezekiel, wat in sy vroeë 20’s is, sê: “In die verlede was ek soos iemand wat ’n motor bestuur het sonder om te weet waarheen hy op pad is. Maar toe ek die Bybel begin lees, het dit my lewe betekenisvol gemaak. Dit bevat praktiese raad wat ek elke dag kan gebruik.”

Frieda, wat ook in haar 20’s is, verduidelik: “Ek het altyd baie maklik kwaad geword. Maar omdat ek die Bybel begin lees het, het ek geleer om selfbeheersing te hê. Mense kom nou makliker met my oor die weg, en daarom het ek nou meer vriende.”

’n Vrou in haar 50’s met die naam Eunice sê die volgende oor die Bybel: “Dit help my om ’n beter mens te wees en om my slegte gewoontes te verander.”

As jy die Bybel lees, kan dit jou help om die lewe meer te geniet, soos in die geval van hierdie lesers en miljoene ander (Jesaja 48:17, 18). Die Bybel kan jou onder andere help om (1) goeie besluite te neem, (2) ware vriende te maak, (3) stres te hanteer en bowenal (4) om die waarheid oor God te leer. Die Bybel se raad kom van God af, en dit is altyd goed vir jou. God gee nooit slegte raad nie.

Wat belangrik is, is dat jy ’n begin maak. Watter praktiese wenke kan dit vir jou makliker maak om die Bybel te begin lees en om dit meer te geniet?

Wat sal jou help om jou Bybellees te geniet en om die meeste daaruit te kry? Kyk na die volgende vyf wenke wat vir baie mense gewerk het.

Skep die regte atmosfeer. Probeer ’n stil plek vind. Beperk afleidings sodat jy kan konsentreer op wat jy lees. Goeie beligting en vars lug kan jou help om die meeste uit jou Bybellees te kry.

Maak seker dat jy in die regte gemoedstemming is. Die Bybel is ’n boek wat van ons hemelse Vader kom. Jy sal dus die meeste daarby baat vind as jy soos ’n kind is wat gewillig is om by ’n liefdevolle ouer te leer. As jy enige negatiewe, vooropgesette idees oor die Bybel het, moet jy probeer om dit opsy te skuif sodat God jou kan leer.—Psalm 25:4.

Bid voordat jy lees. Die Bybel bevat God se gedagtes, en daarom is dit nie verbasend dat ons sy hulp nodig het om dit te verstaan nie. God belowe om “heilige gees [te] gee aan dié wat hom vra” (Lukas 11:13). Die heilige gees kan jou help om God se gedagtes te verstaan. Met verloop van tyd sal dit jou verstand open om “selfs die diep dinge van God” te verstaan.—1 Korintiërs 2:10.

Probeer verstaan wat jy lees. Moenie net lees om klaar te kry nie. Konsentreer terwyl jy lees. Vra jou vrae af soos die volgende: ‘Watter eienskappe het die persoon van wie ek lees? Hoe kan ek dit in my lewe toepas?’

Stel spesifieke doelwitte. Om baat te vind by jou Bybellees moet jy probeer om iets te leer wat jou lewe sal verryk. Jy kan dalk vir jou die volgende doelwitte stel: ‘Ek wil meer oor God se persoonlikheid leer.’ ‘Ek wil ’n beter mens of ’n beter huweliksmaat word.’ Kies dan gedeeltes van die Bybel wat jou sal help om hierdie doelwitte te bereik.a

Hierdie vyf wenke sal jou help om ’n begin te maak. Maar hoe kan jy jou Bybellees selfs interessanter maak? Die volgende artikel gee ’n paar wenke.

Hoe vind jy Bybellees? Vervelig? Of verfrissend? Dit hang baie af van hoe jy jou Bybellees benader. Kom ons kyk wat jy kan doen om dit interessanter en lekkerder te maak.

Kies ’n betroubare vertaling wat moderne taal gebruik. Wanneer jy iets lees wat ’n klomp moeilike of outydse woorde bevat wat jy nie ken nie, sal jy dit waarskynlik nie geniet nie. Soek dus ’n Bybel met maklike, verstaanbare taal wat jou hart sal raak. Maar terselfdertyd moet dit ’n goeie en akkurate vertaling wees.a

Gebruik moderne tegnologie. Vandag is die Bybel nie net in gedrukte vorm beskikbaar nie, maar ook elektronies. Party Bybels kan op rekenaars, tablette of selfone afgelaai word, of jy kan dit aanlyn lees. Party weergawes sluit bykomende hulpmiddele in wat jy kan gebruik om ander Bybelverse oor dieselfde onderwerp vinnig na te gaan of om selfs verskeie vertalings met mekaar te vergelyk. Baie mense verkies dit om eerder na ’n opname van die Bybel te luister as dit in hulle taal beskikbaar is. Hulle geniet dit om na hierdie opnames te luister wanneer hulle van openbare vervoer gebruik maak, wasgoed doen, of besig is met iets anders waartydens jy na iets kan luister. Sal een van hierdie metodes vir jou werk?

