LES 23
Doop – ’n Wonderlike doelwit!
Jesus het gesê dat Christene gedoop moet word. (Lees Matteus 28:19, 20.) Maar wat is doop? En wat moet ’n persoon doen om daardie doelwit te bereik?
1. Wat is doop?
Die woord “doop” kom van ’n Griekse woord wat beteken om onder water “te dompel”. Toe Jesus gedoop was, was hy onder die water van die Jordaanrivier gedompel, dit wil sê hy was heeltemal onder die water, en toe het hy “uit die water [opgekom]” (Markus 1:9, 10). Net so word ware Christene heeltemal onder die water gedompel wanneer hulle gedoop word.
2. Wat wys ’n persoon wanneer hy hom laat doop?
Wanneer iemand gedoop word, wys hy dat hy hom aan Jehovah God toegewy het. Hoe wy ’n persoon hom toe? Voordat ’n persoon gedoop word, sê hy vir Jehovah in ’n private gebed dat hy Hom vir ewig wil dien. Hy belowe dat hy Jehovah alleen sal aanbid en dat om God se wil te doen, die belangrikste ding in sy lewe sal wees. Hy kies om “[op te hou] om vir homself te lewe” en om aan te hou om Jesus se leringe en voorbeeld te volg (Matteus 16:24). Sy toewyding en doop maak dit moontlik vir hom om ’n sterk verhouding met Jehovah te hê, en met ander wat Hom aanbid.
3. Wat moet ’n persoon doen voordat hy gedoop kan word?
Voordat jy gedoop kan word, is dit belangrik om oor Jehovah te leer en sterk geloof in hom op te bou. (Lees Hebreërs 11:6.) Hoe meer kennis jy kry en hoe sterker jou geloof word, hoe liewer sal jy vir Jehovah word. Dan sal jy ander van hom wil vertel en volgens sy standaarde wil lewe (2 Timoteus 4:2; 1 Johannes 5:3). Wanneer ’n persoon lewe “op ’n manier wat Jehovah waardig is sodat [hy] hom in alles bly kan maak,” sal hy dalk besluit om sy lewe aan God toe te wy en gedoop te word. – Kolossense 1:9, 10.a
SOEK DIEPER
Kyk wat ons uit Jesus se doop kan leer en hoe iemand vir hierdie belangrike stap kan voorberei.
4. Ons kan uit Jesus se doop leer
Lees Matteus 3:13-17 om meer details oor Jesus se doop te kry. Bespreek dan hierdie vrae:
Was Jesus ’n baba toe hy gedoop was?
Hoe was hy gedoop? Was hy net met water gesprinkel?
God het Jesus ’n spesiale werk gegee om op die aarde te doen, en Jesus het daardie werk begin doen nadat hy gedoop was. Lees Lukas 3:21-23 en Johannes 6:38, en bespreek dan hierdie vraag:
Watter werk was die belangrikste in Jesus se lewe nadat hy gedoop was?
5. Doop is ’n doelwit wat jy kan bereik
Die idee om jou toe te wy en te laat doop, kan jou dalk aan die begin ’n bietjie bang maak. Maar as jy aanhou om van Jehovah te leer en hom beter leer ken, sal jy meer selfvertroue hê om so ’n belangrike besluit te maak. Om ’n paar mense te sien wat dit gedoen het, speel die VIDEO.
Lees Johannes 17:3 en Jakobus 1:5, en bespreek dan hierdie vraag:
Wat kan ’n persoon help om voor te berei om gedoop te word?
Ons wy ons toe deur vir Jehovah te sê dat ons hom vir ewig wil dien
By ons doop wys ons vir ander dat ons ons aan God toegewy het
6. Wanneer ons gedoop word, word ons deel van Jehovah se familie
Wanneer ons gedoop word, word ons deel van ’n verenigde, wêreldwye familie. Al kom ons van verskillende plekke en uit verskillende agtergronde, glo ons dieselfde dinge en lewe ons volgens dieselfde standaarde in die Bybel. Lees Psalm 25:14 en 1 Petrus 2:17, en bespreek dan hierdie vraag:
Hoe raak doop ’n persoon se verhouding met Jehovah en met ander wat Hom aanbid?
PARTY MENSE SÊ: “Ek’s nie gereed om gedoop te word nie.”
As dit is hoe jy voel, dink jy dat doop nog steeds ’n doelwit is wat jy wil bereik?
WAT ONS GELEER HET
Jesus het gesê dat Christene gedoop moet word. Voordat ’n persoon gedoop kan word, moet hy sterk geloof in Jehovah opbou, volgens Sy standaarde lewe en homself aan Jehovah toewy.
Hersiening
Wat is doop, en hoekom is dit belangrik?
Wat wys ’n persoon wanneer hy hom laat doop?
Wat moet ’n persoon doen voordat hy hom kan toewy en laat doop?
LEER MEER
Leer wat doop is en wat dit nie is nie.
Kyk na maniere waarop ’n persoon tot doop kan vorder.
“Liefde en waardering vir Jehovah lei tot doop” (Die Wagtoring, Maart 2020)
Lees wat ’n man gemotiveer het om gedoop te word.
“Hulle wou hê dat ek self moes seker maak wat die waarheid is” (Die Wagtoring, 1 Februarie 2013)
Kyk hoekom doop ’n wonderlike doelwit is en hoe jy daarvoor kan voorberei.
“Moet ek my laat doop?” (Vrae wat jongmense vra—Antwoorde wat werk, Deel 2, hoofstuk 37)
a As ’n persoon voorheen in ’n ander godsdiens gedoop was, moet hy weer gedoop word. Hoekom? Want daardie godsdiens het nie die waarheid uit die Bybel geleer nie. – Sien Handelinge 19:1-5 en Les 13.