Jesaja 40:31 – “Dié wat op Jehovah hoop, sal nuwe krag kry”

“Maar dié wat op Jehovah hoop, sal nuwe krag kry. Hulle sal sweef soos arende. Hulle sal hardloop en nie uitgeput raak nie. Hulle sal loop en nie moeg raak nie.” – Jesaja 40:31, Nuwe Wêreld-vertaling.

“Maar dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie.” – Jesaja 40:31, Nuwe Afrikaanse Bybelvertaling (1983).

Betekenis van Jesaja 40:31

Jehovaha God verseker sy aanbidders dat hy hulle die nodige krag sal gee om enige probleem wat hulle dalk het, te oorkom of te hanteer.

“Dié wat op Jehovah hoop, sal nuwe krag kry.” Diegene wat hoop, of vertrou, dat God sy volk kan en wil help, kan seker wees dat hy hulle sal ondersteun (Spreuke 3:5, 6). Een manier hoe God diegene wat hom aanbid, krag kan gee, is deur middel van sy heilige gees, of werkende krag. – Lukas 11:13.

“Hulle sal sweef soos arende.” Hierdie illustrasie wys watter uitwerking God se krag op ’n persoon kan hê. ’n Arend maak staat op warm stygende lugstrome om te sweef. Wanneer ’n arend ’n lugstroom vind, sprei hy sy vlerke en vlieg hy om en om binne die lugstroom terwyl hy al hoe hoër styg. Arende beweeg van een lugstroom na ’n ander, en daarom kan hulle ure lank in die lug bly terwyl hulle min energie gebruik om te vlieg.

“Hulle sal hardloop en nie uitgeput raak nie.” Probleme in die lewe kan ons fisies en emosioneel swak maak. Maar ons kan volhard met die krag wat God ons gee. Dit kan ons versterk om die regte ding te doen al gaan ons deur baie moeilike tye. Die apostel Paulus, wat deur swaar tye gegaan het, het geskryf: “Vir alles is ek sterk genoeg deur hom wat my krag gee.” – Filippense 4:13.

Konteks van Jesaja 40:31

Omtrent 2 700 jaar gelede het God die profeet Jesaja geïnspireer om hierdie woorde te skryf. Omdat die Jode 70 jaar lank in Babilon in gevangenskap sou wees, het Jehovah hierdie woorde laat neerskryf om hulle aan te moedig. Maar hierdie teks is van toepassing op al God se getroue knegte. Die Jode het gesien hoe God se woorde waar geword het toe hulle ná hulle gevangenskap na hulle tuisland teruggekeer het (Jesaja 40:1-3). In 537 VHJ het God hulle die krag gegee om die lang en moeilike reisb van Babilon na Jerusalem te voltooi. – Jesaja 40:29.