Gebruik Bybelstudiehulpe. Bybelstudiehulpe kan jou help om baie meer uit jou Bybellees te kry. Daar is kaarte van Bybellande wat jou sal help om die plekke te vind waarvan jy lees en om gebeure beter te verstaan. Artikels soos dié in hierdie tydskrif of in die gedeelte “Bybelleringe” op die webwerf jw.org/af kan jou help om uit te vind wat baie van die gedeeltes in die Bybel beteken.

Probeer verskillende metodes. Dit kan baie oorweldigend wees as jy dit oorweeg om die hele Bybel deur te lees. Dalk kan jy begin deur eerder ’n gedeelte te lees waarin jy veral belangstel. As jy oor bekende persone in die Bybel wil leer, kan jy al die dele probeer lees wat met ’n sekere karakter verband hou. Daar is ’n voorbeeld van ’n metode wat jy kan gebruik in die bygaande venster “Delf in die Bybel deur die persone daarin te leer ken”. Of dalk wil jy die Bybel volgens onderwerp lees of in die volgorde waarin gebeure plaasgevind het. Probeer gerus een van hierdie metodes.

Die Bybel is nie ’n gewone boek nie. Dit bevat raad wat van ons Skepper af kom (2 Timoteus 3:16). Die boodskap daarin kan ’n groot uitwerking op ons lewe hê. Ja, die Bybel sê: “Die woord van God is lewend en oefen krag uit” (Hebreërs 4:12). Dit het die krag om ons lewe op twee belangrike maniere te verbeter—dit lei ons nou in ons daaglikse lewe en dit help ons om God en sy beloftes te leer ken.—1 Timoteus 4:8; Jakobus 4:8.

Dit verbeter jou lewe nou. Die Bybel kan jou help wanneer dit by persoonlike sake kom. Dit gee praktiese raad oor die volgende.

• Verhoudings met ander.—Efesiërs 4:31, 32; 5:22, 25, 28, 33.

• Emosionele en fisiese gesondheid.—Psalm 37:8; Spreuke 17:22.

• Sedelike waardes.—1 Korintiërs 6:9, 10.

• Geldsake.—Spreuke 10:4; 28:19; Efesiërs 4:28.a

’n Jong egpaar in Asië het die Bybel se raad baie waardeer. Soos baie ander pasgetroudes, het hulle gesukkel om by mekaar aan te pas en om openlik te kommunikeer. Maar hulle het die dinge wat hulle in die Bybel gelees het, begin toepas. Wat was die gevolg? Die man, Vicent, sê: “Die Bybel het my gehelp om uitdagings in ons huwelik op ’n liefdevolle manier te hanteer. Om volgens die Bybel se standaarde te lewe, het ons gehelp om ’n gelukkige lewe saam te hê.” Sy vrou, Annalou, stem saam en sê: “Bybelvoorbeelde het ons gehelp. Ek is nou gelukkig en tevrede met ons huwelik en met ons doelwitte in die lewe.”

Dit help jou om God te leer ken. Die Bybel het Vicent nie net met sy huwelik gehelp nie. Hy sê verder: “Omdat ek die Bybel begin lees het, voel ek nou nader aan Jehovahb as ooit tevore.” Vicent se woorde beklemtoon ’n belangrike punt—die Bybel kan jou help om God te leer ken. As jy die Bybel lees, sal jy nie net by sy raad baat vind nie, maar dit sal jou ook help om hom as ’n vriend te leer ken. En jy sal leer dat hy ons van ’n beter toekoms vertel, ’n tyd wanneer jy “die werklike lewe”—die ewige lewe—kan geniet (1 Timoteus 6:19). Dit is iets wat geen ander boek jou kan bied nie.

As jy die Bybel begin lees en aanhou om dit te doen, sal jy ook daarby baat vind. Dit sal jou lewe nou verbeter en jy sal God leer ken. Maar terwyl jy die Bybel lees, sal jy waarskynlik baie vrae hê. Dan moet jy dink aan die goeie voorbeeld van die Etiopiese amptenaar wat 2 000 jaar gelede gelewe het. Hy het baie vrae oor die Bybel gehad. Toe hy gevra is of hy verstaan wat hy lees, het hy gesê: “Hoe sou ek tog ooit kon, tensy iemand my lei?”c Daarna het hy gretig hulp aanvaar van Filippus, wat reeds ’n bekwame Bybelonderrigter en een van Jesus se eerste dissipels was (Handelinge 8:30, 31, 34). As jy ook graag meer oor die Bybel wil weet, kan jy ’n Bybelstudie aanlyn aanvra by www.pr2711.com/af, of skryf aan die naaste adres wat in hierdie tydskrif genoem word. Jy kan ook Jehovah se Getuies in jou omgewing kontak of ’n Koninkryksaal naby jou besoek. Wil jy graag jou lewe verbeter? Begin dan sommer vandag om die Bybel te lees!